Իմ պայմանագիրը կավարտվի, նրանց վերադարձն էլ շատ հաղթական կլինի.Պետրակովը` Բարսեղյանի և Բայրամյանի մասին

Հայաստանի ազգային հավաքականի գլխավոր մարզիչ Ալեքսանդր Պետրակովը Կոսովոյի հետ ընկերական խաղից առաջ հանդիպել է լրագրողների հետ և պատասխանել նրանց հարցերին։

Անդրադառնալով Կոսովոյի հավաքականին և վաղվա խաղին Հայաստանի ընտրանու գլխավոր մարզիչը նշել է.

«Կոսովոն լավ թիմ ունի, բոլոր տղաները խաղում են եվրոպական լավ թիմերում: Արդյոք անակնկալներ կլինե՞ն: Կարծում եմ՝ անակնկալներ չեն լինի: Ես երիտասարդ մարզիչ չեմ, որ հնարավոր լինի ինձ անակնկալի բերել: Առաջին իսկ 10 րոպեի ընթացքում կհասկանամ, թե ինչպես են մտադիր խաղալ:

Կոսովոյի հավաքականի ֆուտբոլիստները գլխով են հիանալի խաղում, պաշտպանական գիծն է ինձ շատ դուր գալիս: Շատ լավ խաղացողներ ունեն, որոնք խաղում են եվրոպական առաջատար առաջնություններում:

Շատ ցանկալի կլիներ հասնել դրական արդյունքի վաղվա խաղում: Սա ֆուտբոլ է, ու պետք է խնդիր լուծել»:

Պետրակովը կարծիքով Հայաստանի առաջնությունում չկան ֆուտբոլիստներ, ովքեր կարող են ուժեղացնել ազգային հավաքականը.

«Ազգային թիմը փորձարկումների համար չէ: Այո, այս պահին չկան խաղացողներ, որ կարող են ուժեղացնել հավաքականը: Եթե ցանկանում եք՝ ասեմ, թե շատ տաղանդավոր ու փառահեղ խաղացողներ ունեք, այդպես էլ ասեմ: Ամեն դեպքում, պետք է ճիշտը ասել: Չեմ ցանկանում նեղացնել որևէ մեկին, բայց անհրաժեշտ են այնպիսի խաղացողներ, որոնք կուժեղացնեն թիմը»:

Խոսելով Տիգրան Բարսեղյանի եւ Խորեն Բայրամյանի բացակայության մասին Պետրակովը նշել է.

«Եթե հնարավոր է՝ դիմացեք մինչև նոյեմբեր ամիս. Իմ պայմանագիրը կավարտվի. Նրանց վերադարձն էլ շատ հաղթական կլինի՝ տոնախմբություններ, հրավառություններ, զվարճանքներ»: