«Առնո Բաբաջանյան» համերգասրահում ապրիլին սպասվում են մեկը մյուսից ինքնատիպ միջոցառումներ

Ինչպես միշտ, «Առնո Բաբաջանյան» համերգասրահը չի դադարում զարմացնել իր հանդիսատեսին բարձրաճաշակ ու նորաոճ նախագծերով։ Ապրիլ ամսվա ընթացքում բազմաթիվ են հետաքրքիր ու ինքնատիպ միջոցառումները՝ պատրաստ գոհացնելու ցանկացած երաժշտական քիմքի տեր մարդուն։

Ապրիլի 12-ին «Առնո Բաբաջանյան» համերգասրահի Ներքնահարկում տեղի կունենա ժամանակակից հայ երաժշտական աշխարհում իր յուրահատուկ տեղն
ունեցող Ալտիթյուն խմբի համերգը։ Հնչելու են կատարումներ, որոնք կմիաձուլեն ջազի, ֆյուժնի, r&b-ի և սոուլի հարուստ երանգները։ Համերգը հիանալի
հնարավորություն է բացահայտելու նոր երաժշտական մտածողություն և հնչողություն խմբի ինքնատիպ կատարողականության միջոցով։

Ապրիլի 13-ին «Առնո Բաբաջանյան» համերգասրահում կկայանա “Beatles in Jazz” խորագրով համերգը։ Դեյվ Գյոդակյանը և նրա երաժիշտ ընկերները կրկին կլինեն
բեմում՝ ներկայացնելու լեգենդար The Beatles խմբի անմահ հիթերը նորովի՝ ջազային հնչողությամբ։ Համերգը կմիավորի The Beatles-ի երկրպագուներին, նաև ջազի սիրահարներին հուզիչ ու նոստալգիկ համերգային երեկոյի շրջանակում։

Ապրիլի 17-ին «Առնո Բաբաջանյան» համերգասրահի Ներքնահարկում «Ապրող պաստառ» մուլտիմեդիա ցուցադրության բացումն է։ Ցուցադրության հիմքում Գոհար Գիժլարյանի դիպլոմային աշխատանքն է՝ Երևանի Փանոս Թերլենեզյանի անվան գեղարվեստի պետական քոլեջի շրջանավարտ։ «Ապրող պաստառ»-ը
պատկերի՝ կենդանություն առնելու մասին է․ այն միահյուսում է շարժումը, հնչյունները և հեղինակի ձայնը՝ ստեղծելով ամբողջական մուլտիմեդիա ներկայացում։
Ցուցադրության բացումը կուղեկցվի թեմատիկ ժամանակակից պարային պերֆորմանսով։

Իսկ ապրիլի 18-ին տեղի կունենա ապրիլյան հերթական բարձրարվեստ երաժշտական երեկոն։ «Առնո Բաբաջանյան» համերգասրահում դաշնամուրային տրիոյով
հանդես կգան դաշնակահարուհի Սոֆյա Մելիքյանը, ջութակահար Դավիթ Հարությունյանը և թավջութակահար Միքայել Հախնազարյանը։ Կկատարվեն Լյուդվիգ
վան Բեթհովենի, Առնոլդ Շյոնբերգի և Յոհաննես Բրամսի ստեղծագործություններից։

Ապրիլի 22-ին «Առնո Բաբաջանյան» համերգասրահի Ներքնահարկում տիրելու է ռավելյան տրամադրություն։ Սպասվում է «Մորիս Ռավել 150» խորագրով համերգ, որի ընթացքում կհնչեն բացառապես ֆրանսիացի մեծ կոմպոզիտորի ստեղծագործությունները։ Համերգին հանդես կգան մեցցո-սոպրանո Վարսենիկ
Ավանյանը և դաշնակահար Ելենա Վարդազարյանը։ Համերգը անցկացվում է Հայաստանում Ֆրանկոֆոնիայի օրերի շրջանակում՝ նշանավորելով ֆրանսիական
մշակույթի և երաժշտության բացառիկ ժառանգությունը։

Ապրիլի թերևս ամենասպասված համերգը Ժամանակակից ֆրանսիացի դաշնակահար և իմպրովիզատոր Թիբո Մենիլոյի մենահամերգն է ապրիլի 25-
ին «Առնո Բաբաջանյան» համերգասրահում։ Մենիլոն կներկայացնի իմպրովիզացիոն կատարումներ՝ ոգեշնչված Բախից, Ռավելից, Դեբյուսիից, Մեսիանից,
Սկարլատիից, Կոմիտասից, Գյուրջիևից, Սթիվ Ռայխից ու Քեյթ Ջարեթից։ Դաշնակահարն ստեղծում է իր յուրատիպ հնչողությունը՝ լցված մեղեդիականությամբ,
պոլիֆոնիայով ու համարձակ նորարարություններով։ Թիբո Մենիլոյի պապը հանրահայտ ֆրանսիացի ջազ դաշնակահար Ռոժե Մենիլոն է, ով
ստացել է «սերունդների ուսուցիչ» բնորոշումը։

Ապրիլի 27-ն այն կիրակին է, որն արժե անցկացնել նոստալգիկ տրամադրությամբ։ «Առնո Բաբաջանյան» համերգասրահում կհնչեն սովետական երգեր՝
«ARM.STRONG DIXIE» խմբի կենդանի կատարմամբ։ Երեկոն բոլոր նրանց համար է, ում հիշողություններում ապրում են հին նվագարկիչներն ու կասետները, մոմի լույսի տակ անցկացված երաժշտական ժամերը և սիրված սովետական երգերը։ «ARM.STRONG DIXIE» խումբը բեմ կբարձրանա՝ վերադարձնելու այդ ջերմ, սրտաբաց ու անմոռանալի պահերը՝ նոր հնչողությամբ, բայց նույն զգացողությամբ։ Այս համերգը միտված է կապելու տարբեր սերունդներին այն
երգերով, որոնք բոլորս դեռ հիշում ենք։ 

Այս թեմայով Փաշինյանի հետ հանդիպումը վերածվել է կոշտ առճակատման Բաբաջանյանի հանդեպ արդարացման ակտ չի կայացվել. Մարտիրոսյանն իրեն վերագրվող պատմությունը հերյուրանք է համարում Ադրբեջանցի երգիչը Բաբաջանյանի «Հարսանիք» երգը ձայնագրել եւ անվանել է «Բաքվի բանահյուսություն» Պարո’ն Դադունց, ի՞նչ անենք Արման Բաբաջանյանի հետ, դատական ակտը չի կատարում․ ՔՊ-ականը՝ փոխնախարարին Մարիամ Սմբատյանի մենահամերգը՝ նվիրված Հենրիկ Սմբատյանի ծննդյան 90-ամյակին