Ժամանակը ցույց կտա՝ ինչ եզրահանգումներ անել. ՀՀ-ում Բելառուսի դեսպան

2805Hrant-2+

«ԺԱՄԱՆԱԿԸ ՑՈՒՅՑ ԿՏԱ՝ ԻՆՉ ԵԶՐԱՀԱՆԳՈՒՄՆԵՐ ԱՆԵԼ». ՀՀ-ՈՒՄ ԲԵԼԱՌՈՒՍԻ ԴԵՍՊԱՆ

Նիկոլ Փաշինյանն ԱԺ ամբիոնից հայտարարեց, որ 2020 թվականիի 44-օրյա պատերազմի նախապատրաստությանը մասնակցել են ոչ մեր կողմից մեր դաշնակիցները։ Նա ընդգծեց, որ ՀԱՊԿ առնվազն 2 երկիր գիտի, որ մասնակցել է մեր դեմ պատերազմի նախապատրաստությանը։ Ըստ նրա` այդ երկրները իմիտացիա են ստեղծել, որ մեզ ուզում են օգնել, թե կամ իբր մեզ օգնել են, մինչդեռ նրա գնահատմամբ՝ այդ պատերազմը նույնիսկ Լեռնային Ղարաբաղի մասին չի եղել․ իրենք իրենց մեջ վաղուց Լեռնային Ղարաբաղի հարցը փակել են։ Այս եւ այլ հարցերի մասին «Իրավունք»-ը զրուցել է ՀՀ-ում Բելառուսի արտակարգ եւ լիազոր դեսպան ԱԼԵՔՍԱՆԴՐ ԿՈՆՅՈՒԿԻ հետ:

— Պարոն դեսպան, ինչպե՞ս եք վերաբերվում խորհրդարանական ամբիոնից Նիկոլ Փաշինյանի հնչեցրած վերոնշյալ հայտարարությանը:

— Ես դիվանագետ եմ եւ գնահատականներ չեմ տա: Հիմա չեմ խոսի այդ մասին: Ժամանակը ցույց կտա, թե ինչ քաղաքական գնահատականներ պետք է տալ եւ ինչ եզրահանգումներ անել:

— Հայաստանում բավական սուր ընկալվեց այն, որ Ձեր նախագահը՝ Ալեքսանդր Լուկաշենկոն, Ադրբեջանի նախագահի հետ հանդիպման ժամանակ ասում էր, թե հիշել է իրենց զրույցը 44-օրյա պատերազմից առաջ՝ որակելով այն ադրբեջանցիների համար «ազատագրական պատերազմ»: Ավելին՝ նա նշել էր, որ այդ ժամանակ իրենք եզրակացրել էին, որ պատերազմում կարելի է հաղթել։ Ինչպե՞ս սա կմեկնաբանեք:

— Ի դեպ, այդ հայտարարությունն այդքան էլ սուր չընդունվեց: Ընդհանրապես ես կարծում եմ, որ յուրաքանչյու երկիր, երկրի ղեկավարություն իրավունք ունի անել այն, ինչ համարում է ճիշտ: Կարեւորը, որ դա չլինի՝ ի վնաս այլ երկրի: Այնպես որ, չէի ասի, թե եղավ խիստ արձագանք, ես դա չեմ տեսել: Նույն կերպ եւ Հայաստանի ղեկավարությունը անում է քայլեր, որոնք ինչ-որ մեկին կարող է դուր չի գալիս, բայց դա նրանց իրավունքն է: Սա յուրաքանչյուր երկրի սուվերեն իրավունքն է:

— Կա կարծիք, թե Բելառուսի նախագահի նման հայտարարությունը պայմանավորված է նրանով, որ Եվրախորհրդարանում Եվրանեսթի կոնգրեսի ժամանակ հանդիպել են Բելառուսի ընդդիմության առաջնորդ, նախագահի նախկին թեկնածու Սվետլանա Տիխանովսկայան եւ ԱԺ նախագահ Ալեն Սիմոնյանն ու ինչ-ինչ հարցեր քննարկել…

— Իմ նախագահը՝ Ալեքսանդր Գրիգորիչ Լուկաշենկոն, իրավունք ունի ասել եւ անել այն, ինչ համարում է ճիշտ: Իմ գործը՝ որպես դիվագահետի, կատարելն է նրա հրամանները: Սահմանափակվենք այսքանով:

— Առհասարակ, Ձեր գնահատմամբ՝ ի՞նչ հարցեր, խնդիրներ կան այսօր հայ-բելառուսական հարաբերություններում:

— Ես գտնում եմ, որ առանց խնդիրներ հարաբերություններ չեն լինում, նույնիսկ` ամենալավ դասավորության դեպքում: Բայց այսօր ես, իմ դերը, որպես Բելառուսի դեսպան, տեսնում եմ տնտեսական հարաբերությունների զարգացման մեջ: Եթե նայենք վերջին տարիների զարգացումներին, մենք ավելացրել ենք ապրանքաշրջանառությունը Հայաստանի եւ Բելառուսի միջեւ ավելի քան 4 անգամ: Ես համարում եմ, որ սա կարեւոր է: Մեր նախագահը մշտապես ասում է՝ եթե լինի նորմալ տնտեսություն, ուրեմն՝ ամեն ինչ կլինի երկրում լավ, եւ քաղաքական հարցերն էլ ավելի հեշտ կլինի լուծել: Դրա համար ես կարծում եմ, որ դիվանագետներիս առաջադրանքն է առաջին հերթին զարգացնել տնտեսական հարաբերությունները:

— Իսկ որքանո՞վ են Բելառուսի արտադրողները հետաքրքրված հայկական շուկայով:

— Դուք գիտեք, թե ինչ է նշանակում բելառուսական արտադրանք, շատ որակյալ են, գիտեմ, որ հայերը շատ են սիրում: Մենք ջանում ենք բավարարել շուկան այնքան, որքան հնարավոր է, որովհետեւ լոգիստիկան է բարդ: Մենք նախորդ տարի բացեցինք համատեղ արտադրություն՝ Վայոց ձորում, Երեւանում եւս պատրաստվում ենք: Հայ-բելառուսական վերելակներն այսօր պատրաստվում են մի մասն այստեղ, մեծ մասը՝ Բելառուսում:

ՀՐԱՆՏ ՍԱՐԱՖՅԱՆ

Այս թեմայով Քվեարկողների շատ մեծ հոսք է, հայկական կողմն ապահովում է անվտանգությունը. ՀՀ-ում ՌԴ դեսպան ՌԴ դեսպանը այցելել է Զանգեզուրի և Ագարակի պղնձամոլիբդենային կոմբինատներ Պակիստանն առաջին անգամ դեսպան ունի Հայաստանում. նա իր հավատարմագրերն է հանձնել Խաչատուրյանին «Ժողովուրդ». Փաշինյանը ՌԴ-ում ՀՀ դեսպան է փնտրում Ռուս քաղաքագետ. Հայաստանի դեսպանի փոփոխությունը Ռուսաստանում ոչինչ չի փոխի