Երեւանի ամենահայտնի բակը կորցրեց իր ամենասիրելի բնակիչներից մեկին՝ դրական ու հմայիչ Լալային

Երեւանցիների ամենահարազատ բակն այսօր կորցրեց իր ամենասիրելի բնակիչներից մեկին՝ Լալային՝ խարիզմատիկ, բարի, հումորով, ժպտացող ու ժպիտ տվող, հմայիչ Լալա Մնացականյանին։ Երեւանյան առավոտը տխուր էր՝ ՀՀ վաստակավոր արտիստի մահվան լուրից։ 

Լալա Մնացականյանը հանկարծամահ է եղել 66 տարեկանում՝ իր ետեւում թողնելով իր տարիներից ավելի հագեցած կյանք՝ լի արվեստով, հումորով ու անմոռանալի կերպարներով, որոնցից ամենատպավորիչը, թերեւս, «Մեր Բակի» Լալան էր՝ Աշոտի ու Հրանտի անդավաճան ընկերը, որը բակի մյուս բնակիչների հետ հին երեւանյան կոլորիտի ամենավառ հերոսուհիներից էր։

Լալա Մնացականյանը ծնվել է Երեւանում՝ հոկտեմբերի 8-ին։ Մայրը՝ Էլիզա Գյուլեսերյանը, դերասանուհի էր, հայրը՝ Բաբկեն Մնացականյանը, մաթեմատիկոս։ Դերասանուհու մասնագիտությունը նա վաղուց էր ընտրել։ Դպրոցն ավարտելուն պես ընդունվել է Երեւանի պետական գեղարվեստա-թատերական ինստիտուտի թատրոնի եւ կինոյի դերասանական բաժինը, որն ավարտել է կարմիր դիպլոմով։ 

Դերասանուհին բազմաթիվ հերոսուհիների է կերտել՝ ինչպես թատրոնում, այնպես էլ ֆիլմերում։ Նա ավելի քան 140 մանրապատումների հեղինակ է։ Նա նկարահանվել է «Մանուկով աղախին» (1984), «Ուսուցչուհի» (1992), «Ամանորը մեր անբաժան ընտանիքում» (2015), «Ճամբարում» (2015), «Մանյունյա» (2020) եւ մի շարք այլ ֆիլմերում, իսկ 1996-ին առաջին անգամ հայտնվել է «Մեր բակի» Լալայի դերում։ Դերասանուհին 25 տարի անց՝ 2021 թ-ին, սիրելի հերոսուհուն մարմնավորել է նաեւ «Մեր բակը 25 տարի անց» կատակերգությունում։ 

Լալա Մնացականյանը բազմերանգ դերերով հանդես է եկել նաեւ հայտնի սիթքոմներում եւ սերիալներում, որոնց թվում են՝ «Ընտանյոք հանդերձ», «Ոսկե դպրոց», «Հյուրերն անցյալից»։

Այս թեմայով Մենք լուռ շատ միավորվողներ ունենք, որոնք ամեն վայրկյան սպասում են հարցի դրական լուծմանը. Սիոն արքեպիսկոպոս Ադամյան Ողջ պետական ռեպրեսիվ համակարգը օգտագործում է, բայց պարտվում է.Աղազարյանը Վեհափառի դեմ արշավի մասին Թող Ձեր մասնագիտական ձեռագիրը դառնա իրավաբանության հիմնասյուններից մեկը. «Իրավունքի» շնորհավորանքը հայտնի փաստաբանին «Ժողովուրդ». Երեւանի քաղաքապետարանը գնումներ է կատարել ավագանու ՔՊ-ական անդամի ընկերությունից Երբեք ուշ չէ գտնել երկրորդ կեսին. առաջնախաղ Պարոնյանում