Ամենադեգեներատն է, թե՞ ամենաուրախը. «Մեր բակում» կռիվ է ընկել

Երգիչ-երգահան Ռիչարդ Մադլենյանը Նիկոլ Փաշինյանի ընտանիքին պատկանող լրատվամիջոցին հարցազրույց է տվել եւ մասնավորապես նշել, թե՝ «Մեր բակը» աշխարհի ամենադեգեներատ ֆիլմերից մեկն է համարում, որը սկիզբ է դրել «անկախ Հայաստանի ֆուֆլոնային մշակույթի ձեւավորմանը»։ Ասվածն, անշուշտ, հուզել է «Մեր բակը» դիտած եւ առ այսօր դիտող հեռուստադիտողին եւ դարձել սոցցանցերում բուռն քննարկման առարկա:

Վերոնշյալի մասին «Իրավունք»-ը փորձեց մեկնաբանություն ստանալ «Շարմ Հոլդինգ» ընկերության հիմնադիր եւ գլխավոր նախկին տնօրեն, այժմ Հայկական ազգային կինոակադեմիայի նախագահ ՌՈՒԲԵՆ ՋԱՂԻՆՅԱՆԻՑ: Սակայն, նա ջղաձգումների մեջ ընկնելով միայն «լրագրող» բառից՝ անմիջապես հիշեց իր զբաղվածության մասին եւ անջատեց հեռախոսը: Այնուհետ փորձեցինք զրուցել «Մեր բակի» տարբեր դերակատարների հետ, որոնք կտրականապես չէին պատասխանում հեռախոսազանգերին: Ի վերջո, մեզ հաջողեց խոսել ֆիլմի հերոսուհիներից երկուսի հետ:

Դերասանուհի ԻՐԻՆԱ ԴԱՆԻԵԼՅԱՆՆ անկեղծորեն ասաց, որ նման կարծիքներ շատ են հնչել, բայց ինքն այդպես չի համարում. «Դա այն ժամանակահատվածն էր, երբ մեզ ուրախանալ էր պետք, եւ ֆիլմը մեզ իսկապես ուրախացրեց: Ի դեպ, ես «Մեր բակը-1»-ում չեմ նկարվել, բայց ինձ դուր է եկել, շատ ուրախ ֆիլմ էր: Թե ինչու է Ռիչարդ Մադլենյանը նման կարծիք հայտնել, չեմ կարող ասել, գուցե նա ա՞յլ արժեքների վրա է մեծացել: Անշուշտ, չեմ ասի, որ այս ֆիլմը մեծ արժեքներ է ներկայացրել, բայց այն եղել է ուրախ ֆիլմ, որը այդ տարիներին լցրել է բոլորիս տները: Իհարկե, ֆիլմը դաստիարակչական չէ եւ չէր կարող այնպիսի մշակույթ դաստիարակել, որ այժմ կրկնօրինակվեր ու կիրառվեր, ինչպես ասում է Մադլենյանը»:

Իսկ երգչուհի ԼԻԼԻԹ ԿԱՐԱՊԵՏՅԱՆԸ նախ զարմացավ Մադլենյանի նման որակումներից:

«Մեր բակը» մեր մանկությունն է, մեր դժվար օրերը լուսավորողը: Անկեղծ զարմացած եմ մեր ընկերոջ մոտեցումից: Գուցե ինչ-որ բան սխա՞լ է հասկացվել, չեմ կարող հավատալ, որ նա նման բան ասած լինի: Իսկ եթե իսկապես ասել է, ապա պիտի ասեմ, որ մեր ընկերը խնդիր ունի, որովհետեւ այն, ինչ արեց այդ տարիներին «Մեր բակը», դարձավ հանդիսատեսի կողմից ցանկալի ու պահանջված: Անգամ մինչ օրս են նայում, ու չկա մի Ամանոր՝ առանց այդ ֆիլմի: Ֆիլմին իրենց ներկայությամբ էլ ավելի մեծ շուք են տվել այնպիսի դերասաններ, ինչպիսիքն են Արմեն Խոստիկյանը, Աշոտ Ղազարյանը, Հրանտ Թոխատյանը, ՀՀ ժողովրդական արտիստներ Ռուբեն Մաթեւոսյանը, Արթուր Գրիգորյանը եւ այլք: Ապշած եմ նման որակումից, ու անսպասելի էր ինձ համար: Բացարձակ չեմ կիսում Ռիչարդ Մադլենյանի կարծիքը»,- խոսքը եզրափակեց երգչուհին:

Անշուշտ, կարծիք կարող են հայտնել բոլորը, նույնիսկ քննադատել, հատկապես, որ Մադլենյանի խոսքում՝ որքան էլ ծանր է ընդունել, կա ճշմարտություն: Իսկապես, հանրության մի զգալի հատված այդպես էլ մնաց «Մեր բակի» թեւավոր խոսքեր դարձած ժարգոնի ու հերոսներին նմանակելու տակ՝ «կարգիններից» մինչեւ «դոձիկներ»: Բայց թե որքանո՞վ է ազնիվ նրա կողմից հնչեցնել նման քննադատություն, երբ հենց ինքը՝ Մադլենյանն էր ժամանակին նկարահանվում ցածրաճաշակ սերիալներում ու սերունդներ դեգրադացնում, թողնենք ընթերցողի դատին:

ՆԱՆԱ ՍԱՐԳՍՅԱՆ

Այս թեմայով Հայաստանը պասիվ դիտորդ է դարձել սեփական ճակատագրի վերաբերյալ գործընթացներում. Արման Դանիելյանի Սերժ Սարգսյանի ղեկավարությամբ Հայաստանը ուներ կանխատեսելի և արտաքին քաղաքական ճկունությամբ օժտված իշխանություն. Դանիելյան Քանդվեցին երկու ընտանիք. Անի Կարապետյանը փակագծեր է բացում Փաստաթուղթը պարունակում էր ֆաշիզմի դատապարտում և Շուշիի ազատագրման հիշատակումը՝ որպես ազգային դիմադրության խորհրդանիշ ՔԿ-ն մանրամասներ է հայտնել Լիլիթ Աղեկյանի վերաբերյալ քննվող քրեական վարույթների մասին