Կոչ ենք անում սթափվել եւ հրաժարվել նման խայտառակ գործելաոճից հանդեպ մեր Սուրբ Եկեղեցին. Կենտրոնական Եվրոպայի եւ Սկանդինավիայի հայրապետական պատվիրակություն

Կենտրոնական Եվրոպայի եւ Սկանդինավիայի հայրապետական պատվիրակությունը հայտարարությամբ է հանդես եկել, որում մասնավորապես ասված է.

«Տարակուսանքով ականատես եղանք, թե ինչպես մայիսի 28-ին՝ Հայաստանի Առաջին Հանրապետության հռչակման տոնին, Սարդարապատի հուշահամալիրում ոստիկանները և կառավարության անվտանգության աշխատակիցները, բռնի ուժ կիրառելով հոգևորականների նկատմամբ, փորձեցին խոչընդոտել Ն․ Ս․ Օ․ Տ․ Տ․ Գարեգին Բ Ամենայն Հայոց Կաթողիկոսի և ուղեկցող հոգևորականների մուտքը հուշահամալիր։ Խստորեն դատապարտում ենք այս ապազգային գործելաոճը, որը մեծ խայտառակություն է մեր համազգային կյանքում և համահունչ չէ նաև ժողովրդավարական արժեքներին։ Այս քստմնելի երևույթի ամբողջ պատասխանատվությունը կրում են ՀՀ ներկա իշխանությունները։

Արձանագրված փաստ է, որ Սարդարապատի սխրանքն իրագործվել է Սուրբ Էջմիածնի օրհնությամբ և օրվա Հայոց Հայրապետի ոգեշնչումով ու հայ հոգևորականության գործուն մասնակցությամբ։ Ուստի երեկ տեղի ունեցած միջադեպը Հայ Եկեղեցու, Վեհափառ Հայրապետի և հոգևորականության դեմ գնահատում ենք որպես հերթական ամոթալի ոտնձգությունը հոգևոր մեր արժեքների, ինչպես նաև մեր փառավոր անցյալի նկատմամբ։

 

Մեր որդիական սերը և զորակցությունն ենք հայտնում Նորին Սրբությանը և, վերստին խստիվ դատապարտելով իշխանությունների ապազգային ընթացքը, կոչ ենք անում սթափվել և հրաժարվել նման խայտառակ գործելաոճից հանդեպ մեր Սուրբ Եկեղեցին, ինչը վիրավորական է աշխարհասփյուռ հայ հավատացյալների համար»: