Այլ ճանապարհներ չկան. Ռեֆորմիստները պատրաստվում են հաջորդ խորհրդարանական ընտրություններին

Կայացավ Ռեֆորմիստների կուսակցության 4-րդ համագումարը, որի ժամանակ հաստատվեց կուսակցության կանոնադրությունը՝ նոր խմբագրությամբ, տեղի ունեցավ կուսակցության մշտապես գործող ղեկավար մարմնի (գործադիր մարմնի) եւ վերստուգիչ հանձնաժողովի նոր կազմի ընտրություն: Իսկ վերջում կուսակցությունը միաձայն (չքվեարկեց միայն թեկնածուն) կուսակցության նախագահ վերընտրեց ՎԱՀԱՆ ԲԱԲԱՅԱՆԻՆ:

Ռեֆորմիստների կուսակցության նորընտիր նախագահը փակագծեր բացեց իրենց քաղաքական օրակարգի մասին. «Մենք հիմա մի կետում ենք, որ կա՛մ պետք է մնանք դիտորդ՝ տեսնելով, թե ով է պատասխանատվություն վերցնում նոր օրակարգ ու ծրագրեր առաջարկելու հարցում, կա՛մ ինքներս առաջարկենք օրակարգ եւ ձեւավորենք բարեփոխումների ծրագիր, ինչը կդրվի հասարակության դատին եւ առաջիկա ԱԺ ընտրություններին՝ ձգտել ստանալ վստահության քվե Հայաստանում ռեֆորմիզմի իշխանություն ձեւավորելու համար: Մենք մնում ենք հավատարիմ մեր սկզբունքին եւ վստահ ենք, որ Հայաստանում հեղափոխականությամբ որեւէ դրական բան չի լինելու: Մենք ունենք լիարժեք հնարավորություն լուրջ հաջողություն գրանցել հաջորդ ընտրություններին՝ որպես ընդդիմադիր քաղաքական թիմ»:

Վահան Բաբայանը հայտարարեց, որ իրենց կուսակցությունը մասնակցելու է ԱԺ ընտրություններին եւ ակնկալում է իրենց գաղափարակից քաղաքացիների վստահության քվեն ստանալ. «Այլ ճանապարհներ չկան քաղաքական իշխանության ձեւավորման համար, հակառակը պնդողները եւս մասնակցելու են ընտրություններին եւ փորձելու են մտնել խորհրդարան՝ անկախ նրանից, թե այսօր ինչ են ասում: Սա է իրական պատկերը, եւ պետք չէ վախենալ դա բացահայտ ասելուց: Մենք ազնիվ ենք եւ բաց մեր համակիրների առջեւ, մենք չունենք կարծիք արտահայտելու եւ այդ կարծիքի համար պայքարելու որեւէ արգելք: Մեր դռները բաց են բոլոր պրագմատիկ մարդկանց համար, ովքեր քաղաքականությունը հեքիաթից իրոք տարբերում են: Հայաստանին անհրաժեշտ են լուրջ բարեփոխումներ, առանց ցնցումների ներքին կայուն վիճակ, զարգացում եւ առաջընթաց: Հայաստանին անհրաժեշտ է ներկայանալի նոր ղեկավարություն, որն աշխարհին կներկայացնի իրոք բարեփոխված Հայաստան: Հայաստանի քաղաքացին արժանի է լավ ապրելուն, առողջ եւ անվտանգ կյանք ունենալուն: Պատերազմների ու զրկանքների, անկայունության եւ աշխարհաքաղաքական պայքարների հորձանուտում հայտնված Հայաստանը պետք է կրկին վերածնվի` դառնալով հեղինակություն վայելող, ուժեղ տնտեսությամբ եւ անվտանգությամբ երկիր: Մենք հավատում ենք, որ դա հնարավոր է: Մենք միասին պետք է անցնենք այս ճանապարհը, եւ եթե պատրաստ եք՝ ի գործ»:

Ռեֆորմիստների կուսակցության գործադիր մարմնի անդամ ՆԱՏԱԼՅԱ ՍԱՂԻՅԱՆՆ էլ անդրադարձավ իրենց արտաքին քաղաքական օրակարգին` մասնավորապես շեշտելով. «Անհրաժեշտ է վերականգնել նորմալ, արդյունավետ փոխգործակցությունը ռազմավարական դաշնակցի՝ Ռուսաստանի Դաշնության հետ: Երկու երկրների քաղաքակրթական միասնությունը չի կարող լինել սակարկության առարկա: Մենք ակնկալում ենք Ռուսաստանի կողմից հատուկ ռազմական օպերացիայի հաղթական ավարտ եւ շուտափույթ խաղաղություն, ինչը կնպաստի բազմաբեւեռ աշխարհակարգի ամրապնդմանը»:

ՀՐԱՆՏ ՍԱՐԱՖՅԱՆ

Այս թեմայով ԵՄ-ն հանձնառու է աջակցել Հայաստանի ազգային անվտանգությանը, կարող եք ապավինել մեզ. ԵԽ նախագահ ԵՄ-ն ուժգնորեն աջակցում է ՀՀ-ի սոցիալ-տնտեսական բարեփոխումների օրակարգին. ԵԽ նախագահ Մաքսիմ Գալկինն Ալեն Սիմոնյանի հետ գնացել է Գառնի. Լուսանկարներ Այսօր ժամը 7:00-ից 19:00-ն փակ են լինելու հետեւյալ փողոցները Եվրոպան կհավաքվի ՀՀ-ում` կոլեկտիվ դիմադրողականությունը ամրապնդելու համար․ ԵԽ նախագահ