Նման հարձակումները վիրավորում են ոչ միայն եկեղեցական ինստիտուտը, այլեւ միլիոնավոր հավատացյալներին. հայտարարություն

Ի պաշտպանություն Հայ Առաքելական Սուրբ եկեղեցու՝ Արգենտինայի Հանրապետության հայկական կազմակերպությունների (ԱՀՀՀ) համակարգող մարմինը հայտարարությամբ է հանդես եկել:

«Հայ Առաքելական Եկեղեցին հազարամյակների պատմություն ունեցող կառույց է եւ մեր ժողովրդի հոգեւոր հենարանն է քրիստոնեության ընդունումից՝ 301 թվականից ի վեր: Պատմականորեն այն եղել է մեր ինքնության, մշակույթի եւ ազգային արժեքների պահապանը՝ անգամ հալածանքների, ցեղասպանության եւ սփյուռքի ամենածանր ժամանակաշրջաններում։

Այս օրերին խոր վշտով եւ մտահոգությամբ ենք հետեւում որոշ ՀՀ պաշտոնյաների կողմից արված հայտարարություններին եւ գործողություններին, որոնք ուղղված են Սուրբ Եկեղեցու դերի վարկաբեկմանն ու թուլացմանը մեր ազգային կյանքում։ Նման հարձակումները վիրավորում են ոչ միայն եկեղեցական ինստիտուտը, այլեւ միլիոնավոր հավատացյալներին՝ Հայաստանում եւ սփյուռքում, որոնց համար Եկեղեցին հանդիսանում է հավատքի, համախմբման եւ պատմական հիշողության աղբյուր։

Մենք վերահաստատում ենք, որ ժողովրդավարական Հանրապետությունում հիմնարար ինստիտուտների հանդեպ հարգանքը պետք է լինի փոխադարձ։ Եկեղեցու եւ պետության բաժանումը երաշխավորում է ինքնավարություն, այլ ոչ թե թշնամություն։ Եկեղեցին երբեւէ չի ձգտել եւ չի ձգտում միջամտել կառավարության գործերին, սակայն իրեն վերապահում է իրավունք ու պարտավորություն՝ բարձրաձայնելու անարդարության դեմ եւ պաշտպանելու հայ ժողովրդի բարոյական ու հոգեւոր արժեքները։

Մենք կոչ ենք անում Հայաստանի պետական ներկայացուցիչներին՝ վերաիմաստավորելու իրենց գործողությունները, առաջնորդվելու հարգալից երկխոսությամբ եւ ճանաչելու այն անուրանալի ծառայությունը, որը Հայ Առաքելական Եկեղեցին մատուցել է եւ շարունակում է մատուցել մեր ազգին։ Ներքին ապալեգիտիմացումը միայն թուլացնում է Հայաստանը՝ դիմակայելու արտաքին մարտահրավերներին թե՛ տարածաշրջանում, թե՛ միջազգային ասպարեզում։

Հայ ժողովրդի միասնությունը՝ թե՛ երկրի ներսում, թե՛ նրա սահմաններից դուրս, պահանջում է հարգանք, փոխհասկացողություն եւ ամուր կամք՝ կառուցելու, այլ ոչ թե քանդելու։ Հավատը, պատմությունը եւ ինքնությունը չպետք է եւ չեն կարող դառնալ քաղաքական կամ քողարկված հակամարտության առարկա։

Կոչ ենք անում բոլոր բարի կամքի հայերին՝ հանգիստ, բայց վճռականորեն պաշտպանել մեր Եկեղեցին, որը խորհրդանիշն է հույսի, շարունակականության եւ դիմակայության ողջ աշխարհի հայ ժողովրդի համար», - ասված է հայտարարության մեջ։

Այս թեմայով Ո՞վ է Մայր տաճարի մուտքի խոյակին մագլցած Վրեժ Դուրգարյանը, որը կոչ էր անում գրոհել եկեղեցին Դեկտեմբերի 28-ին Նիկոլ Փաշինյանն անձամբ կգրոհի Մայր Աթոռը Հայ հոգևորականությունը սխրանքի ու ազգի իրական ընտրանու օրինակ է ցուցադրում Աշխարհում գոյություն ունեցող բոլոր եկեղեցիները մշտապես համագործակցել են հատուկ ծառայությունների հետ. Բարենց Քացով Էջմիածնի Մայր տաճարի դուռը խփողներն ու՞ր են, ինչու՞ ձերբակալված չեն. Մարուքյան