Ցեղասպանությունը մարդկանց ոչնչացմանն ուղղված մտադրված հանցանք է, այլ ոչ թե որոշակի թվով մարդկանց սպանություն. Հայտնի փաստաբանը աղմուկ հանած հայտարարության մասին

ՔՊ-ական Անդրանիկ Քոչարյանը կիրակի օրը «Ազատությանը» տված հարցազրույցում  փաստացի կասկածի տակ է դրել  Հայոց ցեղասպանության փաստը՝ պահանջելով 1,5 միլիոնի անուն-ազգանունները: Մասնավորապես՝ պատասխանելով դիտարկմանը, որ կա մտավախություն, որ Նիկոլը իրական Հայաստանի փիլիսոփայությամբ Ցեղասպանության ճանաչման նպատակներից հեռանալու, հրաժարվելու հիմք է ստեղծում ,Քոչարյանն ասել է՝ եթե ասում ենք, որ Ցեղասպանության ժամանակ միլիոնուկես հայ է կոտորվել, պետք է կարողանանք միլիոնուկես ազգանուն ինչ-որ արխիվներում հանել ու դնել։ «Պարզ է, չէ՞, որ եթե ասում ենք՝ միլիոնուկես հայ է կոտորվել, պետք է կարողանանք միլիոնուկես ազգանուն ինչ-որ արխիվներում հանել ու դնել և Ցեղասպանության թանգարանի պատը պետք է լրացված լինի այդ ազգանուններով»,-մասնավորապես՝ հայտարարել է վերջինս։

Նրա կարծիքով, եթե դա մինչև այժմ չի արվել, ապա բացը պետք է լրացնել։ Հակառակ դեպքում, հակառակ կողմը, այսինքն՝ Թուրքիան կշարունակի պնդել, որ Հայոց ցեղասպանություն չի եղել։

Մի կողմ թողնելով խնդրի բարոյական կողմ, որքանո՞վ է իրավաչափ վերջինս հայտարարությունը փորձել ենք հետաքրքրվել իրավունքի մասնագետ, բազմաթիվ նախադեպային վճիռների հասած հայտնի գործերով փաստաբան, «Լեվ Գրուպ» փաստաբանական ընկերության հիմնադիր ղեկավար ԼԵՎՈՆ ԲԱՂԴԱՍԱՐՅԱՆԻՑ, ով նախ արձանագրեց.

-Ցեղասպանություն եզրույթը միջազգային իրավորմով պարտադիր պայման չի դիտվում, որ այդ  եզրույթի տակ պետք է ընդգրկվի նաեւ ցաղասպանված անձանց անուն-ազգանունները եւ թվաքանակը։ Ավելին, նախորդ 1915թ-ին տեղի ունեցած ցեղասպանությունը լավագույն ցանկության դեպքում անգամ հնարավոր չէ պարզել ելակետային տվյալները, որոնց մասին խոսում է պատգամավորը։ Բայց ի տարբերություն դրա, մենք ունենք բազմաթիվ դեպքեր ինչպես օտարերկրյա գործիչների կողմից ներկայացված, այնպես էլ ժամանակիցների կողմից ներկայացված, որոնք վկայում են, մեղմ ասած, զազրելի ոճրագործություները, որոնք իրականացվել են թուրք-խուժանի կողմից։ Ուստի ոչ իրավաչափ եմ տեսնում պարտադիր պայման դիտել, որպեսզի ցեղասպանության եզրույթի տակ ներառվեն նաեւ ցաղասպանվածների անուն-ազգանունները։ Եթե տվյալ բանախոսը նկատի է ունեցել, որ ցանկալի է, որ այդ տվյալները եւս ներառվեն, դա այլ խնդիր է, բայց պարտադիր պայման դիտել ցեղասպանվածների անուն-ազգանուններ ներառելը, դա ոչ իրավաչափ է եւ անթույլատրելի է։ Քանի որ ցեղասպանությունը մարդկանց ոչնչացմանն ուղղված մտադրված հանցանք է, որ հիմքում ունի ռասայական, էթնիկ, ազգային կամ կրոնական պատկանելիության հիմքով ատելությունը, այլ ոչ թե ուղղակի որոշակի թվով մարդկանց սպանությունը կամ նրանց վերացումը: