Ցավալի է, որ գիտնականի կողմից հնչեցված խոսքը փաստերի խեղաթյուրում է պարունակում. Տեր Մովսես

Հասարակություն 12 Ապրիլ, 2024 1:57

«Ապրիլի 5-ին, ՄԻԵԴ-ում ՀՀ-ի կողմից առաջադրված դատավորի թեկնածուների հարցազրույցի փուլի ընթացքում, Բարձրագույն դատական խորհրդի անդամ Վիգեն Քոչարյանը, անդրադառնալով Հայաստանյայց Առաքելական Սուրբ Եկեղեցու Սահմանադրական հատուկ կարգավիճակին, նշել է, թե վերջինիս` իբրև «ազգային եկեղեցի» ճանաչումը, միջազգային փորձառության տեսանկյունից խնդրահարույց է և հակասում է 2005 թվականին հաստատված ՀՀ Սահմանադրության դրույթների տրամաբանությանը, ինչպես նաև սահմանափակում է խղճի ու կրոնական կազմակերպությունների գործունեության ազատությանը։

Ցավալի է, որ գիտնականի կողմից հնչեցված խոսքը փաստերի խեղաթյուրում է պարունակում։ 2015 թվականին հաստատված Սահմանադրության 18-րդ հոդվածի դրույթները, որոնցով Հայաստանյայց Առաքելական Սուրբ Եկեղեցին ճանաչվում է իբրև «ազգային եկեղեցի», բառացի կրկնությունն են 2005 թվականի Սահմանադրության 8.1 հոդվածում առկա դրույթների, որտեղից և փոխառվել են։ 2015 թվականի Սահմանադրությունը որևէ կերպ չի ոտնահարում խղճի ազատության դրույթը և չի սահմանափակում կրոնական կազմակերպությունների գործունեության ազատությունը, որոնք ամրագրված են 17.1 և 41 հոդվածներով։

2015 թվականի Սահմանադրությամբ` «ազգային եկեղեցու» հատուկ կարգավիճակի արձանագրումը, որն առկա է նաև 2005 թվականի Սահմանադրության մեջ, որևէ կերպ խտրականության դրսևորում չի կարող համարվել։ Այն պատմական և փաստացի իրողության արձանագրում է։ Անդրադառնալով միջազգային փորձին՝ հարկ է նշել, որ տարբեր երկրներ, ինչպես օրինակ` Մեծ Բրիտանիան, Դանիան, Շվեդիան, Նորվեգիան, Հունաստանը և Բուլղարիան օրենսդրական և, հատկապես, սահմանադրական հատուկ կարգավիճակ են տալիս իրենց տարածքում գերակայող եկեղեցուն: Այսպես` օրինակ.

Համաձայն Դանիայի Սահմանադրության. «Ավետարանական-լյութերական եկեղեցին Դանիայի ազգային եկեղեցին է, որին աջակցում է պետությունը» (հոդված 4) և որին «պարտավոր է հարել թագավորը» (հոդված 6)։

«Շվեդիայի Եկեղեցու մասին» (Lag om Svenska kyrkan) օրենքի 1-ին հոդվածում գրված է, որ Շվեդիայի «ազգային» եկեղեցին` «Ավետարանական-լյութերականն է»:

Նորվեգիայի Սահմանադրության մեջ արձանագրված է. «Ավետարանական-լյութերական եկեղեցին Նորվեգիայի պետական եկեղեցին է, որին աջակցում է պետությունը» (հոդված 16), և որին «պարտավոր է հարել թագավորը» (հոդված 4)։

Հունաստանում Ուղղափառ եկեղեցին ճանաչված է իբրև իշխող, գերակայող եկեղեցի և ունի պետական իրավունքներ: Սահմանադրության 3.1 հոդվածում գրված է. «Հունաստանում գերակայող կրոնը Քրիստոսի Արևելյան Ուղղափառ Եկեղեցու կրոնն է: Հունաստանի Ուղղափառ եկեղեցին, որը որպես իր գլուխ ճանաչում է մեր Տեր Հիսուս Քրիստոսին, իր դավանանքով անխզելիորեն կապված է Քրիստոսի Կոնստանդնուպոլսի Մեծ Եկեղեցու և նույն դավանանքը ունեցող մնացյալ Եկեղեցիների հետ, որոնց հետ ճշգրտորեն պահպանում է սուրբ, առաքելական ու ժողովական կանոնները և սրբազան ավանդությունը: Այն ինքնիշխան է և համաձայն եկեղեցական կանոնադրության՝ ղեկավարվում է եկեղեցական ծառայության մեջ գտնվող եպիսկոպոսների Սուրբ Սինոդի կողմից»:

Բուլղարիայի Սահմանադրության 13.3 հոդվածի համաձայն. «Արևելյան Ուղղափառ Քրիստոնեությունը համարվում է Բուլղարիայի Հանրապետության ավանդական կրոն»:

Անգլիկան Եկեղեցին ընդհանրապես ազգային եկեղեցու դասական օրինակներից է, որտեղ Թագավորն ինքը ներգրավված է Անգլիայի Եկեղեցու կառավարման մեջ, իսկ Քենթերբերիի և Յորքի արքեպիսկոպոսներն ու քսանչորս այլ եպիսկոպոսներ մասնակցում են խորհրդարանի աշխատանքներին՝ իբրև անդամներ (Lords Spiritual)», - գրել է Մայր Աթոռ Սուրբ Էջմիածնի Դիվանատան Պետական եւ հասարակական կառույցների հետ հարաբերությունների գրասենյակի պատասխանատու Արժանապատիվ ՏԵՐ ՄՈՎՍԵՍ քահանա ՍԱՀԱԿՅԱՆԸ:

Այս թեմայով

Մայր եկեղեցուց պետք չէ հեռանալ. Տեր Հուսիկ քահանա Գրիգորյան

Պետական պարտքով առաջատար երկրները

Շատ հայեր, որպես էմպիրիկ նյութ, կտեսնեն ու կճանաչեն ադրբեջանցու իրական տեսակը. Մուստաֆաեւի այցի հետեւանքները

Հայաստանը փաստացիորեն հայտնվում է Եվրոպական միության արտաքին կառավարման ներքո. Բալասանյան

Մայիսը այն ամիսն է,որ պարտադրում է դուրս գալ կոմֆորտ զոնայից,այլապես ոչ մի լավ բանի պետք չի սպասել