Շենգավիթի նախկին թաղապետի հայրը որդու կալանավորման մասին բացառիկ մանրամասներ է ներկայացնում

Շենգավիթի թաղապետ Ռազմիկ Մկրտչյանը հրաժարականի դիմում ներկայացնելուց հետո՝ կալանավորվել է: Ըստ շրջանառվող լուրերի, նա Շենգավիթի ՔՊ տարածքային կառավարման խորհրդի նախագահ Տիգրան Մակարյանին ծեծի է ենթարկել եւ նրա ազատությունը սահմանափակել, որն էլ պատճառ է հանդիսացել նրա երկու ամսով կալանավորվելուն: Ի՞նչ է իրականում կատարվում, «Իրավունք»-ը տեղի ունեցածի մասին զրուցել է Ռազմկ Մկրտչյանի հոր՝ իրավապաշտպան ՍԱՄՎԵԼ ՄԿՐՏՉՅԱՆԻ հետ:

«ՏԻԳՐԱՆ ԿՈՉԵՑՅԱԼԸ ԱՅԴ ԱՄԵՆԸ ՁԱՅՆԱԳՐԵԼ ԵՎ ՆԿԱՐԱՀԱՆԵԼ Է»

— Ինչպե՞ս կմեկնաբանեք Ձեր որդու՝ Ռազմկ Մկրտչյանի կալանավորումը:

— Այս հարցն այժմ գտնվում է իրավաբանների տիրույթում, սակայն ես ներքին համոզմունք ունեմ, որ այն ինչ գրված է եւ ներկայացված է, չի համապատասխանում իրականությանը: Քննությունը մնացածը կպարզի: Սա պատճառ չի հանդիսանում, որ մենք այսօր բոլորին մեղավոր ճանաչենք ու մեզ արդարացնենք: Կա մի իրականություն՝ բան է եղել եւ հիմա գործընթացները գնում են:

— Ըստ լուրերի, Ձեր տղան հարվածել է Տիգրան Մակարյանին եւ պահել անազատության մեջ: Դրան ի՞նչ կասեք:

— Ես այդքան էլ իրազեկված չեմ, դա փասատտաբանների հարցն է: Գործի քննությունը վարում է քննչական մարմինը, եւ ես տեղյակ չեմ, թե ինչ է եղել: Բայց մի մեծ դրական եւ շատ լավ բան կա. նույն այդ Տիգրան կոչեցյալը այդ ամենը ձայնագրել եւ նկարահանել է: Այդ նկարահանվածն արդեն իրավաբանների մոտ է: Ինչ կատարվել է, մենք վստահաբար ասում ենք, որ կա բարոյական կողմ՝ մարդուն հասցնելու մի կետի: Սա մեզ համար պատճառ չի կարող հանդիսանալ, որ մենք դուրս գանք եւ հրապարակավ ավելորդ բաներ դուրս տանք:

«ԻՄ ՈՐԴԻՆ ԷԼ, ՀՈ 100 ՏԱՐԻ ՉԷՐ ՄՆԱԼՈՒ ԹԱՂԱՊԵՏ»

— Ասում են՝ ՔՊ-ն դուրս է եկել Ռազմիկ Մկրտչյանի դեմ…

— Ես չեմ կարող նման արտահայտություն անել: Անկախ ամեն ինչից իմ որդին այդ թիմում էր, եւ նա իր թիմին մինչեւ վերջ պահել գիտի ու վստահ եմ՝ պահելու է մինչեւ վերջ: Իսկ եթե կան մարդիկ, որոնք նման ձեւակերպում են անում, դա իրենց խնդիրն է, մերը չէ: Ես ՔՊ-ի անդամ չեմ եւ լինելով հասարակական գործիչ, իրավապաշտպան, այդ ամենն ավելի առողջ եմ դատում, եւ իմ գիտելիքներն ինձ թույլ չեն տալիս իջնել շրիշակից ցածր մակարդակի եւ նման արտահայտություններ անել, ինչպես ոմանք: Այսօր ամեն երկրորդը, որ մեզ փողոցում հանդիպում է, ասում է՝ տես, հերթը ձեզ հասավ, որ դուք այդքան նվիրված էիք իշխանությանը… Մենք շարունակելու ենք մնալ նվիրված պետությանը, որովհետեւ ցանկացած իշխանություն գալու է եւ գնա, եւ որպես պաշտոնատար անձ, իմ որդին էլ, հո 100 տարի չէր մնալու թաղապետ, իսկ պետությունը մնայուն է: Հիմա փորձում են այլ կոնտեքստում սա դիտարկել, ես լուրջ չեմ ընդունում: Կան տեսախցիկներ, որտեղ ֆիքսվել է՝ ով որտեղ է եղել, քանի րոպեյում ուր է հասել ու այդ ամենն այժմ գտնվում է իրավաբանների ձեռքում: Սա շատ արագ կհանգուցալուծվի: Մենք բողոքարկում ենք կալանավորումը:

— Որպես իրավապաշտպան՝ ի՞նչ կասեք այն  մասին, որ մարդուն հարվածելու համար երկու ամսով  կալանավորում են, գուցե կան այլ, ավելի ծա՞նր պատճառներ:

— Գիտեք, իմ մոտ տպավորություն է, որ իրենց թիմը փորձում է առավելագունը ճշմարտությունը բացահայտել:

— Իրենց թիմ ասելով ո՞ւմ նկատի ունեք, Ռազմիկի՞ թիմը, Մակարյանի՞ թիմը, ի՞նչ թիմի մասին է խոսքը:

— Նույն կուսակցությունից են նրանք երկուսն էլ, ես նկատի ունեմ իրենց կուսակցությունը ցանկանում է առավելագույնը հասկանալ տեղի ունեցածը: Ինչ վերաբերում է Ձեր հարցին՝ ասեմ՝ այո, իրավացի եք, մենք 2 ապտակի համար, մարդուն կալանավորել վերջին 15 տարում չենք տեսել:

«ՌԱԶՄԻԿԸ ՉԻ ԵՂԵԼ ՈՐԵՎԷ ԿՈՂՏՈՏ ՍԽԵՄԱՆԵՐԻ ՄԵՋ»

— Այսինքն՝ կարո՞ղ ենք ենթադրել, որ այլ իրադարձություններ են տեղի ունեցել, թե՞ սա հետապնդում է Ռազմիկի նկատմամբ:

— Չէ, այլ իրադարձություններ չի եղել: Բացառում եմ նման բաները: Ես այդքանով եմ իրազեկված, որքանով ընդհանոր խոսակցություններն են, գործի մանրամասներին չեմ տիրապետում: Բայց կասեմ՝ այլ բան լինել չի կարող, այնտեղ ինչ կա՝ կա: Դա է ճշմարտությունը: Ասեմ, որ սա մեր ընտանիքի ավանդույթն է, մենք ամեն բանին տղայական դիմադրելու ենք, պայքարելու եւ ապացուցելու ենք եւ ամեն մի չխկոցից չենք գնալու ու հայտարարություն անելու: Իրականում, ես շատ ուրախ եմ, որ այդ Տիգրանը նախապես պլանավորել էր, թե ինչպես Ռազմիկին ձայնագրի: Դա հօգուտ մեզ է՝ «ռակաշետով», հպանցիկ գալիս եւ մեր շահեկան վիճակն է ստանում, որովհետեւ ես իմ որդուն շատ լավ եմ ճանաչում:

— Այս պահին Ռազմիկ Մկրտչյանը որտե՞ղ է գտնվում:

— Հիմա տղաս ժամանակավոր մեկուսարանում է: Մենք բողոքարկել ենք եւ վերանայման հարց ենք դրել: Նաեւ պատասխանատվություն ենք վերցնում մեզ վրա, որ Ռազմիկը որեւէ կերպ չի խոչընդոտի իրավաբանների գործունեությանը: Ռազմիկին եթե մեկ անգամ զանգեն, նա կգնա, կներկայան: Ես հպարտանում եմ, որ ունեմ Ռազմիկ Մկրտչյանի նման որդի, առհասարակ իմ զավաներով եմ հպարտանում՝ ե՛ւ դաստիարակությամբ, ե՛ւ որպես հայ տղանարդ տեսակով: Նա 7 տարի եղել է Շենգավիթի թաղապետ եւ հասարակության աչքերում ունեցել է բարձր գնահատական: Չի եղել որեւէ կողտոտ սխեմաների մեջ, ինչպես տեսնում ենք, որ ոմանք կան: Եվ իր տղայական վարքագիծը իմ համար ընդունելի է: Երբ ես մեկնեցի 44 օրյա պատերազմի, Ռազմիկն անմիջապես իմ հետեւից եկավ, չնստեց տանը: Մեր համար պետությունը առաջնային է, դա մեր ընտանիքի ավանդույթն է:

ՆԱՆԱ ՍԱՐԳՍՅԱՆ

Այս թեմայով Շուտով կիմանաք, ով եմ ես եւ ինչ եմ ինձնից ներկայացնում. Վահագն Մկրտչյան Բեմը լողավազանում, տոմսերը` սառույցի մեջ. ամառվա վերջին շաբաթը թեժ էր Եթե ո՛չ ԲԴԽ-ն, ո՛չ ԱԱԾ-ն, ապա ո՞վ է Փաշինյանին «հուշում» «Մեծ հավատաքննիչի» կերպարով հանդես գալը ոչ թե ուժի, այլ խորքային տագնապի դրսեվորում է․ Հայր Վաչե Մենք Սոսի հետ վաղուց խոսացել ենք ու որևէ խնդիր իրար հետ չունենք. Մհեր Մկրտչյան