ԱԱ-2026-ի խմբային փուլի վիճակահանության անցկացման վայրն ու ժամը

Հայտնի է դարձել, թե երբ և որտեղ է կայանալու 2026 թվականի ֆուտբոլի աշխարհի առաջնության խմբային փուլի վիճակահանությունը։

Վիճակահանությունը տեղի կունենա դեկտեմբերի 5-ին Լաս Վեգասում, թեև այդ քաղաքը չի հյուրընկալի մրցաշարի որևէ հանդիպում։ Այս մասին հայտնում է ESPN-ը։

Աղբյուրի տվյալներով՝ միջոցառումը կանցկացվի «Սֆերա» դահլիճում՝ աշխարհի ամենամեծ գնդաձև կառույցում, որը կարող է տեղավորել մոտ 17,500 հանդիսատես։ Դահլիճը հագեցած է յուրօրինակ էկրանով, որի մակերեսը կազմում է ավելի քան 50,000 քառակուսի մետր։

Հիշեցնենք, որ 2026 թվականի աշխարհի առաջնությանը կմասնակցի 48 հավաքական։ Մրցաշարը կանցկացվի հունիսի 11-ից հուլիսի 19-ը ԱՄՆ-ում, Կանադայում և Մեքսիկայում։ Գործող չեմպիոնը Արգենտինայի հավաքականն է, որը 2022 թվականի եզրափակիչում 11-մետրանոց հարվածաշարով հաղթել էր Ֆրանսիային։