ԿԸՀ-ն Եվրամիություն ձգտող քաղաքական ուժերից դիմում չի ստացել

Եվրամիություն ձգտող քաղաքական ուժերը հայտարարել էին, որ մտադիր են ստորագրահավաք սկսել եւ քաղաքացիական նախաձեռնության կարգով խորհրդարան ներկայացնել օրենսդրական նախագիծ՝ ԵՄ-ին անդամակցելու հարցով: Թե արդյոք արդեն դիմել են Կենտրոնական ընտրական հանձնաժողովին, «Իրավունք»-ը հետաքրքրվեց ԿԸՀ նախագահի մամուլի քարտուղար ՍԵԴԱ ՂՈՒԿԱՍՅԱՆԻՑ: Նա նշեց, որ Կենտրոնական ընտրական հանձնաժողովը դեռեւս նման դիմում չի ստացել: Մեր այն հարցին, թե միգուցե ստորագրահավաքի համար ձեւաթուղթ արդեն վերցրե՞լ են ԿԸՀ-ից, պարզաբանեց, որ ձեւաթուղթը դրված է Կենտրոնական ընտրական հանձնաժողովի պաշտոնական կայքում եւ յուրաքանչյուր ոք այն կարող է ներբեռնել՝ առանց ԿԸՀ այցելելու:

Իսկ թե ինչ ընթացակարգ է անցնում քաղաքացիական նախաձեռնությամբ՝ խորհրդարան օրենսդրական նախագիծ ներկայացնելը, հիշեցնենք, որ Կենտրոնական ընտրական հանձնաժողովն է սահմանում ստորագրահավաքի անցկացման 60-օրյա ժամանակահատվածը: Անհրաժեշտ է ստորագրել ՏԻՄ հաստատություններում՝ մարզպետարանում, համայնքապետարանում, թաղապետարանում, ստորագրությունը հաստատել անձնագրային տվյալներով: Երբ հավաքվի 50 հազար ստորագրություն, ԿԸՀ-ն իրականացնում է ստորագրությունների վավերականության ստուգում՝ այդ թվում ստորագրած ձեւաթերթիկների տվյալները համադրելով պետական եւ տեղական ինքնակառավարման մարմինների տիրապետման ներքո գտնվող հասանելի տեղեկությունների հետ։ Եթե ստորագրությունների քանակը եւ վավերականությունը բավարարում է, օրինագիծը պարտադիր մտնում է ԱԺ օրակարգ եւ դրվում քվեարկության: Եթե Ազգային ժողովը մերժում է նախագիծը, ապա եւս 300 հազար ստորագրություն պետք է հավաքվի, որպեսզի նախագիծը դրվի հանրաքվեի: Հանրաքվեով բավարար ձայներ ստանալու դեպքում՝ նախագիծը անմիջապես հրապարակվում ու դառնում է օրենք: Հետագայում այն կարող է փոխվել միայն հանրաքվեով:

Ի վերջո, թե ե՞րբ են պատրաստվում դիմել Կենտրոնական ընտրական հանձնաժողովին եւ մեկնարկել, այսպես ասած, խոստացված, ստորագրահավաքը, կարկառուն արեւմտամետներից պարզել այդպես էլ չհաջողվեց: Միայն նրանց մոտ կանգնած «Իրավունք»-ի աղբյուրները հավաստեցին, որ հիմա տեխնիկական-կազմակերպչական հարցերով են զբաղված, ուսումնասիրում են, հետաքրքրվում, հարցուփորձ անում, թե ինչպես կարող են այս ամենը կյանքի կոչել: Այդուհանդերձ, եթե նույնիսկ սեպտեմբերին դիմեն ԿԸՀ-ին, 60 օր ստորագրություն հավաքեն, հետո էլ մեկ ամիս ԿԸՀ-ն ստուգի դրանց վավերականությունը, ստացվում է, որ ամենաշուտն առնվազն դեկտեմբերին հնարավոր կարող է լինել վերադառնալն այս հարցին: Իհարկե, եթե 50 հազար ստորագրող գտնեն եւ գտնելուց հետո էլ չարժանանա այն «Հայաքվեի» դժգույն բախտին:

ՀՐԱՆՏ ՍԱՐԱՖՅԱՆ

Այս թեմայով Իլհամ Ալիևը չի մասնակցի ԱՊՀ երկրների ղեկավարների ոչ ֆորմալ հանդիպմանը Իմ վրա կրակած ավտոմատը տվել է Կարամելի Հարութը, որը հետո խփեց Յուվեցի Կարոյին. Վարդան Ղուկասյան TRIPP-ի կյանքի կոչվելը որեւէ կերպ չի կարող սպառնալ Իրանի անվտանգությանը. Իրանահայ խմբագիրը մանրամասներ է ներկայացնում «Սարխանի» լրտեսության գործի մանրամասները. «Սալամ, Թուրալ» Վարդան Ղուկասյանը դիմել է ՀՀ-ում հավատարմագրված դեսպաններին, ՀՀ ՄԻՊ–ին և Գլխավոր դատախազին