Մենք չենք կարող պարզապես բան անել բան անելու համար, լուրջ պատրաստության շրջանի մեջ ենք. Բագրատ սրբազան

Քաղաքական ուժերի հետ տեղի ունեցած հանդիպումից հետո «Իրավունքը» բացառիկ զրույց է ունեցել Կիրանցից մեկնարկած եւ Երեւան հասած շարժման առաջնորդ Տ. ԲԱԳՐԱՏ արքեպիսկոպոս ԳԱԼՍՏԱՆՅԱՆԻ հետ:

— Ինչպե՞ս կգնահատեք քաղաքական ուժերի հետ հանդիպումը եւ ի՞նչ փակագծեր կարող եք բացել:

— Նախ երկար ժամանակ` շարժման սկզբից ի վեր, տարբեր հանդիպումներ ունեցել ենք: Բայց ընդհանուր իմաստով այս հանդիպումն արդյունքների արձանագրման, որոշակի մարտավարության ձեւավորման, մինչեւ հիմա մեր գնահատականները տալու եւ առաջիկան ինչպես  շարունակելու մասին քննարկում էր: Եղավ առաջարկ` երկու շաբաթը մեկ ավելի կանոնավոր հանդիպելու, միեւնույն ժամանակ տարբեր առաջարկներ եղան` քաղաքական խորհրդի ձեւավորման իմաստով, թե ինչ ճանապարհով շարժվենք, որն ավելի արդյունավետ կլինի: Այդ խորհուրդը մեծ  պետք է լինի, թե` փոքր: Այնպես որ, շատ աշխատանքային եւ կառուցողական քննարկում էր:

— Սրբազան հայր, վերջնարդյունքում ձեւավորվե՞ց Ձեր նշած քաղաքական խորհուրդը:

— Դեռ չի ձեւավորվել: Քաղաքական խորհուրդն իրականում, որպես այդպիսին, գոյություն ունի, միայն մնում է հասկանակալ` ինչ հարթակներով, ինչ կերպով պետք է լինի` մասնակցության, որոշումների կայացման առումով: Օրինակ` լինի խորհրդակցական, թե` այլ կերպ: Սա դեռ առաջին հանդիպումն էր այդ հարցի շուրջ:

— Իսկ հետագա պայքարի ճանապարհները, լուծումները քննարկեցի՞ք: Ըստ էության, խորհրդանարով անվստահություն հայտնել Նիկոլ Փաշինյանին չհաջողվեց, խորհրդարանական ընդդիմությունը մանդատները վայր չի դնում, դա էլ անցանք, հետո՞ն ինչ է լինելու:

— Դրանք քաղաքական լուծումներ են: Բոլոր քաղաքական լուծումներն էլ հասկանալի են, պատկերացնելի են, բայց խնդիրը դրանց նպատակահարմարության հետ է կապված: Այնպես չէ, որ մեկ լուծման վրա կենտրոնացած ենք, մնացածը անտեսված են կամ երեքի վրա կենտրոնացված ենք, մեկը դուրս է թողնված: Պարզապես, պատկերացումները տարբեր են, մոտեցումները` եւս: Ավելի կհստակեցվի, այսպես ասած, ճանապարհները, մեթոդները, նաեւ մարտավարությունը, թե ինչպես կլինի: Բոլոր տարբերակներն էլ ընդունելի են, բացառված տարբերակ չկա: Մեզ համար կարեւորը արդյունքի արձանագրումն է, թե հիմա ինչ կերպով եւ ինչպես կհասնենք արդյունքի արձանագրման, սա էլ արդեն գործունեությունից է կախված:

— Ձեր նշած վերջնագրերով, որ մեկ ժամ, հետո 72 ժամ ժամանակ եք տալիս` Նիկոլ Փաշինյանին հրաժարական տալու համար, ոչինչ չստացվեց: Կարելի՞ է ասել, որ Ձեզ որոշակի խոստումներ էին տվել, հետո խաբեցի՞ն:

— Հիմա հետ չգնանք, սրանք իրադարձություններ են, որոնք արձանագրվում են, վերատեսության են ենթարկվում: Մեզ համար պատկերը շատ պարզ է, ես ուզում եմ հստակ ասել` այս դաշտում նախ մենք պետք է գործենք համախոհությամբ: Իսկ թե հիմա մի ժամ էր տրված, 10-ը ժամ էր, կարեւոր չէ: Կարեւորը վերջնարդյունքին հասնելն է: Այն սկզբունքն է դրված, որ հրաժարականի պահանջն անբեկանելի եւ անփոխարինելի է:

— Իսկ չե՞ք պատրաստվում հստակեցնել, թե հրաժարականը պահանջելով հանդերձ` ի՞նչ վեկտոր ունի Ձեր շարժումը: Ի վերջո, Եվրամիության անդամակցմանը կո՞ղմ եք, ինչպե՞ս եք վերաբերվում ՀԱՊԿ-ից դուրս գալու մասին հայտարարություններին, թե՞ էլի ասելու եք` այս շարժումը քաղաքական երբեք չի կարող լինել, ինչը փշոտ է ընկալվում հանրության կողմից:

— Այո՛, հոգեւոր, բարոյական էություն ունի այս շարժումը: Իսկ թե՛ վեկտորների հետ կապված, թե՛ մնացած հարցերի, ես պաշտոնական իմաստով հրապարակում ներկայացրել եմ, շարժման մեջ ներգրավված մարդիկ խոսել են: Եթե անհրաժեշտություն կա փաստաթղթավորելու, դա էլ կարվի, ոչ մի խնդիր չկա:

— Քանի որ շարժումն ունի բարոյական, հոգեւոր էություն, Դուք դատապարտո՞ւմ եք, որ Երեւանում փորձ կատարվեց ԼԳԲՏ շքերթի իրականացման:

— Ես չեմ էլ լսել այդ մասին:

— Էլ չասենք, որ աղանդավորական մեծ հավաքներ են տեղի ունենում վերջին շրջանում…

— Անընդհատ էլ տեղի են ունենում: Հիմա մենք դրանցով շեղվելու բան չունենք:

— Պարզապես, երբ ընդգծում եք, որ շարժումը նախեւառաջ հոգեւոր է, մարդիկ ակնկալում են, որ առաջին հերթին պետք է պայքարեք նաեւ այս ամենի դեմ:

— Շարժումը մեկի դեմքո՞վ է:

— Ասոցացվում է Ձեր անձի հետ, Դուք եք առաջնորդում այն:

— Անձնականացրել են, բայց մեկի դեմքով չէ շարժումը: Շարժումն այն մարդիկ են, ովքեր ներգրավված են: Այն, ինչ Դուք ասացիք, ես տեղեկություն չունեմ դրա մասին, չգիտեմ էլ` երբ է եղել, ինչ է, տեղյակ էլ չեմ: Մենք ուղի ունենք գծած գնալու, իսկ մնացած հարցերը շարժման անդամներն իրենց նախաձեռնությամբ կարող են դրանց լուծումները տեսնել:

— Իսկ առաջիկայում նոր հանրահավաք, նոր գործողություններ սպասե՞լ, թե՞ հետագա քայլերը կլինեն արդեն աշնանը:

— Ըստ անհրաժեշտության տեղի կունենան, մենք չենք կարող պարզապես բան անել բան անելու համար, մենք լուրջ պատրաստության շրջանի մեջ ենք գտնվում: Ինչպես տեսնում եք, մեր մարզային այցելությունները շատ կարեւոր բացահայտումների հետ են կապված: Մեր ժողովուրդն ինֆորմացիոն պատրանքի մեջ է գտնվում: Թվում է, թե Ներքին Հանդի, Շուռնուխի բնակիչները համակերպված են, ինչ կա որ, բայց պատկերը լրիվ այլ է, եւ սա շատ կարեւոր ընթացք է:

ՀՐԱՆՏ ՍԱՐԱՖՅԱՆ

Այս թեմայով 2-ամյա Տիգրանի ծնողների հույսը Աստված է Երկիրը իրենց հորական տունը չի, որ հանձնեն ու դրա դիմաց խաղաղություն ուզեն. Բագրատ Սրբազան (տեսանյութ) «Իմնեմնիմի»-ի գործով կայացվեց արդարացման վերդիկտ Ուրախ եմ, որ ավագանին միասնական էր. Գերաշնորհ Տեր Միքայել արքեպիսկոպոս Աջապահյան Սրբազան պայքարի երիտասարդների պատասխանը Վահագն Ալեքսանյանին