Միտումնավոր այրել են. Նուբարաշենը՝ հրդեհվող աղբավայրի գերին

Օգոստոսյան տապը բառիս բուն իմաստով կրակ ու պատիժ է դարձել նուբարաշենցիների համար: Արդեն մի քանի օր է՝ Նուբարաշենի աղբավայրը բոցկլտում է՝ տեղացիների համար դառնալով իսկական մղձավանջ: Իսկ օդում տարածված սարսափելի հոտն ու խեղդող ծուխն, ուղղակի, անտանելի է տանել: Նուբարաշենի բնակիչների համար ամառային արձակուրդներն  առօրյա դժոխք են հիշեցնում՝ գիշերն անցնում է հրդեհի մթագնած շնչառությամբ, իսկ ցերեկը՝ անասելի համաճարակային հոտով:

Սակայն խնդիրը միայն հոտը չէ. աղբակույտերից բարձրացող ծուխը ոչ միայն աղտոտում է օդը, այլեւ նպաստում է տարբեր վարակների տարածմանը, հատկապես՝ այս օրերին արդեն նկատվող ճանճերի ու միջատների անսահման շատացման ֆոնին։ Հաշվի առնելով նաեւ համաճարակային վտանգը՝ պատկերն ավելի քան մտահոգիչ է։ Ո՞ւր է վերահսկողությունը, ո՞վ է պատասխան տալու այս իրավիճակի համար, եւ, վերջապես, որքանո՞վ է անվտանգ ապրել մի տարածքում, որն օրերով այրվում է իշխանությունների աչքի առաջ, «Իրավունք»-ը պատասխանների փնտրտուքով զրուցել է Երեւանի ավագանու «Քաղաքացիական պայմանագիր» խմբակցության անդամ ԱՇՈՏ ՍԱՐԳՍՅԱՆԻ հետ:

— Օրեր շարունակ այրվում է Նուբարաշենի աղբավայրը: Քաղաքացիներն այլեւս չեն կարողանում դիմանալ՝ հոտին, ծխին եւ իրավիճակին: Քաղաքապետարանը վերջապես ինչպիսի՞ քայլեր է ձեռնարկում հարցը վերջնական լուծելու առումով:

— Ինքս այսօր եղել եմ այնտեղ: Արդեն հրդեհը մարված է, այսինքն՝ մնացորդային, հատվածային կտորներ են, որտեղ ավելի շատ ծխում է, քան այրվում: Պետք է ասեմ, որ քաղաքապետարանը, ՆԳՆ հրշեջները արագ արձագանքել են եւ արդեն երրորրդ օրն է մաքսիմալ կերպով կատարվում է հնարավորիս՝ կրակն արագ մարելու համար: 30-ից ավել տեխնիկա է աշխատում, դա դեռ միայն քաղաքապետարանի կողմից ուղարկված: Հողը վերցվում է եւ փակում կրակի հատվածը, այսինքն՝ այրվող հատվածները թաղվում են հողի տակ:

— Իսկ առհասարակ, քաղաքապեարանն ի՞նչ աշխատանքներ է կատարում հետագայում նման խնդիրներից խուսափելու համար, քանի որ հրդեհը կարող է ամեն րոպե կրկնվել:

— Այո, դա կարող է կրկնվել: Երբ այնտեղ էի, տեսա տարբեր մարդկանց՝ բնակիչների, ովքեր պարզապես նայում էին կրակի մարման գործընթացին եւ ասացին, որ միտումնավոր այրել են աղբանոցը: Ստացվում է, ինչ էլ անես, եթե բնակիչը միտումնավոր կրակ տա, ապա հրդեհ կլինի, եթե նույնիսկ տարածքը լինի պարսպապատված: Այսինքն, այս դեպքը չի եղել աշխատակցի մեղքով կամ ինքն իրեն չի բռնկվել, սա միտումնավոր կերպով է արվել: Սակայն, ամենը նույնիսկ հաշվի առնելով՝ ասեմ, որ կան բազում քննարկումներ հարցը վերջնական լուծելու համար:

— Դուք Ձեր նախընտրական ծրագրում ներկայացրել էիք աղբամշակման նախագիծ: Ի՞նչ եղավ այդ ծրագիրը:

— Ինչպես ասացի՝ բազում քննարկումներ են լինում, սակայն առավել ծավալուն ասել չեմ կարող, քանի որ քննարկումները անցկացնում են փոխքաղաքապետերը եւ դեռեւս ավագանիներին չեն ներկայացվել նախագծերը: Սակայն, դա անպայման կլինի, որը կհրապարակվի:

ՆԱՆԱ ՍԱՐԳՍՅԱՆ

Այս թեմայով «Նուբարաշեն» ՔԿՀ-ում ցմահ դատապարտվածը ներկայացրել է իր «Հետախուզություն» գիրքը Նուբարաշենի աղբավայրում տրակտորով աղբը հրելիս այն լցվել է աշխատակցի վրա. վերջինս մահացել է Տակնուվրա են արել ԱԱԾ գնդապետի կալանավորված որդու բանտախուցը․ ինչ են փնտրել Նուբարաշենի 10/51 ընտրատեղամասի քվեարկության արդյունքները անվավեր են ճանաչվել «Նուբարաշեն» ՔԿՀ-ում առաջատարըը «Ուժեղ Հայաստանն է»