«ԳԼԽԱՎՈՐ ՄՐՑԱԿԻՑՍ ԱՆՁԱՄԲ ՄՈՏԵՑԱՎ ՈՒ ԱՓՍՈՍԱՆՔ ՀԱՅՏՆԵՑ ՄԵՆԱՄԱՐՏԻ ՉԵՂԱՐԿՄԱՆ ՀԱՄԱՐ».ԿԱՐԱՏԵԻ ԱՇԽԱՐՀԻ ԿՐԿՆԱԿԻ ԳԱՎԱԹԱԿԻՐ ՎԱՐԴԱՆ ԱԴԱՄՅԱՆ

Վերջերս Հայաստանի կյոկուշին կարատեի հավաքականը 15 մեդալ է նվաճել Թուրքիայում կայացած «WKB» վարկածով Եվրոպայի պատանիների, երիտասարդների ու մեծահասակների 7-րդ առաջնությունում։ Հայաստանի թիմը նվաճել է 4 ոսկե, 4 արծաթե և 7 բրոնզե մեդալ։ Ֆեդերացիայի նախագահ ՍՊԱՐՏԱԿ ԳԱՍՊԱՐՅԱՆԸ, Iravunk. com -ի մարզական թղթակցի հետ զրույցում նշեց. - Մեր թիմի կազմում Եվրոպայի չեմպիոններ են հռչակվել ու ոսկե մեդալի արժանացել Ալեն Հովհաննիսյանը, Հովհաննես Մալաջյանը, Սարգիս Հարությունյանը և Տիգրան Ալավերդյանը։ Արծաթե մեդալակիրներ են դարձել Վարդան Ադամյանը, Էմիլ Աբրահամյանը, Վազգեն Գրիգորյանը և Մնացական Նահապետյանը, իսկ Վարազդատ Գասպարյանը, Կարեն Հակոբյանը, Զոհրաբ Մելքոնյանը, Արարատ Մանուկյանը, Էրիկ Ազիզբեկյանը, Նորայր Մուրադյանը և Վարդան Հովհաննիսյանը դարձել են բրոնզե մեդալակիրներ։ Նշեմ, որ այս մրցաշարին մասնակցում էին 20 երկրի 600-ից ավելի մարզիկներ։ Մենք մրցավայր էինք մեկնել 37 մարզիկով ու 7 մարզիչով։ 37 մարզիկից 15-ը մեդալ են նվաճել, ճիշտ է գերազանց արդյունք չէ, բայց լավ է, կարող էինք ավելին անել, մի փոքր շտապեցին մեր մարզիկները։ Նշեմ, որ ի զարմանս բոլորի, Թուրքիայում ամեն ինչ լավ անցավ, ու մեզ համար որևէ խոչընդոտ չստեղծեցին, այսինքն ուզում եմ ասել, որ սպորտը քաղաքականության հետ չխառնեցին։ Նույնիսկ մեր սպասածից ավելին եղավ, մեր անվտանգությունը պահպանում էին։ Նշեմ ուրախալի փաստի մասին, այս տարի Երևանում կկայանա «WKF» վարկածով կյոկուշին կարատեի Եվրոպայի առաջնությունը։ Իսկ արծաթե մեդալակիր, Աշխարհի կրկնակի գավաթակիր, Եվրոպայի փոխչեմպիոն, միջազգային մրցաշարերի հաղթող ՎԱՐԴԱՆ ԱԴԱՄՅԱՆԸ նշեց. - 1/4 եզրափակչում ուկրաինացի մրցակցի դեմ բավականին ծանր մենամարտ ունեցա։ Հաղթեցի ծանր վնասվածք ստանալով, սակայն իմ կողմից անհավանական որոշում կայացվեց, մենամարտել եզրափակչի ուղեգրի համար այն էլ ղազախ մրցակցի հզոր մարզիկի դեմ։ Մենամարտը, ինչպես և սպասվում էր, ծանր ստացվեց, սակայն հաղթանակ տարա ու մտա եզրափակիչ փուլ։ Եզրափակիչն այդպես էլ չկայացավ բժիշկների խիստ միջամտության արդյունքում, ու միայն դժվարությամբ համաձայնվեցի այս անգամ լինել երկրորդը։ Այս դրվագը անտարբեր չթողեց նաև մրցակից հավաքականներին, նրանք մոտենում ու քաջալերում էին ինձ։ Գլխավոր մրցակիցս անձամբ մոտեցավ ու ափսոսանք հայտնեց մենամարտի չեղարկման համար ու շուտափույթ ապաքինում ցանկացավ։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ