Հայ-ռուսական դարավոր բարեկամությունը փչացնելը մեծ հանցանք է. Աիդա Հարությունյան

Կայացավ «Տանիքը` Հայաստան» խորագրով ազգային փոքրամասնությունների փառատոնը Երեւանում։ Միջոցառմանը մասնակցում էին հայաստանաբնակ տարբեր ազգերի ներկայացուցիչներ՝ ռուս, եզդի, քուրդ, գերմանացի եւ այլք, որոնք ներկայացրել են իրենց ազգային ուտեստները, պարերն ու խոհանոցը։

«Իրավունք»-ն առիթ ունեցավ ծանոթանալ եւ խոսել տարբեր մշակույթ ներկայացնող ազգերի հետ: ԱԻԴԱ ՀԱՐՈՒԹՅՈՒՆՅԱՆԸ, ով ներկայացնում էր Ռուսաստանի մշակույթն ու ավանդույթները եւ համայնքը Հայաստանում, մեծ հույս հայտնեց, որ շուտով էլ ավելի կամրանան հայ-ռուսական հարաբերությունները, որը դարերի պատմություն ունի:

«Այս փառատոնը տալիս է եւս մեկ հնարավորություն տվյալ ազգությանը ներկայացնելու իր մշակույթն ու ավանդույթը: Ինչպես գիտեք, հոկտեմբերի 1-ին նշվում է ազգային փոքրամասնությունների օրը: Ի դեպ, մեզ հայտնեցին, որ այս միջոցառումը՝ «Տանիքը՝ Հայաստան» խորագրով, լինելու է շարունակական եւ ամեն տարի անցկացվելու է: Հրաշալի միջոցառում էր, որը տեւեց մինչ ուշ երեկո եւ ուղեկցվեց ազգային երգ- երաժշտությամբ»,- ասաց տիկին Հարութունյանը:

Աիդա Հարությունյանը, ով նաեւ «Հարմոնիա» ռուսական մշակույթի միջազգային կենտրոնի տնօրենն է, ընդգծեց. «Հայ-ռուսական բարեկամական կապերը նորություն չեն, այն տեւել է դարերով եւ այն խախտելը, փչացնելն ու լիկվիդացնելը մեծ հանցանք է՝ թե՛ հայ եւ թե՛ ռուս ժողովուրդների նկատմամբ: Չպետք է մոռանալ, որ մենք Ռուսաստանում էլ մեծ հայ համայնք ունենք, ինչպես նաեւ հայկական մշակույթն է ամուր պահպանվում Ռուսաստանում: Կան եկեղեցիներ, ինչպես Հայաստանում կան ռուսական եկեղեցիներ: Իսկապես մեծ հույս ունեմ, որ այս դարավոր բարեկամությունը ինչպես եղել է, այնպես էլ կշարունակվի»,- հավելեց նա:

Նշենք, որ այսուհետ «Տանիքը` Հայաստան» խորագրով ազգային փոքրամասնությունների փառատոնը Երևանում կկայանա ամեն տարի` հոկտեմբեր ամսին:

ՆԱՆԱ ՍԱՐԳՍՅԱՆ

Այս թեմայով Որ ուժերն են մասնակցում Կարապետյանի տան հավաքին «Հայ-թուրքական սահմանի բացումը հիմա նպատակահարմար չէ»․ թուրք վերլուծաբան Ալեքսանդր Սպենդիարյանի 155-ամյակին ծաղիկներ են խոնարհել կոմպոզիտորի շիրիմին Չէի պատկերացնում, որ 2021-ին ձեւավորված պառլամենտից է՛լ ավելի վատ պառլամենտ հնարավոր է. Շահեն Հարությունյան ՀՐԱՏԱՊ. պետական ինքնիշխանության հաշվին արված սխալի բեռը կարող է մնալ սերունդների ուսերին