Թուրք-ադրբեջանական խամաճիկների ձեռքին գործիք չդառնա՛ք. Չախալյանը՝ դատախազներին

Երեւանի ընդհանուր իրավասության դատարանի Կենտրոն նստավայրում տեղի ունեցավ Ազգային արժեքների պաշտպանության «Կամք» հասարակական նախաձեռնության հիմնադիր Վահագն Չախալյանի, «Սրբազան պայքար» շարժման առաջնորդ Տ. Բագրատ արքեպիսկոպոս Գալստանյանի եւ եւս 15-ի դեմ քրեական գործով առաջին դատական նիստը։

Թեպետ դատական նիստը դռնբաց էր, բայց անգամ մեղադրյալների հարազատները մեծամասամբ չկարողացան ներկա գտնվել: Դահլիճում մի կերպ տեղավորվել էին 17 մեղադրյալներն՝ իրենց փաստաբաններով, մեծ թվով ոստիկաններ եւ լրագրողներ: Նիստի ընթացքում դատավոր Կարեն Ֆարխոյանը հասցրեց միայն ծանոթանալ մեղադրյալների հետ, թե ով ով է, երբանից է կալանքի տակ, որտեղ է սովորել եւ աշխատել:

Հատկանշական էր Վահագն Չախալյանի խոսքը, որը ներկայացավ այսպես. «2006 թվականին էլի՛ քաղաքական հայացքներիս համար՝ դատապարտվել եմ ՀՀ-ում, 2008 թվականին էլի՛ քաղաքական հայացքներիս համար դատապարտվել եմ Վրաստանում՝ Սահակաշվիլու կողմից: 9 տարի նստել եմ, իշխանափոխությունից հետո արդարացվել եմ: Վրաստանի իշխանությունները ներողություն են խնդրել եւ ազատ են արձակել: Հիմա էլ վերջին տարիներին Հայաստանում եմ դատապարտվում՝ նորից քաղաքական հայացքներիս համար: Բայց վստահ եմ՝ արդարությունը հաղթելու է»:

«Կամք» հասարակական նախաձեռնության հիմնադիրը հիշեցրեց, որ այս իշխանության օրոք Նիկոլ Փաշինյանի Ջավախք գնալու ժամանակ են առաջին անգամ իրեն կալանավորել, որպեսզի ինքը չգնա Ջավախք. «Դրանից հետո հա կալանավորել ու կալանավորել են, ինչպես դատարանում արդեն իսկ նշվել է, հակաիշխանական կեցվածքիս համար: Ուղղակի, մի շտկում անեմ՝ հայամետ կեցվածքիս: Եվ հորդորում եմ մեղադրող դատախազներին հայամետ, պետականամետ կեցվածք ցուցաբերեն, թուրք-ադրբեջանական խամաճիկների ձեռքին գործիք չդառնան»:

Նշենք, որ սույն քրեական գործով երկրորդ դատական նիստը տեղի կունենա օգոստոսի 20-ին, ժամը՝ 14:30-ին, Երեւան քաղաքի Շենգավիթ վարչական շրջանի ընդհանուր իրավասության դատարանում (հասցե՝ Արշակունյաց 24/1): Ըստ դատավորի, այնտեղ կհատկացնեն ավելի մեծ նիստերի դահլիճ: Փաստաբանները փորձեցին հետաքրքրվել, թե մեղադրյալներից քանիսի խափանման միջոցի փոփոխության հարցն է քննվելու, սակայն դատավորը հղում անելով համապատասխան օրենքին՝ տվեց ոչ կոնկրետ պատասխան, թե հերթականությամբ են քննելու: Նիստն ավարտվեց Վահագն Չախալյանի բացականչությամբ: Նա ցիտեց ՀՀ ազգային հերոս Մովսես Գորգիսյանի հայտնի խոսքը. «Կեցցե՛ այն Հայաստանը, որ վաղն է գալու»:

ՀՐԱՆՏ ՍԱՐԱՖՅԱՆ

Այս թեմայով Աշխարհում գոյություն ունեցող բոլոր եկեղեցիները մշտապես համագործակցել են հատուկ ծառայությունների հետ. Բարենց Վազգեն եպիսկոպոս Միրզախանյանը վերջին հարցազրույցներից մեկում շնությունը (պոռնկությունն) անվանել է բնական մեղք Խնդրում ենք Վեհափառ Հայրապետին, որ անհողդողդ և անսասան մնա. Միքայել սրբազանի նամակը հիվանդանոցից Բագրատ և Արշակ սրբազանների հայտարարությունը կալանավայրից «Ա՛յ պիղծ, Գևորգ սրբազան ես, ինչ ես, բա դո՛ւ, Բենթլի՞դ ուր ա»․ տիրադավերը փախան ժողովրդի ցասումից (Video)