Ջրհեղեղը կարող էր շատ ավելի քիչ վնաս պատճառել, եթե կանխարգելիչ միջոցառումներ ձեռնարկվեին. մասնագետ

Լոռու և Տավուշի մարզերում ջրհեղեղը կարող էր շատ ավելի քիչ վնաս պատճառել, եթե կանխարգելիչ միջոցառումներ ձեռնարկվեին: Այս մասին ասել է Հայաստանի ԱԻՆ ճգնաժամային կառավարման կենտրոնի նախկին պետ, գնդապետ Հովհաննես Խանգելդյանը:

Հնարավոր վարարումների համար գետերի մոնիտորինգն իրականացվել է անարդյունավետ, և դա կառավարության հիմնական բացթողումն է, ասել է նա SputnikARM-ին տված հարցազրույցում։

«Հետագա գործողությունները կա՛մ կիսատ են եղել, կա՛մ ընդհանրապես ոչինչ չի արվել. մարդիկ չեն տարհանվել վտանգավոր տարածքներից և նախապատրաստված չեն եղել հնարավոր վտանգի համար»։

Այս խնդրին «Իրավունքն» անդրադառնալու առիթ ունեցել է` ֆիքսելով, որ պատկան ծառայությունները ոչ միայն որեւէ քայլ չեն ձեռնարկել հեղեղումների վտանգին ընդառաջ, այլ այն տպավորությունն է, որ գտնվել են «էշի ականջում քնած» վիճակում` պատկերացում անգամ չունենալով սպասվող առհավիրքի մասին: Մինչեւ այն պահը, երբ հեղեղն իր ողջ հզորությամբ հարվածել է գիշերը հանգիստ քնած բնակչությանը: Այս դեպում, հաշվի առնելով ծայրահեղ ծանր հետեւանքները, միանգամայն կոնկրետ չինովնիկներ արդեն իսկ պետք է հանցավոր անփութության մեղադրանքով կալանքի տակ լինեին:

Բայց որեւէ չինովնիմի անգամ հասարակ նկատողություն, որքան տեղյակ ենք, տրված չէ: Իսկ դա առաջ է քաշում այլ տրամաբանություն. տեղյակ են եղել սպասվող վտանգին, սակայն դիտավորյալ մարդկանց չեն զգուշացրել: Թե ինչու, կարելի է մի շարք վարկածներ ներկայացնել:

Որ տարբերակով էլ շարժվենք, տեղի ունեցած հերթական հանցագործությունն է ժողովրդի հանդեպ: