Ու՞ր է անհետացել Հայկ Մարությանը տրանսպորտի թանկացման պայքարից

Քաղակտիվիստ Արթուր Չախոյանը վերջերս հարց էր բարձրացրել, թե ինչպես են երեւանցիները վերաբերվում Հայկ Մարությանի անհետանալուն՝ տրանսպորտի թանկացման պայքարից: Նա ընդգծել է, որ օրինակ` իր համար շատ անսպասելի էր եւ անընդունելի, քանի որ նա, հանդիսանալով ընդդիմադիր քաղաքական ուժ, հանրությանը կոչ էր արել բոյկոտել տրանսպորտի թանկացումը, սակայն պայքարից անհետացել է՝ իր կոչ արած քաղաքացիներին թողնելով անհասկանալի անորոշության մեջ։ Ըստ Չախոյանի` մտածելու տեղիք է տալիս Հայկ Մարությանի անհետանալը բոյկոտի ամենաակտիվ փուլում, չէ՞ որ իր քաղաքական ուժն ի զորու է մեծ ազդեցություն ունենալ բոյկոտի արդյունքի վրա, սակայն այդ ուղղությամբ ոչ մի գործողություն տեղի չի ունենում: Այս հարցերի պատասխանը «Իրավունք»-ը փորձեց ստանալ Երեւանի ավագանու «Ազգային առաջընթաց» խմբակցության անդամ, բժշկական գիտությունների թեկնածու ՔՐԻՍՏԻՆԱ ՎԱՐԴԱՆՅԱՆԻ հետ զրույցում:

— Մեղադրանքներ են հնչում Ձեր ուժին նախընտրական շրջանում առաջնորդած քաղաքապետի թեկնածու Հայկ Մարությանի անվան շուրջ: Շատերի մոտ հարց  է առաջացել, թե որտեղ է նա այժմ գտնվում եւ ինչու տրանսպորտի դեմ պայքարի ընթացքում  պասիվացավ: Ո՞րն է այդ ամենի պատճառը:   

— Կարծում եմ, որ մեկնաբանելու բացարձակապես ոչինչ չկա, որովհետեւ ընդամենն օրեր առաջ է Հայկ Մարությանը հանրայնացրել իր ասելիքը եւ եթե առաջին օրերը ուղիղ եթերների տեսքով հենց երթուղայինների միջից էին, ապա այժմ եւս պայքարը շարունակվում է, բայց այդքան չի հանրայնացվում: Կարեւորն այն է, որ արվում է աշխատանքը: Ե՛վ նա, ե՛ւ նրա թիմի անդամները, տարբեր տրանսպորտային միջոցների հետ կապված, նկարահանումներ են կատարում, եւ դրանք համացանցում են հրապարակում: Կարծում եմ, որ կարիք չկա, որ այդ ամենն ամեն անգամ անի հենց Հայկ Մարությանը: Ինքը քաղաքում է եւ իր աշխատանքը շարունակում է այնպես, ինչպես սկսել է:   
Եթե տարբեր գնահատականներ են տալիս, պարզապես, կողքից տարբեր մարդիկ, ապա այդ ամենը մեկնաբանել ինքս չեմ կարող արդեն, քանի որ դա իրենց պատասխանատվության մեջ է, ովքեր խոսում են ամենօրյա ռեժիմով եւ քննարկում, թե ինչ է տեղի ունենում մեզ մոտ այդ հարցի վերաբերյալ: Այստեղ որեւէ փոփոխություն չկա, եւ պետք է հիշել նաեւ եւս մեկ կարեւոր բան: Դա այն է, որ բոյկոտ անում է ոչ թե Հայկ Մարությանը եւ իր թիմը, կամ «Մայր Հայաստան»-ը եւ այդ խմբակցության թիմը, այլ բոյկոտը անում է երեւանցին:
Այսինքն՝ երեւանցին ասելիք ունի քաղաքային իշխանությանը եւ չի հարմարվում մեր այն իրականությանը, որը կիրառում է քաղաքային իշխանությունը` թե՛ սկզբնական 300 դրամի հնարավորության բացառապես նոր կարգը, որից հետո այն, որ մեկ գիշերվա մեջ դա 50 տոկոսով էժանացավ, թե՛ 50 տոկոսով գինը բարձրացնելը, թե՛ ծառայության որակը, որը հրամցվում է երեւանցուն ահռելի բացերով. առանց որեւէ իրավական հիմքի ինչ-որ քաղաքացիներ, քաղաքապետարանի աշխատակիցներ, վարորդը, որը իջեցնում է մեքենայից ուղեւորին: Օրերս ինքս եւս անդրադարձա այն վարորդին, որը թոշակառու պապիկին, ով առհասարակ անվճար երթեւեկելու իրավունք ուներ եւ իր առողջական վիճակից ելնելով՝ չէր հասել դեպի թաղապետարան՝ իջեցրել էին եւ թույլ չէին տվել, որպեսզի այդ մարդը տեղաշարժվի հասարակական տրանսպորտով:
Ուղղակի, ցավոք սրտի, մեր քաղաքային իշխանությունը չի կարողանում ընկալել, որ սա հանրային ծառայություն է, եւ վարորդը չունի որեւէ իրավունք որեւէ իրավական ակտով խախտել երթեւեկությունը, կաթվածահար անել փողոցները եւ ասել այլեւս չեմ վարում մեքենան: Համացանցում կան տարբեր հրապարակումներ, որտեղ ասում են, թե մեր աշխատավարձից գանձվում է եւ այլն: Փետրվարի 10-ին քաղաքապետին գրել եմ նամակ , որում պահանջում եմ աշխատանքային պայմանագիրը, ինչն այժմ եւս կա, սակայն ես ուզում եմ պաշտոնականը տեղադրել, որտեղ շատ պարզ կերպով գրված է վարորդի պատասխանատվության մասին, բացարձակապես չկա նման իրավասություն, որն այսօր իրացնում են վարորդները եւ նաեւ քաղաքապետարանի ու թաղապետարանների տարբեր աշխատակիցներ: Ամեն ինչ, կարծում եմ, բավականին մանրամասն կերպով համացանցում ներկայացված է հանրության ուշադրությանը:

— Շատերին հետաքրքրում է նաեւ այն հարցը, որ անհասկանալի էր այն, թե ինչո՞ւ Մարությանը հենց Երեւանի ավագանու ընտրություններից հետո պասիվություն դրսեւորեց, իսկ հետո հայտարարեց տրանսպորտի թանկացման մասին՝ այն դեպքում, երբ քաղաքում արդեն տարբեր իրադարձություններ էին տեղի ունենում, սակայն նա, հանդիսանալով ընդդիմադիր քաղաքական ուժ, կարծես թե, չձեռնարկեց որեւէ քայլ:

— Գիտեք, ես չեմ ուզում դա մեկնաբանել, քանի որ մեկն ուրիշ բան է լսում եւ տեսնում, ես բոլորովին այլ բան եմ տեսնում եւ լսում: Այն քաղաքացին, որն այդ մեկնաբանումը տվել է, եւ դա հայտնվել է համացանցում, միայն իր սեփական կարծիքն է, եւ նա այդպես է կարծում, եւ դրա իրավունքը բոլորն ունեն: Շատ ավելի մանրամասն, կարծում եմ, կարելի է զրուցել հենց Հայկ Մարությանի հետ:

ԴԻԱՆԱ ՄԱՆՈՒԿՅԱՆ

Այս թեմայով Սեպտեմբերի 17-ից երթևեկության կազմակերպման փոփոխություն կկատարվի Չարենցի փողոցին հարակից հատվածում Նման աշխատանքային վաստակի տեր մարդուն պետք է շտապ կարգով ուղարկել Պալմա դե Մալյորկա, բայց «Երևան-Կենտրոն» ՔԿՀ-ն էլ վատ փոխարինող չէ. Փաշինյանը՝ Գագիկ Խաչատրյանի մասին «Իզմիրլյան» բկ-ն շարունակում քայլել միջազգային չափանիշներին համահունչ Սեդրակ Քոչարյանը «Երևան-Կենտրոն» ՔԿՀ-ում է ՇՏԱՊ. Հայտնաբերվել են վտանգավոր խաղալիքներ, կասեցվել է վաճառքը