Թուրքիայում միլիոնատերերի թիվը գերազանցել է 2.3 միլիոնը

Թուրքիայում 1 միլիոն լիրայից ավելի բանկային ավանդ ունեցող անձանց թիվը մեկ տարվա ընթացքում աճել է շուրջ 49 տոկոսով՝ անցնելով 2.3 միլիոնը։ Միևնույն ժամանակ, երկրում բանկային ընդհանուր ավանդները հասել են 17 տրիլիոն լիրայի։ Այս մասին տեղեկացնում է ermenihaber.am-ը։

Թուրքիայի բանկային վերահսկողության և կարգավորման մարմնի տվյալներով՝ 2025 թ․ ապրիլին 2 միլիոն 377 հազար անձ բանկում ունի առնվազն 1 միլիոն լիրա։ Մեկ տարի առաջ այդ թիվը 1.59 միլիոն էր։ Միլիոնատերերի ավանդների գումարն ավելացել է 11.8 տրիլիոնից՝ մինչև 16.99 տրիլիոն լիրա՝ մեկ տարում գրանցելով մոտ 44% աճ։

Ավանդների մեծ մասը կենտրոնացած է ներքին շուկայի վրա․ ավելի քան 15 տրիլիոն լիրան բաժին է ընկնում Թուրքիայում բնակվող միլիոնատերերին։ Դրանցից ավելի քան 10 տրիլիոն լիրան՝ թուրքական լիրայով, 4.4 տրիլիոնը՝ արտարժույթով, իսկ մոտ 1.2 տրիլիոնը՝ թանկարժեք մետաղներով։

Միևնույն ժամանակ, արտերկրում բնակվող միլիոնատերերի թիվը հասել է 200 հազարի։ Նրանց ընդհանուր ավանդները կազմել են մոտ 391 միլիարդ լիրա։

Ըստ հրապարակված տվյալների՝ Թուրքիայի բանկային համակարգում գտնվող ողջ ավանդների շուրջ 78%-ը պատկանում է ընդամենը 2.1 միլիոն անձի, մինչդեռ 10 հազար լիրայից պակաս ավանդ ունեցող հաշիվների թիվը գերազանցում է 163 միլիոնը։ Սա վկայում է հարստության ծայրաստիճան կենտրոնացման և ֆինանսական անհավասարության խորացման մասին։

2020-ին միլիոնատերերը կազմում էին ավանդների շուրջ 55%-ը, իսկ 2025-ին՝ արդեն գրեթե 78%-ը։ Նույն ընթացքում ցածր եկամուտ ունեցող խնայողների բաժինը նվազել է մինչև 0.7%։

Թուրքիայի կենտրոնական բանկի տվյալները ևս հաստատում են խնայողությունների աճն առավելապես վերին եկամուտ ունեցող խմբերում, ինչը մատնանշում է երկրում սոցիալ-տնտեսական բևեռացման խորացումը։

Այս թեմայով Թուրքական ավիաընկերությունները չեղարկել են դեպի Իրան չվերթները. վերադարձվել է ավելի քան 50.000 տոմս Կրակոցներ Թուրքիայի դպրոցներից մեկի բակում. ուսուցիչ է մահացել Թուրքիան ունի ուժեղ մրցակից՝ ի դեմս Հայաստանի Հունաստանը պատրաստ է ցանկացած սցենարի Թուրքիայի հետ Պոլսո Հայոց պատրիարքը աղոթել է Հայաստան-Թուրքիա հարաբերությունների վերականգնման համար