Պահանջում եմ, որ պատկան մարմիններն իրականացնեն ծառայողական քննություն. Մովսիսյան

Ինչպես արդեն հայտնի է, Հակոբ Կոջոյանի անվան կրթահամալիրի տնօրեն Ռուզաննա Երեմյանը բացահայտ զբաղվում է քաղաքական պրոպագանդայով՝ իր ֆեյսբուքյան էջը վերածելով «Քաղաքացիական պայմանագիր» կուսակցության (ՔՊ) քարոզչական հարթակի։ Նա նույնիսկ պատրաստ է Նիկոլ Փաշինյանի կոչով մասնակցել Մայր Աթոռի դեմ ասպատակությանը, որի մասին բացահայտ գրառումներ է անում եւ վերահաստատում՝ սոցցանցում ուղիղ եթերով:

Ռուզաննա Երեմյանի գրառումներն ու տեսաուղերձներն անտարբեր չթողեցին հասարակությանը, այդ թվում նաեւ Երեւանի ավագանու անդամ, «Արդար խոսք» կուսակցութան նախագահ ԱԼԲԵՐՏ ՄՈՎՍԻՍՅԱՆԻՆ:

«Որպես Երեւան քաղաքի ավագանու անդամ՝ հայտնում եմ իմ մտահոգությունն այն փաստի վերաբերյալ, որ Հակոբ Կոջոյանի անվան հանրակրթական դպրոցի տնօրենը թույլ է տալիս իրեն՝ բացահայտ քաղաքական հայտարարություններով հանդես գալ՝ այդ թվում սատարելով կամ քննադատելով երկրի վարչապետին կամ որեւէ կուսակցության։ Սա լրջագույն խախտում է գործող օրենսդրության, մասնավորապես՝ «Հանրակրթության մասին» օրենքի՝ հոդված 6 ՝ հանրակրթությունը պետք է իրականացվի քաղաքական չեզոքության սկզբունքով։ Հոդված 18՝ դպրոցի տնօրենը պարտավոր է չներգրավել դպրոցը քաղաքական գործընթացների մեջ, ապահովել հավասարություն ու չեզոքություն։ Բացի դրանից՝ «Պետական ծառայության մասին» օրենքի 22-րդ հոդվածով արգելվում է պետական ծառայողի՝ իր պաշտոնեական դիրքը օգտագործելով քաղաքական կողմնակալություն ցուցաբերելը», - ընդգծում է Մովսիսյանը, ում գնահատմամբ՝ դպրոցը երեխաների դաստիարակության վայր է, ոչ թե` քաղաքական քարոզչության հարթակ։

«Պահանջում եմ, որ պատկան մարմիններն իրականացնեն ծառայողական քննություն, պարզեն հանգամանքները օրենքով սահմանված կարգով։ Նման դեպքերը չպետք է անցնեն անարձագանք։ Սա նախադեպ է ստեղծում կրթական միջավայրի ապականման եւ ապօրինի ազդեցության համար։ Կրթությունը պետք է մնա սուրբ եւ ապաքաղաքական դաշտ»,- շեշտում է «Արդար խոսք» կուսակցութան նախագահը:

ՆԱՆԱ ՍԱՐԳՍՅԱՆ

Այս թեմայով «Ֆուտբոլի ֆեդերացիան պետք է վերահսկվի հատուկ մարմինների կողմից» . Ալբերտ Մովսիսյան