«ԵՐԿՈՒ ՓՈՒԼՈՒՄ ԷԼ ՈՍԿԵ ՄԵԴԱԼ ԵՄ ՆՎԱՃԵԼ». ԱՇԽԱՐՀԻ ՈՒ ԵՎՐՈՊԱՅԻ ՉԵՄՊԻՈՆ ՀԱՄԼԵՏ ՄԱՆՈՒԿՅԱՆ

Օրերս Քաթարի մայրաքաղաք Դոհայում կայացած սպորտային մարմնամարզության Աշխարհի գավաթի խաղարկության 5-րդ փուլում Երիտասարդների Աշխարհի ու Եվրոպայի չեմպիոն, միջազգային կարգի սպորտի վարպետ Համլետ Մանուկյանը նվաճել է երկրորդ ոսկե մեդալը։ Նա հավասարը չունեցավ նժույգթափեր վարժությունում։ Եզրափակչում երիտասարդ մարմնամարզիկը վաստակեց 14.700 միավոր։ Որակավորման փուլում Մանուկյանը հավաքել էր 14.400 միավոր։ Համլետը ոսկե մեդալ էր նվաճել նաև Խորվաթիայում կայացած Աշխարհի գավաթի խաղարկության 4-րդ փուլում։ Նժույգթափեր վարժության եզրափակչում մեր երկրի երկրորդ ներկայացուցիչ Մամիկոն Խաչատրյանը 13.166 միավորով 7-րդն է։

Iravunk. com -ի մարզական թղթակիցը կապ է հաստատել ու զրուցել ՀԱՄԼԵՏ ՄԱՆՈՒԿՅԱՆԻ հետ։

- Շնորհավորում ենք, Համլետ, ոսկե մեդալներ նվաճելու առթիվ։ Սա քո նորամուտն էր մեծահասակների կազմ։ Հետաքրքիր է, թե ինչպիսի զգացողություններ առաջացան։ - Շատ շնորհակալ եմ։ Շատ լավ զգացողություններ ունեմ, ուրախ եմ, որ կարողացա հաղթել։ Երկար էինք պատրաստվել այս մրցումներին։ Լավ ստացվեց։ Իսկապես անչափ ուրախ եմ, քանի որ երկու փուլերում էլ ոսկե մեդալ եմ նվաճել։ Հաղթանակներս նվիրում եմ իմ հայ ազգին, քանի որ վաղը ապրիլի 24-ն է, նվիրում եմ նաև 1915 թվականի Եղեռնի անմեղ զոհերի պայծառ հիշատակին։ Նշեմ, որ մեծահասակների կազմում մրցակցությունը բավականին ուժեղ է ընթանում։ Օլիմպիական մեդալակիրների, Աշխարհի չեմպիոնների հետ ես պայքարում, հարկավոր է ավելի զգոն և ուշադիր լինել վարժությունը կատարելիս։ Փառք Աստծո, կարողացա հավաքվել ու եզրափակչում կատարել վարժությունս։ Անկեղծ ասած, կար լարվածություն, սակայն ես հաղթահարեցի։ Փորձեցի կենտրոնանալ, որ պայքարում եմ մեծահասակների կազմում։ Կարևոր էր, որ լավ կատարեմ վարժությունս, այդ դեպքում էական նշանակություն չունի մեծահասակների, թե երիտասարդների կազմում եմ։ Միակ տարբերությունը այն է, որ այստեղ արդեն շատ ուժեղ հակառակորդներ են։

- Համլետ, արդյոք սպասում էիր, որ ոսկե մեդալներ կնվաճես։

- Յուրաքանչյուր մրցմանը սպասում եմ, որ պիտի ոսկե մեդալով վերադառնամ հայրենիք։Ամեն բան կախված է նրանից, թե ինչպես կստացվի վարժությունս։ Սպասում էի, որ կհաղթեմ։ Այս արդյունքները մարզիչներիս հսկայական աշխատանքի պտուղներն են, առանց նրանց տքնաջան աշխատանքի անհնար է հասնել հաղթանակի, նրանց շնորհիվ եմ նվաճել։ Առաջինը անձնական մարզչիս Հայկ Նազարյանի հետ եմ խոսել։ Արդեն Եգիպտոս ենք մեկնել Աշխարհի գավաթի խաղարկության վերջին 6֊րդ փուլին մասնակցելու։ Եվրոպայի առաջնությանը ևս պիտի պատրաստվենք, որի ժամանակ շատ ավելի դժվար է լինելու, մրցակցությունը շատ թեժ կլինի։

- Շնորհակալություն, Համլետ, մեզ ժամանակ տրամադրելու համար, սպասենք արդեն հաջորդ հաղթանակներիդ։

- Շատ զգացված եմ ուշադրության համար, անխափան գործունեություն Ձեր թերթին։ Իսկ ահա Համլետի անձնական մարզիչը

ՀԱՅԿ ՆԱԶԱՐՅԱՆԸ, Iravunk. com -ի մարզական թղթակցի հետ զրույցում այսպես բնութագրեց իր սանին. «Համլետը շատ աշխատասեր, նպատակասլաց մարզիկ է, նա Աշխարհի գավաթի երկու փուլերում էլ փայլուն հանդես եկավ ու ոսկե մեդալներ նվաճեց, կանգնելով պատվո հարթակի ամենավերին աստիճանին։ Առջևում Եգիպտոսում կայանալիք վերջին փուլն է։ Ես շատ գոհ եմ Համլետից, նրան շատ մեծ ապագա է սպասվում»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Եվրոպայի առաջնությունում այսօր ռինգ դուրս կգա Հայաստանի երեք ներկայացուցիչ Սիրո անունը Հայաստան է․ Սպարտայի ջերմ գրառումը Արարատ-Արմենիայի հետ խաղից հետո Բռնցքմարտի ԵԱ-ում այսօր Հայաստանն ունի 5 բռնցքամարտիկ ԲՌՆՑՔԱՄԱՐՏԻ ԵԱ. ՀԱՅԱՍՏԱՆՆ ՈՒՆԻ 4 ՆԵՐԿԱՅԱՑՈՒՑԻՉ ՀԱՅ ԲՌՆՑՔԱՄԱՐՏԻԿՆԵՐԸ ՄԵԿՆԵՑԻՆ ԲՈՒԼՂԱՐԻԱ ՄԱՍՆԱԿՑԵԼՈՒ ԵՎՐՈՊԱՅԻ ԱՌԱՋՆՈՒԹՅԱՆԸ։