Երեխաների զգացմունքների հաշվին այս անգամ Արեւմուտքը շոյեց Վրաստանի գլուխը

Նկարում՝ «Մանկական Եվրատեսիլ 2024»-ի հաղթողն է՝ Անդրիա Պուտկարաձեն

Բազմիցս խոսվել է այն մասին, որ «Եվրատեսիլ»-ը չոր քաղաքականություն է, սակայն, չգիտես ինչու, համառորեն Հայաստանը շարունակում է մասնակցել այդ քաղաքական խաղին ու կլորիկ գումար վատնել՝ եվրատեսիլյան բեմում ներկայանալու համար:

Գնանք ոչ հեռավոր անցյալ. 2021 թվականին՝ 44 -օրյա պատերազմից ուղիղ մեկ տարի անց, «Մանկական Եվրատեսիլ»-ում հաղթող ճանաչվեց Հայաստանը ներկայացնող Մալենան: Իսկ մեծահասակների «Եվրատեսիլ»-ում դեռեւս չունենք հաղթանակ, եւ լավագույն հորիզոնականը, որ զբաղեցրել ենք, եղել է 4-րդը: Հիմնականում Հայաստանին բարձր միավորներ են տվել հարեւան ու բարեկամ երկրները՝ Վրաստանը, Ռուսաստանը, Ֆրանսիան: 2022 թվականին Ուկրաինան հաղթեց մածահասակների «Եվրատեսիլ»-ում՝ լինելով պատերազմի մեջ Ռուսաստանի դեմ: Այդկերպ Եվրոպան փորձում է հաճոյանալ եւ փաղաքշել նման երկրներին՝ իբրեւ թե ցույց տալով, որ նրանց կողքին է: Ի դեպ, անմիջապես հաղթանակից հետո՝ ուկրաինական խումբը վաճառեց մրցանակն՝ անօդաչու սարք գնելու նպատակով:

Ինչեւէ, վերադառնանք մեր երկիր եւ մեր օրեր. Իսպանիայի մայրաքաղաք Մադրիդում «Ծաղկենք» խորագրի ներքո կայացավ «Մանկական Եվրատեսիլ 2024»-ը. Հայաստանը ներկայացնող Լեոն հանդես եկավ 4-րդ համարի ներքո: Այն, որ այս տարի Հայաստանը ներկայացնում էր երգիչներ Հռիփսիմե Հակոբյանի եւ Մարտին Մկրտչյանի որդին, այդպես էլ շատերի համար անհասկանալի մնաց, հատկապես, որ նրա տվյալներով արդյունքն էլ պարզից էլ պարզ էր:

Նշենք, որ մեր հայ երգչի ընտրությունը կատարվել է Հանրայինի նախապես հայտարարված մրցույթում, որտեղ մասնակցում էին 100-ից ավելի թեկնածուներ: Տեղի եւ միջազգային մասնագետներից բաղկացած փորձագետների խումբը ընտրել էր Լեոին, ով եւ ներկայացավ Մադրիդում «Cosmic friend» երգով (երաժշտության հեղինակը Tokionine-ն է (Դավիթ Բադալյան), խոսքերի հեղինակներն են Վահրամ Պետրոսյանը եւ Մալենան: Երգի տեսահոլովակի ռեժիսորը Արթուր Մանուկյանն է, հագուստների հեղինակը` Արմեն Գալյանը) եւ զբաղեցրեց 8-րդ հրիզոնականը:

Ժյուրիի քվեարկության արդյունքում Հայաստանը 1 միավոր ստացավ Կիպրոսից, 2-ական միավոր՝ Ալբանիայից, Լեհաստանից եւ Սան Մարինոյից, 4 միավոր ստացավ Իսպանիայից, 5-ական միավոր՝ Ուկրաինայից եւ Հյուսիսային Մակեդոնիայից, 6 միավոր՝ Պորտուգալիայից, 7 միավոր՝ Հոլանդիայից, 8 միավոր՝ Մալթայից, 10 միավոր՝ Էստոնիայից, Հայաստանի մասնակիցը 12 միավոր ստացավ Ֆրանսիայից եւ Վրաստանից: Լեոն ժյուրիի քվեարկության արդյունքում վաստակեց ընդամենը 76 միավոր: Հեռուստադիտողի եւ ժյուրիի քվեարկության արդյունքում Հայաստանի մասնակիցը վաստակեց ընդհանուր 125 միավոր:

«Մանկական Եվրատեսիլ-2024»-ում հաղթող ճանաչվեց Վրաստանի ներկայացուցիչը` Անդրիա Պուտկարաձեն՝ «To My Mom» երգով: Ընդ որում՝ Հայաստանն էլ իր ամենաբարձր 12 միավորը տվեց Վրաստանի մասնակցին։ Հիշեցման կարգով ասենք, որ Վրաստանում դեռ հետընտրական կրքերը հանդարտված չեն: Եվ ահա Եվրոպան կրկին իր դիրքերում է ու փաղաքշում է այս անգամ Վրաստանի գլուխը՝ ցույց տալով, որ չի ցանկանում բաց թողնել նրան: Իսկ Ռուսաստանն այս տարի եւս չէր մասնակցում «Եվրատեսիլ»-ին: Եվրոպան պատժամիջոցների շրջանակում, այսպես ասած, խլել է Ռուսաստանի ձեռքից եվրատեսիլյան բարձրախոսը, մինչդեռ ռուսը մի լավ խոսք ունի. «Мне по барабану»:

«Մանկական Եվրատեսիլ 2024» երգի մրցույթին մասնակցում էին Հայաստանը, Ալբանիան, Էստոնիան, Ֆրանսիան, Կիպրոսը, Վրաստանը, Գերմանիան, Իռլանդիան, Իտալիան, Մալթան, Նիդերլանդները, Հյուսիսային Մակեդոնիան, Լեհաստանը, Պորտուգալիան, Իսպանիան, Միացյալ Թագավորությունը եւ Ուկրաինան:

ՆԱՆԱ ՍԱՐԳՍՅԱՆ

Նկարում՝ «Մանկական Եվրատեսիլ 2024»-ի հաղթողը՝ Անդրիա Պուտկարաձեն

Այս թեմայով Ֆրանսիայում Telegram-ում մանկական պոռնոգրաֆիա դիտելու և տարածելու համար 55 տղամարդու են ձերբակալել Մի տնից չեն, մի օր են. Կոնչիտան հրապարակել է զուգերգ «Եվրատեսիլ»-ում հաղթողի հետ Հայկական եւ վրացական կուսակցությունները քննարկումներ են անցկացրել «Եվրատեսիլ»-ում Հայաստանը պարտվեց ոչ թե երգով, այլ տղամարդ մնալու համար Իսրայելական կողմը ներողություն է խնդրել «Եվրատեսիլ» երգի միջազգային մրցույթում հաղորդավարի կողմից հնչեցրած արտահայտությունների համար