«ԱՌԱՎՈՏՅԱՆ ՏԱԳՆԱՊ ՀԱՅՏԱՐԱՐՎԵՑ, ՄԵԶ ՈՒՂԱՐԿԵՑԻՆ ՄԱՏԱՂԻՍ ԵՎ ԹԱԼԻՇ». ԱՊՐԻԼՅԱՆ ՔԱՌՕՐՅԱ ՊԱՏԵՐԱԶՄԻ ՄԱՍՆԱԿԻՑ, ՖՈՒԼԿՈՆՏԱԿՏ ԿԱՐԱՏԵԻ ԱՇԽԱՐՀԻ ԳԱՎԱԹԱԿԻՐ, ԵՎՐՈՊԱՅԻ ՉԵՄՊԻՈՆ ՀԱՅԿ ԳԱԼՍՏՅԱՆ

Այս օրերին լրացավ Ապրիլյան քառօրյա պատերազմի 8-րդ տարելիցը։ Այս առիթով, Iravunk. com -ի մարզական թղթակիցը զրուցել է Ապրիլյան քառօրյա պատերազմի մասնակից, ֆուլկոնտակտ կարատեի 2008 թվականի Աշխարհի գավաթակիր, Եվրոպայի չեմպիոն, 28-ամյա ՀԱՅԿ ԳԱԼՍՏՅԱՆԻ հետ։

- Ողջույն, Հայկ ։Կպատմես ինչպես սկսեցիր զբաղվել սպորտով։

- Դուքենդո Ֆուլկոնտակտ կարատեով եմ պարապել։ Բազմաթիվ մրցաշարերի եմ մասնակցել, 2007-ին Եվրոպայի առաջնության 3-րդ տեղը զբաղեցրել, 2008-ին Աշխարհի գավաթակիր եմ դարձել, սև գոտի 2-րդ դան, 2010-ին էլ Եվրոպայի չեմպիոն եմ դարձել։ Այժմ արդեն զբաղվում եմ մարզչական գործունեությամբ։

- Հայկ, իսկ ծառայության մասին ինչ կարող ես հիշել, պատերազմի սկսվելու մասին ևս։

- Ծառայության եմ անցել 2014-ին, ծառայում էի առանձին հետախուզական գումարտակում որպես ջոկի հրամանատար։ Մարտական տարբեր խնդիրներ էինք կատարում, մեր խնդիրը թշնամուն ոչնչացնելն էր ու տարածքներ գրավելը։ 2016-ի ապրիլի 2-ին միջոցառում ունեինք, Խոջալու պիտի գնայինք ։Ռազմական գործողությունները գիշերն արդեն սկսվել էին, սակայն քանի որ մենք բավականին հեռու էինք, դեռ լուր չունեինք։ Առավոտյան ազդարարվեց տագնապ, մեզ ուղարկեցին Մատաղիս ու Թալիշ։ Սարսուռ էինք ապրում ականանետի ձայնից։ Բնական է, բոլորս էինք վախ զգում։ Տղաներին հորդորում էի, որ չթուլանան, ամեն բան լավ է լինելու։ Ես միշտ լավատեսորեն եմ տրամադրվում ու դա միշտ օգնում է։ Երբ Թալիշ հասանք, գյուղն արդեն դատարկվել էր։ Ապրիլի 4-ին հայրիկիս ծննդյան 50-ամյակին արձակուրդ պիտի գնայի, չստացվեց ։Այդ օրը մեր ստորաբաժանումով անօդաչու թռչող սարք ոչնչացրինք։ Հետո զանգեցի ու շնորհավորեցի նրան։ Հարազատներս նույնիսկ չեն իմացել, որ ես Թալիշում եմ եղել։ Մեր գումարտակը շատ համախմբված էր, դրա համար էլ կարողացանք մարտական առաջադրանքներ կատարել։ Արյունը, մահը, կորուստները սովորական էին դարձել մեզ համար, պատերազմը շատ դաժան բան է, բառերով շատ դժվար է նկարագրել։ Ես հետախույզ էի, սակայն դիրք եմ պահել, ինժեներական աշխատանքներ կատարել ու մասնակցել մարտական գործողությունների։ Արժանացել եմ «Մարշալ Բաղրամյան» մեդալի։ Ցավոք, 2020-ին էլ եղավ պատերազմ, դաժան պատերազմը։ Աստված տա, էլ երբեք չլինի պատերազմ։

- Շնորհակալություն, Հայկ, մեզ ժամանակ տրամադրելու համար ։

- Ես էլ եմ շնորհակալ, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ