Մենք կոչ ենք անում իշխող կուսակցությանը մնալ կոռեկտության սահմանների մեջ. Ռումինյաի Հայոց Թեմ

Ռումանիոյ հայոց թեմի հոգևորականաց դասի, Թեմական Պատգամավորական ժողովի և Թեմական Խորհրդի անունից խստորեն դատապարտում ենք ՀՀ վարչապետի, իր տիկնոջ և ընդհանրապես իշխող կուսակցության կողմից Հայ Եկեղեցու և եկեղեցականաց հանդեպ հնչեցրած մեղադրանքներն ու վիրավորանքները։ Դրանք սովորական քաղաքական հայտարարություններ չէին, այլ ուղղորդված, ծրագրված և խստորեն դատապարտելի արշավ և պատերազմ ընդդեմ Հայ Եկեղեցու և հայ հավատացյալ քրիստոնյայի ի Հայաստան և ի Սփյուռս։

Անշուշտ մենք հասկանում ենք, որ իշխանությունների նման պահվածքի հիմնական պատճառը Հայ Եկեղեցու դիրքորոշումն ու առողջ քննադատությունն է նրանց հասցեին՝ կապված Արցախի կորստի և հայաթափման, արցախահայության իրավունքների, ադրբեջանական բանտերում պահվող հայ ռազմագերիների Հայրենիք վերադարձի, ազգային արժեքների ոտնահարման, վերջին տարիներին վարվող ներքին ու արտաքին անհեռատես ու վտանգներով լի քաղաքականության հետ, որը չի բխում մեր ազգային շահերից։ Ի վերջո հատկապես Շվեյցարիայում Վեհափառ Հայրապետի հնչեցրած ձևակերպումները Արցախի և արցախահայության ապագայի վերաբերյալ իշխող ուժին դրդեցին անհավասարակշիռ քայլերի։

Եկեղեցուն տրված անհարիր որակումներն ու անպարկեշտ արտահայտությունները վիրավորանք են ոչ միայն մեր հոգևոր ժառանգության, այլև յուրաքանչյուր քրիստոնյա հայի արժանապատվության հանդեպ։ Մենք՝ իբրև Հայ Առաքելական Սուրբ Եկեղեցու սպասավորներ և զավակներ, ապրելով ու ծառայելով Սփյուռքում, բայց կապված մնալով մեր հայրենի հողին և ազգային արժեքներին, մեկ պարզ ճշմարտություն ենք ցանկանում հիշեցնել. «Եթե մեկը ապականի Աստծո տաճարը, նրան էլ Աստված պիտի ապականի, որովհետև Աստծո տաճարը սուրբ է, որ դուք եք» (Ա Կորնթացիներ 3:17):

Հայ Եկեղեցին Հայաստանում և Սփյուռքում մշտապես եղել է և շարունակում է մնալ մեր ազգի ինքնության, դիմադրության, կրթության և հոգևոր լուսավորության սյունը, հույսի այն ճրագը, որ մեզ պահել է Ավարայրում, Սարդարապատում և Արցախյան պատերազմներում։ Ոչ մի անցողիկ իշխանություն ի զորու չէ այդ ճրագը մարելու։ Երբ հալածանքի, բռնության և տարատեսակ ասպատակությունների ու բռնաճնշումների ժամանակ Հայ Եկեղեցին կենաց ու մահու կռիվ տալով պահում էր իր հավատքն ու ինքնությունը, ազգային դիմագիծը, այսօրվա իշխանությունները դեռ պատմության էջում չկային իրենց ,,նորաձև կրթությամբ,, հանդերձ։

Եսայի մարգարեի խոսքով ,,Վա՜յ նրանց, որ չարին ասում են բարի, և բարիին՝ չար, որ խավարը շինում են լույս, և լույսը՝ խավար,, (Եսայի 5:20)։ Այն ազգը, որ լռում է իր սրբությունների պղծման պահին, դատապարտում է ինքն իրեն ապագա չունենալու։ Այժմ լռելը նշանակում է մեղքի բաժնեկից դառնալ։ Մենք կոչ ենք անում մեր հայրենակիցներին և համայն հայությանը ի Հայաստան և ի Սփյուռս աշխարհի չլռել, չվախենալ, պաշտպանել մեր հավատքը, սրբությունները և մեր Մայր Եկեղեցին։

Մենք կոչ ենք անում իշխող կուսակցությանը մնալ կոռեկտության սահմանների մեջ, չպառակտել հասարակությանը, հարգել ՀՀ բնակչության ճնշող մեծամասնության և սփյուռքահայության հոգևոր զգացմունքները և հիշել, որ Հայ Եկեղեցին ոչ միայն հավատքի կենտրոն է, այլ նաև մեր ազգային հոգևոր ինքնության առանցքը։ Այն չի տապալվի խոսքով, ինչպես տապալվեցին ու կործանվեցին բոլոր նրանք, որոնք պատմության տարբեր դարաշրջաններում խոսեցին ու ելան նրա դեմ։

Մեր պահանջն է, որպեսզի ՀՀ իշխանությունները պաշտոնապես և ամենաբարձր մակարդակով ներողություն խնդրեն Մայր Աթոռ Սուրբ Էջմիածնից, Հայ Եկեղեցու եպիսկոպոսաց ու հոգևորականաց դասից։

Թող Աստված օրհնի ու պահպանի մեր հայրենիքն ու մեր ազգի զավակներին Հայաստանում և Սփյուռքում՝ առաջնորդելով ճշմարտության ու արդարության ճանապարհներով։

Հոգևորականաց դաս

Թեմական Պատգամավորական Ժողով

Թեմական Խորհուրդ

Այս թեմայով Հայաստանի ազգային հավաքականի մեկնարկային կազմը` Կոսովոյի դեմ խաղում Մոսկվան «միացնում» է ԱՊՀ ուղղությամբ նոր քաղաքական կուրսը Լեհաստանում հայտարարել են՝ մերժում են Ուկրաինայի նկատմամբ «բարի կամքի» դրսևորումները Հայերը մեծ ներդրում են ունեցել ֆաշիզմի դեմ հաղթանակի գործում․ վետերան (տեսանյութ) Կգա մի օր, երբ Ամենայն Հայոց Կաթողիկոս կդառնա քպ-ական մեկը. Մհեր Մկրտչյան