Երբեմնի հայտնի մալականների գյուղում այսօր մնացել են ընդամենը երկու ծեր ընտանիք․ Էթնիկ գույների առանձնահատկությունները Հայաստանում

Տաշիր քաղաքից 6 կմ հեռավորությամբ գտնվող Մեդովկայում եւս ապրում են մալական ընտանիքներ։ Մալականները Կովկաս են եկել 19-րդ դարի սկզբին, երբ Ցարական Ռուսաստանը սկսեց հաստատվել այստեղ: Նրանք Կովկասում բնակեցվեցին 1830-ականներից հետո՝ Նիկոլայ Առաջին ցարի հրամանովև իրենց ունեցվածքով հաստատվեցին Հայաստանի լեռնային շրջաններում, ինչպես նաև Վրաստանում, Ադրբեջանում և Արևմտյան Հայաստանի՝ Կարս, Էրզրում նահանգներում: Երկրորդ համաշխարհային պատերազմից հետո նրանք Կարսից տեղահանվեցին:

Այստեղ՝ Մեդովկայում մալականները թաղման ծիսակարգ ունեն, որի ժամանակ հատուկ տեսակի լապշա են սարքում, մսով բորշ, ինքնաեռով եփած կոմպոտ և այլն: Սեղանին օղի կամ գինի չի դրվում. մալականները ոգելից խմիչքներ չեն օգտագործում:

Մեդովկայի վարչական ղեկավարը՝ Աշոտ Հակոբյանը նշում են, որ նախկին Մեդովկան այսօրվա Մեդովկայից շատ է տարբերվում: Այն այսօրվա տեսքով ոչնչով չի տարբերվում մեկ այլ հայկական գյուղից, մինչդեռ ժամանակին բացառապես համարվում էր մալականների գյուղ, հենց Մալականներն են գյուղը հիմնադրել։

«Մալականների համար էսթետիկ տեսքը շատ կարևոր է, ես հիշում եմ փայտե տնակները, որոնց շուրջը ծաղիկներով շրջափակված պարտեզներ էին, ու փողոցներն էլ շատ մաքուր ու սիրուն էին,- ասում է վարչական ղեկավարը։

Գյուղի մի ծայրին գերեզմանոցն է՝ ցանկապատված ու ծառերով շրջափակված: Այն շատ մաքուր է ու խոտով առատ: Մեդովկան լքած մալականները, ժամանակ առ ժամանակ գալիս են, ինչպես իրենք են անվանում՝ «հայրենիք», որովհետև, բացի ամեն ինչից, նրանց ընտանեկան գերեզմաններն այստեղ են: Երբեմնի մալականի գյուղից այսօր գյուղում ընդամենը երկու ծեր մալականնների ընտանիք է ապրում՝ պահպաննելով իրենց ավանդույթները։