ԲԿ, որտեղ հիվանդը իր ոտքով մտել էր գեղեցիկը ընդգծելու, բայց դուրս են բերել մահամերձ

Օրեր առաջ պլաստիկ վիրահատության հետևանքով հերթական մահվան դեպքն էր գրանցվել Երևանում, այս անգամ՝ «Ուիգմոր» կենտրոնում: Դեպքի առնչությամբ ՀՀ քննչական կոմիտեից տեղեկացրին, որ նախաձեռնվել է քրեական վարույթ՝ Քրեական օրենսգրքի 187-րդ հոդվածի 2-րդ մասի հատկանիշներով (Բուժաշխատողի կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է մահ կամ ծանր հետևանք):

 

Մեզ փոխանցեցին, որ նշանակվել է դիակի դատաբժշկական փորձաքննություն, այս պահին կատարվում են անհրաժեշտ ապացուցողական և վարութային գործողություններ:

 

Ավելի վաղ «Առողջություն և իրավունք» ՀԿ համահիմնադիր, իրավապաշտպան Անուշ Պողոսյանն ահազանգել էր, որ «Ուիգմոր» բժշկական կենտրոնում արձանագրվել է պլաստիկ վիրահատության հետևանքով ողբերգական մահվան դեպք:

««Մ.Մ.-ն ընդունվել է Ուիգմոր փետրվարի 18-ին՝ ակնկալիքներով, որ պլաստիկ վիրահատություններից հետո դուրս է գրվելու ավելի գեղեցիկ և կատարյալ ֆիզիկական վիճակում: Հավելենք, որ տիկինը խրոնիկական հիվանդություններով չի տառապել, առողջության հետ կապված խնդիրներ, բողոքներ չի ունեցել: Մ.Մ.-ին «Ուիգմոր»-ում կատարել են սիմուլտան (համակցված) վիրահատություններ՝ որովայնի պալստիկա և զուգահեռ ևս մեկ այլ տեղակայման պլաստիկ վիրահատական միջամտություն:

Հիվանդի վիճակը հետվիրահատական 2-րդ օրը կտրուկ վատացել է, նրան տեղափոխել են վերակենդանացման բաժանմունք, որտեղ հիվանդի վիճակը էլ ավելի է վատացել՝ գնահատվել է ծայրահեղ ծանր, հաջորդիվ՝ փետրվարի 21-ին, նրան տեղափոխել են «Էրեբունի» բժշկական կենտրոնի վերակենդանացման բաժանմունք, որտեղ նույն օրը երեկոյան՝ ժամը 23:30-ի սահմաններում, Մ.Մ.-ի մոտ արձանագրվել է կենսաբանական մահ»,- հայտնել էր Պողոսյանը՝ նշելով, որ կինն առողջական խնդիրներ չի ունեցել։

 

Ըստ շրջանառվող տեղեկությունների՝  «Ուիգմոր»-ը փոխկապակցված է առողջապահության նախարար Անահիտ Ավանեսյանի ընտանիքի  հետ։ Նախարարը, սակայն, հերքել է՝ պնդելով, որ  «Ուիգմոր» կլինիկան իր ընտանիքի հետ կապ չունի։ Կլինիկայից եւս մեզ խոստացան կապվել, սակայն, ոչ կապվեցին , ոչ էլ։ Իսկ հետո մեր համառ հեռախոսազանգերին ի պատասխան ասացին, որ  գործ է հարուցված եւ բոլոր հարցերը ստանանք միայն ՔԿ-ից։ 

 

 

Հիշեցնենք, որ մեկ այլ՝  «Արթկոսմեդ» էսթետիկ վիրաբուժության կլինիկայում  նախորդ տարի հոկտեմբերի 5-ին գրանցվել էր 56-ամյա կնոջ մահվան դեպք։ Սա այդ կլինիկայում գրանցված արդեն երկրորդ մահվան դեպքն էր  պլաստիկ վիրահատության ընթացքում։ Նախորդ տարի էլ երիտասարդ կին էր մահացել: Առողջապահության նախարար Անահիտ Ավանեսյանն էլ հայտարարել էր, որ տեսչական մարմնից ստացել են «Արթկոսմեդ» էսթետիկ վիրաբուժական կենտրոնի լիցենզիայի կասեցման միջնորդություն: Այս պահին «Արթկոսմեդ»-ի լիցենզիան կասեցված է։