«ՀՈՒԶՄՈՒՆՔԻՑ ԱՉՔԵՐՍ ԼՑՎԵՑԻՆ ՌԻՆԳՈՒՄ...». ԲՌՆՑՔԱՄԱՐՏԻ ԱՇԽԱՐՀԻ ՓՈԽՉԵՄՊԻՈՆ ԴԱՎԻԹ ՉԱԼՈՅԱՆ

Iravunk. com -ի մարզական թղթակիցը Գյումրիում հանդիպել է ու զրուցել, Թաիլանդի Բանգկոկ քաղաքում կայացած Բռնցքամարտի Օլիմպիական վարկանիշային մրցաշարի ժամանակ, Փարիզի Ամառային Օլիմպիական 33-րդ խաղերի ուղեգիր նվաճած, Աշխարհի փոխչեմպիոն, ծնունդով Շիրակի մարզի Ախուրյան համայնքի Այգաբաց գյուղից, կաշվե ձեռնոցի մարտիկ ԴԱՎԻԹ ՉԱԼՈՅԱՆԻ հետ։

- Ողջույն, Դավիթ։ Շնորհավորում ենք Օլիմպիական խաղերի ուղեգիր նվաճելու առթիվ։ Հետաքրքիր է, թե ինչ զգացողություններ առաջացան քեզ մոտ։

- Շատ շնորհակալ եմ։ Իսկապես, շատ դժվար մրցաշար էր։ Այս մրցաշարում մեր վերջին շանսն էր, դրա համար էլ շատ բարդ էր, շատ մեծ էր պատասխանատվությունը։ Աշխարհի առաջնության նման բարդ մրցաշար էր, նույնիսկ Աշխարհի առաջնությունից էլ ավելի լարված ու դժվար, ու շատ ուրախ եմ, որ հաջողվեց պատվով հանդես գալ ու նվաճել Օլիմպիական խաղերի ուղեգիր։ Նշեմ, որ Օլիմպիական խաղերին մասնակցելն ինձ համար մեծ երազանք է եղել։ Շատ ուրախ եմ, որ վերջապես կարողացա նվաճել ուղեգիր։ Այդ պահին ուրախությունից, հուզմունքից աչքերս լցվեցին ռինգում, երբ հասկացա ուղեգիր եմ նվաճել։ Աննկարագրելի զգացողություններ առաջացան։ Այս մրցաշարին մեկնել էի մեկ նպատակով ուղեգիր նվաճելու համար։ Հաղթանակս նվիրում եմ իմ ամբողջ հայ ազգին, մոր բոլոր զինվորներին ու մաղթում ամենակարևորը խաղաղ, անփորձանք ծառայություն։ - Հետաքրքիր է, թե որ մենամարտը կարող ես առանձնացնել։

- Ուղեգիրը նվաճելու համար երեք մենամարտ ունեցա։ Սակայն, ուզում եմ առանձնացնել երկրորդ մենամարտը, որը շատ բարդ ու ծանր ստացվեց։ Այստեղ իմ մրցակիցն Իրանի Իսլամական Հանրապետությունը ներկայացնող բռնցքամարտիկ էր։ 1/8 եզրափակչում 5։0 հաշվով հաղթեցի նրան։ Կարող եմ առանձնացնել նաև քառորդ եզրափակիչը ազգությամբ իռլանդացի Մարտին Մաքդոնագի դեմ։ Նա շատ անհարմար հակառակորդ էր։ Նշեմ, որ շատ մեծ է պատասխանատվությունը, որովհետև մեր երկրի միակ ներկայացուցիչն եմ լինելու այս մարզաձևից, հուսով եմ ամեն ինչ լավ կստացվի։Շատ լավ եմ տրամադրված։

- Շնորհակալություն, Դավիթ, մեզ ժամանակ տրամադրելու համար։ Սպասենք արդեն քո հաջող մրցելույթներին Փարիզում։ - Ես էլ շատ զգացված եմ, անխափան գործունեություն Ձեր թերթին։

Հավելենք, որ Փարիզում կայանալիք Օլիմպիական խաղերին շատ քիչ ժամանակ է մնացել, այն կմեկնարկի հուլիսի 26-ին ու կտևի մինչև օգոստոսի 11-ը։Դավիթ Չալոյանը, լավ բռնցքամարտիկ լինելուց զատ, նաև շատ հիանալի մարդ է։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Շախմատի համաշխարհային օլիմպիադա. Հայաստանի հավաքականը 6 խաղափուլից հետո 3-րդ տեղում է Եվրոպայի առաջնությունում այսօր ռինգ դուրս կգա Հայաստանի երեք ներկայացուցիչ Սիրո անունը Հայաստան է․ Սպարտայի ջերմ գրառումը Արարատ-Արմենիայի հետ խաղից հետո Բռնցքմարտի ԵԱ-ում այսօր Հայաստանն ունի 5 բռնցքամարտիկ ԲՌՆՑՔԱՄԱՐՏԻ ԵԱ. ՀԱՅԱՍՏԱՆՆ ՈՒՆԻ 4 ՆԵՐԿԱՅԱՑՈՒՑԻՉ