Անակնկալի եկած քաղաքապետարանը չի կարողանում հասկանալ՝ ինչպես ստացվեց, որ ձմռանը ձյուն եկավ

Երեւանում ձյան տեղումների պատճառով հանրային տրանսպորտը կաթվածահար է եղել: Ձմեռային անվադողեր չունենալը տրանսպորտը կոլապսի է ենթարկել:

Այն, որ քաղաքապետարանը նախապես իմացել է առատ ձյան մասին եւ անգամ հայտարարել ու զգուշացրել քաղաքացիներին, բոլորն են տեսել, սակայն այդքանն իմանալով` ինչո՞ւ հանրային տրանսպորտի անվադողերը չեն փոխել: Ինչո՞ւ վարչական շրջանների կոմունալ բաժնի աշխատողները նախապես չեն պատրաստվել ճանապարհների պատշաճ մաքրման աշխատանքներին։ Միայն թանկացնելով չէ, պարոնայք: Եվ հետո` գլխից դուրս տուգանքներ սահմանելով, որն առանձին թեմա է եւ կրկին օրենքի խախտում:

Ինչեւէ, ունենք այն, ինչ ունենք եւ, ցավոք, այս ամենի դեմ ռադիկալ պայքար մղող ընդդիմություն չունենք: Մեզ մնում է ուժ եւ համբերություն մաղթել մեր քաղաքացիներին, ովքեր այս ցրտին, աշխատանքից հետո, հոգնած, սառած, սոված դեռ անորոշ վիճակում կանգնած են կանգառներում եւ չեն հասկանում, թե ինչպես պետք է հասնեն տուն ու որ ժամին: Կամ վաղը, ինչպես պետք է հասնեն աշխատավայր, ուսումնական հաստատություն, երբ ո՛չ ավտոբուսներն են նորմալ աշխատում եւ ո՛չ էլ փողոցներն են նորմալ մաքրվում:

Երեկվա դրությամբ, դատարկ ավտոբուսները կանգնած են կանգառներում՝ միացրած վթարային լույսերը, իսկ տաքսիների գները հասել են ինքնաթիռների գներին, որը հասարակ աշխատավոր քաղաքացու համար իսկական դարդ է: Մի տեսակ անակնկալի եկած քաղաքապետարանը չի կարողանում հասկանալ, թե այդ ինչպես ստացվեց, որ ձմռանը ձյուն եկավ: Բա որ իմանար, գոնե ավտոբուսների անվադողերը կփոխեր: Չմեղադրեք, մարդիկ թանկացումներով են զբաղված:

ՆԱՆԱ ՍԱՐԳՍՅԱՆ

Այս թեմայով 40 տուժած. Թուրքիայում մարդատար ավտոբուս է շրջվել Բեռնատարների որոշ վարորդների մուտքի արգելքը Ռուսաստանում կարող է հանվել. «Ազատություն» Շինարարների փողոցում թիվ 18 ավտոբուսն ընկել է հողով ծածկված փոսի մեջ Տեսա՞ք՝ մեծ ավտոբուս եկավ, բոլորս կտեղավորվենք․ այսօր էլ ենք Երևանում․ վարչապետը տեսանյութ է հրապարակել Թուրքիայում ուղևորատար ավտոբուս է շրջվել․ կա 8 զnհ, 26 վիրավnր