Երեւանի ավագանին երկու նոր անդամ ունի. ինչ է սպասվում, փակագծեր են բացում մանդատակիրները

Կենտրոնական ընտրական հանձնաժողովում այսօր գումարված արտահերթ նիստում, Երեւանի քաղաքապետի ուղարկած արձանագրության համաձայն, վաղաժամ դադարեցվեց Երեւանի ավագանու «Հանրային ձայն» խմբակցության անդամ, «Ալյանս» կուսակցության նախագահ Տիգրան Ուրիխանյանի լիազորությունները: Մանդատը փոխանցվեց նախընտրական ցուցակի հաջորդ թեկնածուին` նորաստեղծ «Արդար խոսք» կուսակցության նախագահ Ալբերտ Մովսեսյանին: Նշենք, որ ավելի վաղ «Հանրային ձայն» խմբակցության ավագանու անդամ Նանա Սարգսյանը եւս վայր էր դրել մանդատը եւ նրա մանդատն էլ փոխանցվել էր Գրիգոր Հարությունյանին, որը նախընտրական քարոզարշավի ժամանակ եղել է կուսակցության շտաբի պետը:

Ով ինչպես է հանդես գալու Երեւանի ավագանիում` նկատի ունենալով խմբակցությունում առկա խնդիրները, Վարդան Ղուկասյանի կողմից ԴՕԿ (Դեմոկրատիա, օրենք եւ կարգապահություն) կուսակցություն ստեղծելն ու «Հանրային ձայն»-ի հետ կամուրջներն այրելը` «Իրավունք»-ը նախ փորձեց պարզել ԴՕԿ կուսակցության նախագահ ԱՆՈՒՅՇ ԽՈՒԴԱՎԵՐԴՅԱՆԻՑ:

«Անկեղծ ասած, որեւէ քննարկում չենք ունեցել, միայն շնորհավորել եմ` ավագանու մանդատ ստանձնածներին: Հետեւապես, քանի դեռ անձամբ չեմ զրուցել, չեմ շտապի կարծիք հայտնել: Կարող եմ միայն ասել, որ ավագանիում միայն ես եմ ԴՕԿ կուսակցությունը ներկայացնում, երկու նոր մանդատակիրներն էլ տարբեր քաղաքական ուժերից են: Մնացածն արդեն ժամանակը ցույց կտա` ում հետ են պատրաստվում ճանապարհ անցնել», - ընդգծեց Խուդավերդյանը:  

Մենք զրուցեցինք նաեւ Երեւանի ավագանու մանդատ ստացած ԳՐԻԳՈՐ ՀԱՐՈՒԹՅՈՒՆՅԱՆԻ հետ:

— Ինչպե՞ս եք պատկերացնում Ձեր աշխատանքը ավագանիում եւ արդեն որոշում ունե՞ք` մնալո՞ւ եք «Հանրային ձայն» խմբակցությունում:

— Նախ ասեմ, որ երբեւիցե չեմ եղել «Հանրայնին ձայն» կուսակցության անդամ եւ, որպես անկուսակցական եմ մասնակցել ընտրություններին, ինչն օրենքը թույլ էր տալիս: Եվ հիմա էլ միանշանակ որոշումս կայացրել եմ, դուրս եմ գալիս «Հանրային ձայն» խմբակցությունից եւ գործելու եմ` որպես անկախ ավագանու անդամ: Ընդ որում` անկախ բառիս ամենաուղիղ իմաստով:

— Անկախ ավագանու անդամ լինելով` շարունակելո՞ւ եք հանդես գալ ընդդիմադիր դիրքերից:

— Իհարկե, ոչ մի համագործակցություն չի լինելու իշխանության հետ: Գործելու եմ իմ սկզբունքների համաձայն եւ իմ որոշումների մեջ ես անկաշկանդ եմ: Ծառայեցնելու եմ մանդատս` ի շահ Երեւանի եւ երեւանցու:

— Բայց համագործակցելո՞ւ եք ԴՕԿ կուսակցության հետ:

— Ես ԴՕԿ կուսակցության անդամ չեմ, բայց հարգանքով եմ վերաբերում պարոն Ղուկասյանին եւ տիկին Խուդավերդյանին ու ավագանիում էլ շարունակելու ենք աշխատել միասին:

— Դուք ժամանակին «Հայրենիք» կուսակցությունից էիք, իսկ նրանց հետ համագործակցություն կա՞:

— Իմ դիմումի համաձայն, ժամանակավորապես դադարեցրել եմ անդամակցությունս կուսակցությունից, քանի որ մասնակցում էի Երեւանի ՏԻՄ ընտրություններին այլ քաղաքական ուժի հետ: Կապը կա, ընկերական շփումները` եւս:

— Այդուհանդերձ, ի՞նչ սպասել նիստերին, երբ, փաստորեն, նույն շարքում եք նստելու նաեւ այն երկու ավագանու անդամների հետ, որոնք մնացել են «Հանրային ձայն»-ում:

— Ոչ մի բարդություն չեմ տեսնում, մանավանդ, որ հենց իրենց կողմից քայլեր է արվում` որոշակի ընկերական հարաբերություններ վերականգնելու: Բայց ես այդ մարդկանց այլեւս չեմ ճանաչում, ցանկություն էլ չկա իրենց հետ որեւէ ձեւով համագործակցելու: Ես հետայսու «Հանրային ձայն» կուսակցությունից մարդ չեմ ճանաչում:

Ի դեպ, «Իրավունք»-ը փորձեց մեկնաբանություն ստանալ նաեւ Երեւանի ավագանու մյուս նոր անդամից` ԱԼԲԵՐՏ ՄՈՎՍԵՍՅԱՆԻՑ, ով ԱԺ նախկին պատգամավոր ազատամարտիկ Առաքել Մովսեսյանի եղբորորդին է: Սակայն, նա չցանկացավ փակագծեր բացել, թե արդյոք դուրս է գալու «Հանրային ձայն» խմբակցությունից կամ համագործակցելո՞ւ է ԴՕԿ կուսակցության հետ:

«Ձեր բոլոր հարցերի պատասխանները պարզ կլինի իմ մասնակցությամբ հենց առաջին ավագանու նիստի ընթացքում»,- ասաց Մովսեսյանը:

Հիշեցնենք, որ Երեւանի ավագանու ընտրություններին «Հանրային ձայն» խմբակցությունը ստացել է 7 մանդատ: ԴՕԿ կուսակցության նախագահ Անույշ Խուդավերդյանը եւ «Ալյանս» կուսակցության անդամ Անուշ Գինոսյանը դուրս են եկել խմբակցությունից` դառնալով անկախ ավագանու անդամ, անկախ ավագանու անդամ է դառնում նաեւ Գրիգոր Հարությունյանը, իսկ «Հանրային ձայն»-ում մնացել են Վահան Ավագյանը, Վահե Եսայանը եւ Արտակ Գալստյանը, որը գտնվում է կալանքի տակ:  Թերեւս միայն անհայտ է, թե ինչ որոշում կկայացնի Ալբերտ Մովսեսյանը:

ՀՐԱՆՏ ՍԱՐԱՖՅԱՆ

Այս թեմայով Երեխայի նկատմամբ բռնությունը մեղք է ոչ միայն օրենքի, այլ նաև Աստծո առաջ. Հայտնի իրավապաշտպանը մանկապղծության դեպքի մասին Տրանսպորտային միջոցներ վարելու իրավունքը կասեցված ու վթարի պատճառ դարձած 19-ամյա տղայի նկատմամբ հանրային քրեական հետապնդում է հարուցվել Խորեն Լևոնյանին «Հանրային հեռուստաընկերություն»-ն աշխատանքից ազատել է, քանի որ նա հրաժարվել է ծաղրել գուսաններին ԿԸՆ-ն մերժեց Տիգրան Ուրիխանյանի և Վարդան Ղուկասյանի գրանցումը «Հրապարակ». ՔՊ նախընտրական շտաբի պետերը, որոնք հիմնական ձայն բերողներն են համարվում, լուրջ կասկածներ ունեն