«ՎԱՂԱԺԱՄ ՀԱՂԹԱՆԱԿ ԵՄ ՏՈՆԵԼ ԱԴՐԲԵՋԱՆՑԻ ՀԱԿԱՌԱԿՈՐԴԻՍ ՆԿԱՏՄԱՄԲ». ՈՒՇՈՒ - ՍԱՆԴԱՅԻ ԵՎՐՈՊԱՅԻ ՉԵՄՊԻՈՆ ԴԱՎԻԹ ՎԱՐԴԱՆՅԱՆ

Iravunk. com-ի մարզական թղթակիցը, բացառիկ զրույց է ունեցել, վերջերս Շվեդիայի մայրաքաղաք Ստոկհոլմում կայացած Ավանդական ուշու - սանդայի Եվրոպայի 19-րդ առաջնությունում ոսկե մեդալ նվաճած, Եվրոպայի նորընծա չեմպիոն ԴԱՎԻԹ ՎԱՐԴԱՆՅԱՆԻ հետ։ Նա այսպես մեկնաբանեց իր հաղթական մրցելույթները. - 65 կգ քաշային կարգում եմ հանդես եկել։ Մեկնարկային մենամարտի ժամանակ վաղաժամ հաղթանակ եմ տոնել ադրբեջանցի հակառակորդիս նկատմամբ։ Մենամարտի առաջին ռաունդում զիջեցի նրան, սակայն երկրորդ ու երրորդ ռաունդներում շատ մեծ առավելությամբ հաղթեցի։Տեղյակ էի, որ ադրբեջանցի մրցակից պիտի ունենամ, բայց չգիտեի, որ հենց մեկնարկում եմ պայքարելու նրա դեմ։ Նշեմ, որ ադրբեջանցի մարզիկը բավականին տիտղոսակիր մարզիկ էր, Եվրոպայի վեցակի չեմպիոն, Աշխարհի բրոնզե մեդալակիր ու 33 տարեկան էր, իսկ ես 19 տարեկան եմ։ Որքան էլ զարմանալի թվա, այս մարզաձևում թույլատրվում է նման մեծ տարիքային տարբերություն։ Երկրորդ մենամարտում էլ հաղթեցի ազգությամբ շվեդ մրցակցիս 2։0 հաշվով, իսկ եզրափակչում հաղթեցի վրացի մրցակցիս։ Եվրոպայի չեմպիոն դարձա, շատ մեծ ուրախություն ապրեցի, աննկարագրելի զգացողություններ առաջացան, երբ հնչեց մեր երկրի հիմնը, ծածանվեց եռագույն դրոշը։Առաջին անգամ դարձա Եվրոպայի չեմպիոն, սա ինձ համար շատ մեծ պատասխանատվություն է, մեծ բեռ իմ ուսերին, որ ձգտեմ ու հասնեմ ավելիին, քանի որ չեմպիոնությունը պահելը դժվար է։ Պիտի առաջ շարժվեմ ու նվաճեմ նաև Աշխարհի չեմպիոնի տիտղոսը։

Անձնական մարզիչս Գևորգ Ալիխանյանն է, շատ շնորհակալ եմ նրան ջանք ու եռանդ չխնայելու համար։ Իսկ ահա Դավթի անձնական մարզիչը ԳԵՎՈՐԳ ԱԼԻԽԱՆՅԱՆԸ, ով նաև հավաքականի երիտասարդների գլխավոր մարզիչն է, այսպես ամփոփեց մրցաշարը.«7 ոսկե մեդալ երբևէ չէինք նվաճել Եվրոպայի առաջնությունից, եղել էր 2 մեդալ նախորդ տարիներին։ Մեր մարզիկները պատմություն կերտեցին, սա իսկապես աննախադեպ նվաճում էր, մեր սպասվածից նույնիսկ ավելին եղավ, բոլորն էին զարմացած, մյուս երկրները մեզանից օրինակ էին վերցնում։ Մրցաշարին մասնակցում էին 31 երկրների 1048 մարզիկներ։

Ուշու - սանդան Օլիմպիական ընտանիք է մտել արդեն փորձնական, եթե լինի մշտական կազմում, շատ լավ կլինի»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ