Սադրանքն անպատասխան չէր կարող մնալ. բացառիկ մանրամասներ՝ Մոսկվայում տեղի ունեցած միջադեպից

Հայաստանի Հանրապետական կուսակցության պատվիրակությունը մասնակցում է Մոսկվայում այս օրերին անցկացվող ՌԴ-ում իշխող «Միասնական Ռուսաստան» կուսակցության նախաձեռնած Մեծ հաղթանակի 80-ամյակին նվիրված միջազգային համաժողովին: Երեկ միջադեպ է տեղի ունեցել ԱԺ էքս փոխնախագահ, ՀՀԿ ԳՄ անդամ Էդուարդ Շարմազանովի ելույթի ժամանակ: Նա իր խոսքում ստիպված է եղել կանխել ադրբեջանական պատվիրակության սադրանքները: Այս մասին «Իրավունք»-ը բացառիկ մանրամասներ է պարզել ԱԺ «Պատիվ ունեմ» խմբակցության քարտուղար, ՀՀԿ ԳՄ անդամ ՏԻԳՐԱՆ ԱԲՐԱՀԱՄՅԱՆԻՑ:

— Նախ նշեմ, որ համաժողովին մասնակցում էին մի քանի տասնյակ երկրների կուսակցություններից պատվիրակներ: Ըստ էության, միջոցառումն իր տրամաբանությամբ էր ընթանում՝ մինչեւ այն պահը, երբ ելույթով հանդես եկավ ադրբեջանական բանախոսը՝ փորձելով թեմայի մեջ «սղացնել» 44-օրյա պատերազմի հետ կապված մի քանի դրվագ, այսպես կոչված, ադրբեջանական տարածքային ամբողջականության վերականգնման մասին: Միջոցառման ժամանակ նախատեսված էր նաեւ մեր պատվիրակության ներկայացուցիչ ՀՀԿ Գործադիր մարմնի անդամ Էդուարդ Շարմազանովի զեկույցը, որն իր ելույթը նախապատրաստել էր Հայրենական մեծ պատերազմում հայ ժողովրդի, Հայ Առաքելական եկեղեցու եւ աշխարհասփյուռ հայության մեծ մասնակցության վերաբերյալ, բայց, բնականաբար, նա չէր կարող չարձագանքել այս սադրանքին եւ իր ելույթի մի մասը տրամադրեց ադրբեջանական կեղտոտ, կեղծ ձեւակերպումների ոչ միայն հերքմանը, այլ սիմպոզիումի մասնակիցներին իրականության ներկայացմանը: Մասնավորապես՝ նա մատնանշեց այն ագրեսիայի մասին, որն Ադրբեջանը նախաձեռնեց Արցախի Հանրապետության դեմ, այսինքն՝ ուժի կիրառում, շրջափակում, հազարավոր զոհեր, միջազգային իրավունքի տեսանկյունից խախտումներ եւ այլն: Ադրբեջանական պատվիրակությունը փորձում էր տեղից արձագանքել, իր անհամաձայնությունը հայտնել, բայց դա, իհարկե, Շարմազանովին որեւէ ձեւով չխոչընդոտեց: Նա ասաց այն, ինչն իրականություն էր: Բոլոր միջազգային պատվիրակները տեղեկացան ադրբեջանական այն հանցագործությունների մասին, որոնք տեղի են ունեցել Արցախի դեմ:

Ասեմ, որ դրանից բացի, նախատեսված էր նաեւ մեր մյուս գործընկերոջ՝ Իվետա Տոնոյանի ելույթը, եւ նա ստիպված եղավ, բացի Մեծ հաղթանակի 80-ամյակին վերաբերող թեմայից, արձագանքել ադրբեջանական պատվիրակության ճշմարտությունն ակնհայտորեն խեղաթյուրող հայտարարություններին: Նույնիսկ այն պարագայում, որ անընդհատ դահլիճից փորձեր էին արվում դադարեցնել ելույթը, նա մինչեւ վերջ շարունակեց իր ասելիքը հնչեցնել:

— Պարոն Աբրահամյան, իսկ ելույթներից հետո՝ այն, ինչ տեսախցիկներից այն կողմ էր, որեւէ շարունակություն ունեցե՞լ է միջադեպը: Ինչպե՞ս արձագանքեցին ներկաներն ու կազմակերպիչները:

— Միջոցառման ավարտից հետո ադրբեջանական պատվիրակության հետ որեւէ այլ բան չեղավ: Մենք հանդիպեցինք միջոցառման նախաձեռնողների հետ, ներկայացրինք իրողությունը, որը, ըստ էության, շատ հստակ էր՝ Ադրբեջանի պատվիրակությունը, լավ իմանալով մեր մասնակցային ներկայությունը, փորձում էր թեմայից շեղվել եւ ձեւակերպումներ հնչեցնել Հայաստանի եւ Արցախի դեմ, ինչն անպատասխան չէր կարող մնալ: Նրանք գնացին սադրանքի, ինչը նաեւ կազմակեևրպիչների եւ ներկաների համար շատ ակնհայտ էր:

Ի դեպ, ասեմ, որ ադրբեջանական պատվիրակությունը սկզբնական շրջանում երկու հոգով էր ներկայացված: Երբ ադրբեջանական պատվիրակի ելույթից հետո նկատելի էր, որ հայկական կողմը արձագանքելու է, նրանք մի պահ դահլիճից նույնիսկ դուրս եկան, զանգերի մեջ էին, հետո արդեն պարզ դարձավ, թե ինչու: Ավելի ուշ միջոցառմանը ներկայացավ Մոսկվայում Ադրբեջանի դեսպանատան խորհրդականը: Ամեն դեպքում, նա այդպես ներկայացավ: Վերջինս փորձում էր թեման իր վրա վերցնել, քանի որ պատկերացնում էին արդեն, որ պետք է արձագանք լինի: Նա ցանկանում էր խոսք ստանալ կամ որեւէ ձեւով ընդհատեր մեր ելույթները, ինչն ակնահայտորեն չստացվեց:

ՀՐԱՆՏ ՍԱՐԱՖՅԱՆ

Այս թեմայով Շրջանառության մեջ է դրվել Հայրենական պատերազմի հաղթանակի 80-ամյակի վերաբերյալ հայտարարության նախագիծ, Ադրբեջանի գործողությունները՝ Խնածախի ու Խոզնավարի ուղղությամբ, գնալով թիրախային են դառնում․ Տիգրան Աբրահամյան Մարգարիտա Սիմոնյանը պատւմել է, որ շփվում է կոմայի մեջ գտնվող Տիգրան Քեոսայանի հետ Տիգրան Ավինյանի հոր անունո՞վ են սակուրայի տնկիները ներկրվել Հայաստան. քաղաքապետը չցանկացավ մեկնաբանել հայեցի չեք, հայակենտրոն չեք: Թշնամի եք. Տիգրան Վարդանյան