Քաղաքացուն տուգանելու համար պատրաստ են ամեն ինչի. Վահե Գրիգորյան

Հասարակական տրանսպորտում առանց փոխադրավարձը վճարելու օգտվելու կամ արտոնություն ունեցողների փոխարեն երթեւեկելու համար հանրային քննարկման է ներկայացվել օրենքների նախագծերի փաթեթ, որով նախատեսվում է վարչական պատասխանատվության ենթարկել քաղաքացիներին` 15.000 դրամի չափով: Այս մասին հայտարարել է քաղաքապետի մամուլի խոսնակ Հայկ Կոստանյանը։ Թեմայի շուրջ «Իրավունք»-ը զրուցել է սահմանադրական եւ վարչական իրավունքների մասնագետ, իրավագետ ՎԱՀԵ ԳՐԻԳՈՐՅԱՆԻ հետ:

— Արդյո՞ք տուգանքի չափը չպետք է սահմանվեր մեկ ուղեվարձի գումարի նվազագույն չափով՝ 150 դրամ:

— Ներկայումս գործող օրենսդրական կարգավորումը սահմանում է, որ առանց ուղետոմս երթեւեկելն առաջացնում է տուգանք` տոմսի արժեքի կրկնապատիկի չափով, որը պիտի կազմեր 300 դրամ: Քանի որ տարբեր տոմսային արժեքներ կան` տուգանքի հաշվարկման մեխանիզմ պիտի դիտարկվեր նվազագույն արժեքը՝ 150-ը, մինչդեռ, փաստորեն, փորձ է արվում օրենսդրական փոփոխություններով անտոմս երթեւեկելու համար տուգանքը ավելացել 50 անգամ` 300 դրամի փոխարեն սահմանելով 15 հազար դրամ:

— Ըստ Ձեզ` այս նախագծերի փաթեթն, այդուհանդերձ, հավանության կարժանանա՞, եւ նման տուգանքի մեխանիզմը կգործի՞:

— Այո՛, կընդունվի, քանի որ, ցավոք սրտի, նախագիծ մշակողն իրենց նույն քաղաքական ուժն է:

— Իսկ անչափասասների դեպքում ինչպե՞ս են տուգանելու:

— Մինչեւ 14 տարեկան անձանց օրենքով արգելված է տուգանել. իրավունք չունեն նման բան անել. առոչինչ կլինեն նման տուգանքները:

— Առհասարակ ինչպե՞ս եք պատկերացնում այդ տուգանելու գործընթացը: Քաղաքացուն ոստիկանության բաժանմունք են տեղափոխելո՞ւ, թե՞ անձը հաստատող փաստաթուղթ են պահանջելու:

— Բացառված չէ, որ տուգանքը կկիրառեն թե՛ ոստիկանների, թե՛ հսկիչ տեսուչների միջոցով: Դեռ օրենքի վերջնական նախագիծը չկա, եկեք հիշենք, որ դեռ Քովիդի ժամանակ էր ակնհայտ՝ քաղաքացուն տուգանելու համար պատրաստ են ամեն ինչի: Պետք է ասեմ, որ ամենահակաիրավական որոշված տուգանքի չափն է 15 հազար դրամը: Հարկ եմ համարում վկայակոչել, որ պատժի կամ պատասխանատվության չափը որոշվում է արարքի հանրային վտանգավորությամբ, այսինքն, ըստ իշխանության, առանց տոմսի երթեւեկելն ավելի վտանգավոր է, քան առանց ամրագոտի երթեւեկելը կամ ղեկին հեռախոսակապից օգտվելը: Հիշեցնեմ, որ, ըստ օրենքի, առանց ամրագոտու երթեւեկելու տուգանքը կազմում է 10 հազար դրամ: Սա թերեւս լավագույն ապացույցն է այն հակաիրավական մտածելակերպի եւ քաղաքացուն տուգանքի մատերիալ դարձնելու անիրավ վարքի, որն ունի այս իշխանությունը:

ՆԱՆԱ ՍԱՐԳՍՅԱՆ

Այս թեմայով Թող Աստված ների ձեզ, պարոն Սուքիասյան, մենք ի՞նչ. ԶԱՐՄԱՆՔ Զատկի տոնի ավանդական թխվածք՝ կուլիչ․պատրաստման գաղտնիքը Մարտուն Գրիգորյանի թիմակիցների աջակցությամբ ՔՊ-ն Գյումրիում կրեց պարտություն. Հենրիխ Դանիելյան Ծանրամարտի ԵԱ. Ալեքսանդրա Գրիգորյանը` արծաթե մեդալակիր Ապրիլի 16-ին կգործարկվի պլան Բ-ն. ԲԱՄԲԱՍԱՆՔ