Պայթեց հերթական միֆը. որքան հարկ է վճարել եկեղեցին պետությանն այս տարվա առաջին եռամսյակում

Վերջին օրերին Եկեղեցու հասցեին իշխանության կազմակերպված քննադատությունները բազմազան բնույթի էին՝ սկսած քաղաքական ու անձնական մեղադրանքներից մինչեւ ֆինանսատնտեսական կարգավիճակի վերանայման առաջարկներ։ Մասնավորապես, մերձիշխանական գրպանային փորձագետների ու որոշ վայ քաղաքական գործիչների կողմից շրջանառվում են կարծիքներ, թե Եկեղեցին պետք է ընդգրկվի հարկային դաշտում՝ դրանով իբրեւ հաթաթա են տալիս:

«Իրավունք»-ի ուսումնասիրությունը ցույց տվեց, որ ըստ Պետեկամուտների կոմիտեի հրապարակած 2025թ. առաջին եռամսյակի տվյալների, Հայ առաքելական եկեղեցին ոչ միայն հարկեր վճարում է, այլեւ հազար խոշոր հարկ վճարողների շարքում է: Եթե նախորդ տարի՝ 2024թ.–ի առաջին եռամսյակի տվյալներով եկեղեցին 488-րդն էր 1000 հարկ վճարողների ցանկում, ապա այս տարի՝ 481-րդ տեղում է եւ արդեն վճարել է շուրջ 166 միլիոն 627 հազար դրամ:

Եկեղեցին Հայաստանում, ինչպես եւ այլ երկրներում ազատված է որոշակի հարկատեսակներից իր կրթական, սոցիալական եւ բարեսիրական գործունեության բնույթից ելնելով, ինչը նաեւ սահմանված է եկեղեցի-պետություն հարաբերությունները կարգավորող օրենքով: Բայց կրկնում ենք՝ խոշոր հարկատուների շարքում է, եկամտահարկ անխտիր գանձնվում է եկեղեցական կառույցներում ծառայող աշխատավարձ ստացող բոլոր եկեղեցականներից եւ աշխարհականներից:

Ինչեւէ, քանի թեման բացվել է, հիշեցնենք. ժամանակին եկեղեցապատկան գույքի զգալի հատվածը, այդ թվում՝ Մատենադարանի գրեթե բոլոր ձեռագիր նմուշները, բոլշեւիկյան հեղափոխության հետեւանքով, այսպես ասած, ազգայնացվել, դարձել է պետական սեփականություն եւ տնօրինվում է առ այսօր: Տասնյակ տարիներ այդ գույքը ոչ միայն չի վերադարձվել Եկեղեցուն, այլեւ առավելապես ոչնչացվել է՝ պատճառելով անդառնալի նյութական ու բարոյական կորուստներ, անգամ փաշինյանական բառապաշարով ասած՝  բազմաթիվ վանքեր չուլանացվել են՝ վերածվելով անասնագոմերի կամ մարագների:

ՀՀ արդարադատության նախկին նախարար, իրավագիտության դոկտոր, պրոֆեսոր Գեւորգ Դանիելյանը դեռ տարիներ առաջ նշել է այս մասին եւ ընդգծել. «Եթե շատ եք ուզում հարկեր գանձել Եկեղեցուց, նախ, լիարժեք փոխհատուցեք վնասները, բայց նկատի ունեցեք, որ հարկերը կկազմեն դրա մի չնչին մասը»: 

ՀՐԱՆՏ ՍԱՐԱՖՅԱՆ

Այս թեմայով Փաշինյանը Նորավանքում մասնակցել է սուրբ և անմահ պատարագի. տեսանյութ Արագածոտնի թեմը դատապարտել է Սուրբ Գևորգ եկեղեցում կարգալույծ հոգևորականի մատուցած կեղծ պատարագը Երևանում 3 անչափահաս տղաների ծայրահեղ ծանր վիճակում երեկ տեղափոխել են հիվանդանոց Աթոռ շպրտողի և ջուր լցնողի նկատմամբ քրեական հետապնդում չիրականացնող դատախազին պետք է շքանշան տալ․ Փաստաբան Կիրակի՝ Սուրբ Խաչի Գյուտի տոնին Պատարագներ կմատուցվեն