«Դավաճանությանը հավասարազոր կլինի` հանել ռուսաց լեզուն մեր դպրոցներից կամ մղել երկրորդական պլան»

Նիկոլ Փաշինյանի որդուն՝ Աշոտին ծափահարող եւ «Մեր բակը» աշխարհի ամենադեգեներատ ֆիլմերից մեկը համարող երգիչ-երգահան, իշխանության սրտի արվեստագետ Ռիչարդ Մադլենյանը կրկին աչքի է ընկել նոր «մտքի փայլատակումով»:

Այս անգամ Մադլենյանը խնդրել, աղաչել, տո եթե կուզեք՝ պաղատել է ՀՀ կառավարությանը, ՀՀ Ազգային ժողովին, ինչպես նաեւ ԿԳՄՍ նախարարությանը, որ օր առաջ ռուսերենը հանեն պետական երկրորդ լեզվի կարգավիճակից եւ փոխարենը, որպես պետական երկրորդ լեզու, համարեն անգլերենը, պատճառաբանելով, որ այդ լեզվի պատճառով է մեր բոլոր դժբախտությունները:

«Այս լեզվի շեմն ավարտվում է այնտեղ, որտեղ սկսվում է քաղաքակիրթ աշխարհը։ Գիտակցելով այս լեզվի եւ լեզվամտածողության հետեւանքով առաջացած ազգային մեր բոլոր խնդիրները, արհավիրքներն ու աղետները, խնդրում եմ ՝ օր առաջ ռուսաց լեզուն հանեք պետական երկրորդ լեզվի կարգավիճակից եւ փոխարենը, որպես պետական երկրորդ լեզու ,ընդունեք անգլերենը»,- գրել է Մադլենյանը:

«Իրավունք»-ի հետ զրույցում, անդրադառնալով վերոնշյալին՝ «Ազգի ձայն» կուսակցության հիմնադիր նախագահ, ՀՀ վաստակավոր արտիստ, երգիչ ՄՀԵՐ ԱՐՄԵՆԻԱՆ (ՄԵՍՐՈՊՅԱՆ) չցանկացավ մեկնաբանել Ռիչարդ Մադլենյանի հայտարարությունը` ուղղված գործադիրին, օրենսդիրին եւ ԿԳՄՍ նախարարությանը, այլ պարզապես հիշեցրեց, որ այսօր բազմաթիվ հայեր Հայաստանում շփվում են ռուսերեն:

«Ինչու պետք է հրաժարվել մի լեզվից, փոխարենը ընտրել այլ լեզու: Լեզու իմանալը շատ լավ բան է: Ռուսերենը այսօր կոմունիկացիոն լեզու է, եւ կարծում եմ հակառակը պետք է արվի, ավելի ամրապնդվի ռուսաց լեզուն դպրոցներում՝ մնացած այլ լեզուների հետ, որոնք ներգրավված կլինեն ուսումնական ծրագրերում եւ նույնպես կկիրառվեն»,- ընդգծեց երգիչը:

Իսկ ՀՀ վաստակավոր արտիստ, երգչուհի ԳԱՅԱՆԵ ՆԵՍԻՍՅԱՆԻ կարծիքով՝ ռուսաց լեզուն գեղեցիկ լեզու է եւ հայերիս համար շատ հարազատ:

«Դավաճանությանը հավասարազոր կլինի` հանել ռուսաց լեզուն մեր դպրոցներից կամ այն մղել երկրորդական պլան: Իհարկե, թող սովորեն անգլերեն, բայց սա չի նշանակում, որ պետք է ամբողջապես տրվեն անգլերենին եւ մոռանան ռուսաց լեզուն: Մենք պետք է ընդունենք, որ ռուսական մշակույթը շատ բարձր մշակույթ է, եւ մենք դարավոր բարեկամություն ունենք ռուս ազգի հետ»,- շեշտեց տիկին Ներսիսյանը:

ՆԱՆԱ ՍԱՐԳՍՅԱՆ

Այս թեմայով Մհեր Գրիգորյանը մեկնում է Մոսկվա Դա նշանակում է հարվածել գոտկատեղից ներքեւ. Հայտնի փաստաբանը հայտարարությամբ է հանդես եկել Տոտալիտարիզմի շնչից նիկոլական ժողովրդավարությունն ուղղակի թառամեց. ԶԱՐՄԱՆՔ Էմին ջան, թեթև տար... իսկ գուցե ճի՞շտ էի ես, որ չեմ կզել. Մհեր Մկրտչյան Ափսոս…կովկասյան թաթարները քայլեցին Կարմիր հրապարակով, իսկ Հայաստանը ներկայացված չէր. Ներսիսյան