Նիկոլին քիչ է մնացել. Վահագն Չախալյանի ուղերձը՝ ՁՊՎ-ից

ՀՀ Կառավարության շենքի մոտ մայիսի 16-ին Ազգային արժեքների պաշտպանության «Կամք» հասարակական նախաձեռնության հերթական բողոքի ակցիայի ժամանակ տեղի է ունեցել միջադեպ: Իշխող «Քաղաքացիական պայմանագիր» կուսակցության աջակիցներից ոմն Վալերի Մանուչարյան սադրանք է հրահրել ընդդեմ «Կամք»-ականների, ինչը փաստում են լրատվամիջոցներում առկա տեսանյութերը: Սակայն, ոստիկանությունը բերման է ենթարկել ոչ թե Վ. Մանուչարյանին, այլ՝ է «Կամք» նախաձեռնության հիմնադիր Վահագն Չախալյանին, ինչպես նաեւ Սերգեյ Ամիրխանյանին, Մինաս Նովշադյանին, Տարոն Դավթյանին, Միքայել Հովհաննիսյանին: Քննչական կոմիտեի տարածած հաղորդագրության համաձայն, որոշում է կայացվել առերեւույթ խուլիգանություն կատարելու անմիջականորեն ծագած հիմնավոր կասկածի հիմքով Վ. Չախալյանին եւ մյուս 4 անձանց ձերբակալել 72 ժամով:

«Իրավունք»-ը փաստաբան ՎԱՀԱՆ ՀՈՎՀԱՆՆԻՍՅԱՆԻՑ տեղեկացավ, որ փաստաբանական թիմով ստանձնել են ձերբակալված բոլոր «Կամք»-ականների պաշտպանությունը: Նա տեղեկացրեց, որ 72 ժամը ավարտվում է կիրակի օրը՝ մայիսի 19, ժամը՝ 12:30-ին: Իսկ թե ինչ վիճակում են տղաները, կարճ պատասխանեց. «Մարտական»:

Անդրադառնալով ձերբակալության հիմքերին՝ Վ. Հովհաննիսյանը տեղեկացրեց հետեւյալը. «Դեռեւս մեղադրանք չի առաջադրվել, քննչական գործողություններ են կատարվում: Այսօր կորոշվի հանրային քրեական հետապնդում հարուցելու հարցը: Ընդամենը կա կասկած, թե եղել է խուլիգանություն եւ ֆիզիկական ներգործություն, մինչդեռ անգամ ձերբակալման հիմքն է ոչ իրավաչափ: Մենք ունենք այս պահին բարձր հավաստիության ապացույց՝ տեսանյութ, որը եթե մեկնաբանենք եւ վերլուծենք, ակնհայտ է, որ այդտեղ չկա անօրեն արարքի հատկանիշներ: Բայց եթե անգամ պարոն Չախալյանին ծայրահեղ դեպքում փորձեն մեղսագրել ինչ-որ գործողություններ, ապա մյուս չորս անձինք որեւէ գործողություն ընդհանրապես չեն կատարում: Տեսանյութում պարզ երեւում է, որ վեճին որեւէ եղանակով այս մարդիկ չեն միջամտում, սակայն նրանք եւս նույն կասկածանքոով ձերբակալվել են 72 ժամով: Այս ամբողջ գործընթացը իրավաչափ չէ, ի՞նչ խուլիգանության մասին է խոսքը»:

Ի դեպ, նշենք, որ առերեսում է տեղի ունեցել Վահագն Չախալյանի եւ ակցիայի ժամանակ սադրանք հրահրած  ՔՊ-ի ակտիվիստ Վալերի Մանուչարյանի միջեւ:

«Հետագայում կմանրամասնեմ, թե ով է այդ անձը ու ինչ նպատակով էր եկել այդտեղ, ում նկատմամբ իբրեւ պարոն Չախալյանը գործողություններ էր կատարել: Բավական է ուսումնասիրեք նրա ֆեյսբուքյան էջը, այն ձեզ կհուշի, թե ով է այդ անձը: Միայն նշեմ, որ նա առերեսման ժամանակ պնդել է իր ցուցմունքը, որոնք ամենեւին չեն համապատսխանում տեսանյութում ներկայացվող ֆիկսված իրադարձություններին», - մանրամասնեց Վ. Հովհաննիսյանը:

Մեր այն հարցին, թե Վահագն Չախալյանը փաստաբանի միջոցով որեւէ խոսք փոխանցե՞լ է հանրությանը, մեր զրուցակիցը շեշտեց. «Այո՛, փոխանցել է, որ Նիկոլին քիչ է մնացել»:

Լուսանկարները՝ Ալեքսանդր Պատրինի