«ՀԱՋՈՐԴ ՄԵՆԱՄԱՐՏՍ ԼԻՆԵԼՈՒ Է ԱԴՐԲԵՋԱՆՑԻ ՀԱԿԱՌԱԿՈՐԴԻ ՀԵՏ». ՊՐՈՖԵՍԻՈՆԱԼ ԲՌՆՑՔԱՄԱՐՏԻԿ, «WBU» և «GBC» ՎԱՐԿԱԾՆԵՐՈՎ ԱՇԽԱՐՀԻ ՉԵՄՊԻՈՆ ՅՈՒՐԻ ՍԱՔՈՒՆՑ

Հայազգի մարզիկ, պրոֆեսիոնալ բռնցքամարտիկ, Գինեսի ռեկորդակիր ՅՈՒՐԻ ՍԱՔՈՒՆՑԸ փետրվարի 15-ին Չեխիայի մայրաքաղաք Պրահայում կայացած Աշխարհի առաջնությանը վստահ հաղթանակ է տոնել չեխ բռնցքամարտիկի հանդեպ ու նվաճել «GBC» վարկածով Աշխարհի չեմպիոնի տիտղոսը, չեմպիոնական գոտին։ Մենամարտը անցել է լարված պայքարում, բայց Սաքունցի գերազանց պատրաստվածությունը վճռորոշ եղավ 4-րդ ռաունդում, երբ մրցավարը կանգնեցրեց մենամարտը, ֆիքսելով տեխնիկական նոկաուտ։ Սաքունցը ցուցադրել է վերահսկված մարտավարություն, առավելություն ստանալով առաջին իսկ ռաունդից։ Չնայած մրցակիցը փորձառու էր ու դիմադրեց մինչև վերջին պահը, նրա պաշտպանությունը չդիմացավ Սաքունցի հուժկու հարվածներին։ Յուրի Սաքունցը, այն հայազգի մարզիկն է, որի անունը վաղուց ընդգրկվել է սպորտի պատմության էջերում։ Նա ուժային եռամարտի Աշխարհի կրկնակի չեմպիոն է, ինչպես նաև Բռնցքամարտի Աշխարհի կրկնակի ու Եվրոպայի առաջնությունների հաղթող, WBU վարկածով Աշխարհի չեմպիոն։ Բացի այդ, նա նվաճել է նաև Համաշխարհային ձեռնամարտի ու Եվրոպայի ուժային ըմբշամարտի չեմպիոնի տիտղոսները։ Նրա բացառիկ նվաճումները վավերացվել են Գինեսի ռեկորդների գրքում ութ անգամ։

Iravunk. com -ի մարզական թղթակիցը կապ է հաստատել ու զրուցել արդեն հայրենիք վերադարձած Յուրիի հետ։

- Շնորհավորում ենք, Յուրի, Աշխարհի չեմպիոնական գոտին նվաճելու առթիվ։ Միակ հայազգի մարզիկն ես, ով նվաճեց այս բաղձալի գոտին։ Հետաքրքիր է, թե ինչ զգացողություններ առաջացան։

- Շատ շնորհակալ եմ։ Նշեմ, որ այս հաղթանակս նվիրում եմ իմ հայ ժողովրդին, «Արաբո» ջոկատի քաջարի մարտիկներին։ Մենամարտից այն կողմ կա ավելի մեծ իմաստ։ Շնորհակալ եմ բոլորին, ովքեր հավատացին ինձ ու կանգնեցին կողքիս։ Այս հաղթանակը միայն իմը չէ, այն պատկանում է իմ ազգին, իմ թիմին ու բոլոր նրանց, ովքեր պայքարում են արդարության համար։ Հատուկ շնորհակալություն եմ ուզում հայտնել իմ մարզիչներին Հայկին, Արշակին ու Հենրիին, նրանց ներդրումը իսկապես շատ մեծ է իմ հաղթանակներում։ Շատ լավ զգացողություններ ունեցա, քանի որ Աշխարհին ևս մեկ անգամ ներկայացրի իմ հայ ազգին, իմ երկիրը ու ապացուցեցի բոլորին, որ հայն հաղթող տեսակ է։ 69 կգ քաշային կարգում եմ հանդես եկել ։Շատ պարտավորեցնող է այն, որ ես միակ հայ մարզիկն եմ, ով նվաճել է այս չեմպիոնական գոտին։

- Յուրի, իսկ ինչպիսին էր մրցակիցդ, հասցրել էիր նրան ուսումնասիրել մենամարտից առաջ։

- Մրցակիցս Միրոսլավ Շչերբան էր, չեխ մարզիկ, Չեխիայի բազմակի չեմպիոն է, Աշխարհի ու Եվրոպայի առաջնությունների մասնակից։ Իհարկե, հասցրել էի նրան ուսումնասիրել, նա իր մարզական կարիերայի ընթացքում ունեցել է 250 մենամարտ, որից 230-ում հաղթել է, բավականին շատ փորձառու էր։

- Իսկ ի՞նչ տվեց քեզ այս հաղթանակը, միայն չեմպիոնական գոտին։

- Սա շատ մեծ մոտիվացիա տվեց ինձ հետագա մրցաշարերի համար։ Հաջորդ մենամարտս լինելու է ադրբեջանցի հակառակորդի հետ։ Շատ մեծ կլինի պատասխանատվությունը, ջանք չեմ խնայի ու լավ կպարապեմ։ Ճիշտն ասած, դեռ հստակ որոշված չէ օրն ու ամիսը, վայրը, սակայն հաջորդ մենամարտս դա կլինի։

- Շնորհակալություն, Յուրի, մեզ ժամանակ տրամադրելու համար։ Սպասենք արդեն հաջորդ հաղթանակիդ։

- Շատ զգացված եմ մշտապես ուշադրության համար, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Շախմատի համաշխարհային օլիմպիադա. Հայաստանի հավաքականը 6 խաղափուլից հետո 3-րդ տեղում է Եվրոպայի առաջնությունում այսօր ռինգ դուրս կգա Հայաստանի երեք ներկայացուցիչ Սիրո անունը Հայաստան է․ Սպարտայի ջերմ գրառումը Արարատ-Արմենիայի հետ խաղից հետո Բռնցքմարտի ԵԱ-ում այսօր Հայաստանն ունի 5 բռնցքամարտիկ ԲՌՆՑՔԱՄԱՐՏԻ ԵԱ. ՀԱՅԱՍՏԱՆՆ ՈՒՆԻ 4 ՆԵՐԿԱՅԱՑՈՒՑԻՉ