Ասածս խնդրում եմ ընդունեք լուրջ, աղերսաբար խնդրում եմ... Նաիրա Զոհրաբյան

Ժողովուրդ ջան, մենք բոլորս, խոսքս ադեկվատ քաղաքացիների ու առավել ես քաղաքական գործիչների մասին է, գերլարված օրեր եւ շաբաթներ ենք ապրում։ Իսկ դա նշանակում է, որ 24 ժամը չի բավարարում օրվա ծրագրածն անելու համար։ Ուստի, աղերսաբար խնդրում եմ՝

 

1. Ինձ չուղարկել տարբեր լրատվականների կամ սոցցանցերի գրառումներ, վիդեոներ՝ «տեսե՞լ եք էս անասունը ինչ է ասել» գրությամբ։ Բոլոր պետքական ու անհրաժեշտ անասունների գրառումներն ու տեսանյութերը ես ինքս տեսնում եմ՝ առանց որեւէ մեկի օգնության։

 

2. Օրվա տարբեր ժամերի մի գրեք նույն՝ անիմաստ հարցը՝ «բա մեր վերջը ի՞նչ է լինելու»։ Ենթադրվում է, որ նման հարց գրողը պարապ է, ուստի ինքը լիքը ժամանակ պիտի ունենա այդ հարցի շուրջ մտորելու համար։ Ես չունեմ այդ հարցի պատասխանը։

 

3. Մի հարցրեք՝ «կասե՞ք ինչ է կատարվում»։ Ես որեւէ մեկի համար մամուլի խոսնակ չեմ։ Մեր լրատվականները ֆանտաստիկ աշխատում են այս օրերին եւ նայեք լրատվականներ։

 

4. Ինձ մի առաջարկեք՝ «տղամարդ կին ես, կանանց գունդ հավաքի, սրանց քշենք»։ Հիշեցք՝ կնոջն ասել՝ «տղամարդ կին ես, կամ՝ տղամարդ աղջիկ ես», դա առնվազն կոմպլիմենտ չէ, եւ երկրորդ՝ ես ոչ մի գունդ, դիվիզիա, գվարդիա, ջոկատ, պարտիզանական շարժում ձեւավորել եւ առաջնորդել չեմ պատրաստվում։

 

5. Ինձ մի գրեք՝ «սրան մի ձեւ կա հեռացնելու, չկա՞ էս երկրում մի տղարմարդ, որ դա անի»։ Դրա փոխարեն՝ կանգնեք հայելու դիմաց եւ էդ հարցը ձեզ տվեք։ Ինձ մի տվեք։ Ես հոգեթերապեւտ չեմ, որ ձեր թաքուն իղձերը վերլուծեմ։

 

6. Ինձ հետ մի փորձեք զրույցի բռնվել սոցիալական որեւէ ցանցում՝ կլինի ֆեյս, ինստա, թե զարհուրելի տիկտոկը։ Ես որեւէ մեկի հետ չեմ զրուցում ու եթե խիստ կոնկրետ հարց չունեք, մի հարցրեք՝ «ո՞նց եք»։ Լավ եմ, եթե, Աստված չանի, վատ լինեմ, էդ մասին կիմանաք։ Դրանից հետո էլ մի դաբլեք հարցը՝ «ուրիշ ոնց եք»։ 15 վայրկյանում իմ ինքնազգացողության մեջ ոչինչի չի փոխվում։

 

7. Աղերսում եմ՝ ինձ մի գրեք լատինատառ կամ ռուսատառ՝ դա ամենավախենալուն է։ Ես, լինելով նորմալ կրթություն ստացած մարդ, չեմ կարողանում այդ սեպագրերը վերծանել։ Հայոց այբուբենն ունի 36 տառ՝ մի ալարեք եւ սովորեք։

 

Հուսամ, որեւեւէ մեկին չնեղացրեցի եւ նման միտում չունեմ։ Պարզապես, շատ ծանր ու բարդ օրեր են եւ ցանկացած ազատ րոպե, որ հնարավոր է լինում գտնել, թույլ տվեք, որ շփվեմ ընտանիքիս հետ», - գրել է «Անվտանգություն եւ ժողովրդավարություն» ՀԿ նախագահ ՆԱԻՐԱ ԶՈՀՐԱԲՅԱՆԸ: