Վեհափառը թերեւս միակն է 132-ի մեջ, ով... Անժելա Սարգսյանի դիպուկ շնորհավորանքը

«Շատ ուրախ եմ, որ այսօր ամբողջ օրը ֆեյսբուքյան լրահոսը լեցուն էր Ամենայն Հայոց Վեհափառի Ծննդյան Տարեդարձի կապակցությամբ բարեմաղթանքներով:

Հիշում եմ 2018 թ.-ը, երբ Ամենայն Հայոց Վեհափառը եւ հոգեւոր դասը մեն-մենակ էին մնացել աշխարհակուլ գլոբալիզմի Հայաստան ներխուժած ցունամիի առաջ։

Բացի հոգեւորից, բոլոր հաշվարկներով առավելությունը եւ լծակները նեռիստների ձեռքում էր։ Հայաստանի պետական իշխանությունը զավթած ցունամին հասավ Մայր Աթոռ Սուրբ Էջմիածին, ճանկերը գցած հոգեւոր գահին, բայց այստեղ եղավ անմեկնելին։ Անսասան էր Մայր Աթոռը, Սուրբ Խորանով, որպես Աստծո որդու Նոր Գալստյան անխորտակ ու զորավոր Վեմ՝ ի դեմս Ամենայն Հայոց Վեհափառի ու հոգեւոր դասի։ Չարի ցունամին խփեց Աստծո տան պատերին ու ընկրկեց, ոռնալով նահանջեց Աստծո Տան զորությունից:

 

Ամենայն Հայոց 132-րդ Վեհափառը թերեւս միակն է 132-ի մեջ, ով չորս կողմից՝ ներսից ու դրսից այդքան մարտահրավերներ ունի եւ որի լռելյայն, իսկապես վեհաբարո, ազգանպաստ, ազգաշեն, հոգենորոգ գործունեության ահռելի հետագիծը ոսկե տառերով Հայոց պատմության մեջ պետք է գրվի։ Աղոթում եմ Աստծուն Հայոց Հայրապետի ողջության, քաջառողջության եւ երկար կյանքի օրերի արեւշատության համար։ Աստված թող ուժ, զորություն, տոկունություն պարգեւի Ամենայն Հայոց Վեհափառին, որ այնպես խիզախորեն ստանձնեց վեր բարձրացնելու հայոց ինքնության, հայոց պետականության, հայոց պատմական պահանջատիրության դրոշը, ի հեճուկս Հայաստանի պետական, ուրացող ու դավաճան ապազգային իշխանության եւ ի հեճուկս ժամ առ ժամ ահագնացող համաշխարհային նեռի դիկտատուրայի։

 

Աստված արդեն իսկ օրհնել էր Ձեր Ծնունդը Վեհափառ Տեր, նախասահմանելով Ձեր առաքելությունը Հայոց հոգեւոր գահին եւ արժանացնելով Սուրբ Օծմանը ընտրյալի, հիմա աղոթում ենք Աստծուն եւ հայցում իր ամենազորեղ զորություններով, Ձեզ պարգեւի աջակցություն, զորակցություն Հայոց հոգեւոր ու աշխարհիկ լինելիության նավը, առավելագույնս անվնաս դուրս բերելու այս աշխարհակործան ալեկոծություններից։ Աստված օգնական։ Բարի ու բեղմնավոր Տարեդարձ, մեր սիրելի Վեհափառ», - գրել է Հայ Առաքելական Սուրբ եկեղեցու հետեւորդ ԱՆԺԵԼԱ ՍԱՐԳՍՅԱՆԸ: