Ստեղծվում են նախադրյալներ ավելի խորը, ավելի սարսափելի մի հակամարտության համար, որի հետեւանքները քաղելու են սերունդները

Հնարավո՞ր չէր արագ լուծել Արցախի հարցը, որ չտեւեր այսքան երկար ու չհասներ մինչեւ Նիկոլ Փաշինյանի իշխանությունը, հարցի պատասխանը փորձել ենք ստանալ օկուպացված Արցախի նախկին ԱԳՆ նախարար Կարեն Միրզոյանից, ով այսպես արձագանքեց.

-Արագ լուծումները, իհարկե, լավ բան են եւ արժե դրանց ձգտել, բայց արագ լուծումները, շատ հաճախ բերում են նաեւ երկարատեւ բացասական հետեւանքների: Աշխարհում կան շատ երկարատեւ հակամարտություններ, որոնք չեն խանգարում նրանցում ընդգրկված երկրներին ունենալ իրենց ուրույն զարգացման ուղին, ունենալ իրենց ուրույն ապագան:

Այսօր Արցախի հայաթափումը, ՀՀ սահմաններին կախված օրհասական վտանգը, եթե ոմանց թվում է, որ դա հարցի վերջնական լուծում է, չարաչար սխալվում է: Հակառակը, դա  նոր, ավելի խորը, ավելի ծանր հետեւանքներով հակամարտության արգասիք է: Եթե ոմանց թվում է, որ արցախահայությանը տեղահանելով եւ զրկելով իրենց պատմական հայրենիքից հնարավոր է փակել Արցախի հարցը, չարաչար սխալվում են: Հակառակը, ստեղծվում են նախադրյալներ ավելի խորը, ավելի սարսափելի մի հակամարտության համար, որի հետեւանքները քաղելու են սերունդները:

-Պարոն Միրզոյան, չե՞ք կարծում, որ միջազգային հանրության տեսանկյունից Արցախի հարցը այլեւս  փակված է:

-Ես չեմ կարծում, որ միջազգային հանրությունը այդքան անհեռատես ու հիմար է, որ չի հասկանում, որ խաղաղության դարաշրջանի մասին սոսկ դեկլարատիվ հայտարարություններով հնարավոր է լուծում գտնել ինչ-ինչ հակամարտության: Ես չեմ կարծում, որ միջազգային հանրությունն ընդհանրապես աչք է փակել Արցախի ժողովրդի տառապանքների վրա: Այլ բան է, որ այսօր տեսնելով ՀՀ իշխանությունների կրավորական  կեցվածքը, պարզ է, որ միջազգային հանրությունը նախընտրում է գնալ ավելի թեթեւ ճանապարհով, ավելի փոքր դիմադրողականության ճանապարհով: