Ռուսական թատրոնը հյուրախաղերով հանդես կգա Վանաձորում

Երեւանի Կ. Ստանիսլավսկու անվան ռուսական դրամատիկական թատրոնը սեպտեմբերի 19-ին հյուրախաղերով կլինի Վանաձորում։ Վանաձորցիները Հովհաննես Աբելյանի անվան պետական դրամատիկական թատրոնի բեմում հնարավորություն կունենան դիտելու «Փող: Կիրք: Իշխանություն» ներկայացումը՝ ըստ Իվան Գոնչարովի «Սովորական պատմություն» վեպի։

19-րդ դարի ռուս գրող Իվան Գոնչարովի այս դասական ստեղծագործությունը վերածվել է ժամանակակից թատերական մեկնաբանության, որն արդեն արժանացել է ինչպես Երեւանի, այնպես էլ Հայաստանից դուրս փառատոնային հանդիսատեսի բարձր գնահատականներին։ Ներկայացումը բեմադրել է թատրոնի տնօրեն Սուրեն Շահվերդյանը, որի ռեժիսուրան աչքի է ընկնում համարձակ լուծումներով եւ սուր սոցիալական շեշտադրումներով։

Ներկայացման կենտրոնում երիտասարդ Ալեքսանդր Ադուեւն է՝ գավառից մայրաքաղաք ժամանած ռոմանտիկ մի կերպար, ով աստիճանաբար խորտակվում է մեծ քաղաքի ագահության, շահադիտության եւ իշխանատենչ մթնոլորտում։ Նրա բարձր գաղափարները բախվում են մի աշխարհի հետ, որտեղ ամեն ինչ թելադրում է փողը, իսկ զգացմունքներն ու երազանքները կորցնում են արժեքը սառը հաշվարկի եւ իրականության դաժանության առաջ։

Բեմում փայլում են ռուսական թատրոնի հայտնի դերասաններն ու խոստումնալից նորեկները: Ներկայացումը հասցեագրված է չափահաս հանդիսատեսին՝ 18+ տարիքային սահմանափակմամբ, ինչը պայմանավորված է թե՛ թեմայի խորությամբ, թե՛ բեմադրական համարձակ լեզվով։

«Փող․ Կիրք․ Իշխանություն»-ը շարունակում է մնալ 2025 թ. ամենադիտված, հնչեղ եւ ժամանակի շունչն արտացոլող ներկայացումներից մեկը, որը, ժամանակակից գեղարվեստական լեզվով խոսելով, բացահայտում է, թե ինչպես կարող են մարդուն փոխել փողը, անսեր կրքերը եւ իշխանությունը։

Հիշեցնենք, որ բոլորովին վերջերս «Փող․ Կիրք․ Իշխանություն» ներկայացումը մասնակցել է Անտոն Չեխովի անվան 17-րդ միջազգային թատերական փառատոնին: Իսկ ՀԹԳՄ «Արտավազդ-2025» մրցանակաբաշխությանն արժանացել մրցանակների միանգամից 4 անվանակարգերում:

ՀՐԱՆՏ ՍԱՐԱՖՅԱՆ

Այս թեմայով Ռուսական ուժերը կրկին ծանր հրթիռային հարված են հասցրել Կիեւին եւ այլ տարածքների (Տեսանյութ) Ռուսական ուժերը ոչնչացրել են Կրամատորսկի ռազմավարական կամուրջներից մեկը (Տեսանյութ) Ռուսական արբանյակը, հնարավոր է, Ուկրաինային տվյալներ փոխանցող օբյեկտի վրա հարձակման փորձարկումէ արել. Reuters Ինչո՞ւ է ընդհատվել «Գայանե» բալետի ներկայացումը․ հանդիսատեսը վրդովված է Ընդդիմության համախմբումը սատարում ենք, բայց պետք է հասկանանք հաջորդ քայլերը. Նավասարդյան