Մակրոն զույգը դատի է տվել փոդքաստի հաղորդավարին, ով ասել է Ֆրանսիայի առաջին տիկինն ի ծնե տղամարդ է եղել

Ֆրանսիայի նախագահ Էմանուել Մակրոնը և նրա կինը՝ Բրիջիթ Մակրոնը, չորեքշաբթի դատական հայց են ներկայացրել աջակողմյան փոդքասթի հաղորդավարուհի Քենդիս Օուենսի դեմ՝ նրան մեղադրելով սուտ տեղեկատվության տարածման մեջ, ըստ որի Ֆրանսիայի առաջին տիկինն ի ծնե տղամարդ է եղել, հաղորդում է CBS News-ը։

22 կետից բաղկացած հայցը ներկայացվել է ԱՄՆ Դելավեր նահանգի Գերագույն դատարան և պահանջում է Օուենսից չնշված գումարի փոխհատուցում, քանի որ նա հեռարձակել է ութ մասից բաղկացած շարք, որը տարածել է մեղադրանքներ Մակրոնների դեմ, դրանց թվում՝ նրա մասին, թե իբր Բրիջիթ Մակրոնն «ի ծնե տղամարդ է եղել, գողացել է մեկ այլ մարդու ինքնությունը և վերածվել կնոջ»։

Մակրոնների դատական հայցում նշվում է, որ Օուենսը մերժել է հետկանչի երեք առանձին խնդրանքներ՝ առաջինը՝ դեկտեմբերին, իսկ վերջինը՝ հուլիսի 1-ին, և շարունակել է Ֆրանսիայի նախագահի և առաջին տիկնոջ մասին «անհեթեթ, զրպարտչական և մտացածին մեղադրանքներ» առաջ քաշել։

«Այս մեղադրանքները ակնհայտորեն շինծու են, և Օուենսը գիտեր, որ դրանք շինծու են, երբ հրապարակել է դրանք։ Այնուամենայնիվ, նա հրապարակել է դրանք։ Եվ պատճառը պարզ է. սա ճշմարտության ձգտելու ցանկություն չէ, այլ փառքի ձգտելու ցանկություն», -ասված է դատական հայցում։

Էմանուել Մակրոնը և Բրիջիթ Մակրոնը հայտարարել են, որ որոշել են դատական ​​հայց ներկայացնել, երբ Օուենսը կրկնապատկել է նրա կեղծ պնդումները՝ չնայած դրանք հերքելու փաստաբանների խնդրանքներին։

Դատական ​​հայցին ի պատասխան՝ Օուենսի ներկայացուցիչը հայտարարել է. «Քենդիս Օուենսը չի լռելու: Խոսքը վերաբերում է օտարերկրյա կառավարության կողմից ամերիկացի անկախ լրագրողի Առաջին փոփոխությամբ սահմանված իրավունքների խախտմանը: Քենդիսը Բրիջիթ Մակրոնին բազմիցս խնդրել է հարցազրույց տալ իրեն: Մեկնաբանություն տալու փոխարեն՝ Բրիջիթը փորձում է ստիպել լրագրողին ենթարկվել իրեն: Ֆրանսիայում քաղաքական գործիչները կարող են վախեցնել լրագրողներին, բայց սա Ֆրանսիան չէ: Սա Ամերիկան է»:

Այս թեմայով Я памятник себе воздвиг нерукотворный․ ԸՆԿԵՐ ՓԱՆՋՈՒՆԻ ԸՆԿԵՐ ՓԱՆՋՈՒՆԻ Բուլղարիայի վարչապետը մերժել է Մակրոնին Մակրոնը հանդիպել է Սիրիայի նախագահի պաշտոնակատար Ահմեդ ալ-Շարաայի հետ Մակրոնը կդառնա առաջին արևմտյան ղեկավարը, որ կայցելի Սիրիա երկրում իշխանափոխությունից հետո