Ռուսական թատրոնում «Թագավորների խաղերը» ավարտվեց Happy birthday-ով

Կ. Ստանիսլավսկու անվան ռուսական դրամատիկական թատրոնում Ջեյմս Գոլդմանի պիեսի մոտիվներով բեմադրված «Թագավորների խաղերը» հերթական ներկայացումն այս անգամ ավարտվեց անակնկալ Happy birthday-ով: Թատրոնի տնօրենի ժամանակավոր պաշտոնակատար եւ ներկայացման բեմադրիչ Սուրեն Շահվերդյանն ազդարարեց Հենրի Երկրորդի դերակատար, ՀՀ վաստակավոր արտիստ ՌՈԲԵՐՏ ՀԱԿՈԲՅԱՆԻ հոբելյանական տարեդարձի մասին:

60-ամյա արտիստին շնորհավորելու էին եկել թատերական գործիչներ, պետական այրեր, այդ թվում՝ ԿԳՄՍ նախարարի տեղակալ Դանիել Դանիելյանը: Հայաստանի Թատերական գործիչների միության նախագահ ՀԱԿՈԲ ՂԱԶԱՆՉՅԱՆՆ իր խոսքում նշեց, որ Ռ. Հակոբյանին վաղուց է ճանաչում եւ հիշում է նրա մուտքը ռուսական թատրոն՝ երջանկահիշատակ Ալեքսանդր Գրիգորյանի հրավերով: Ղազանչյանը հիշեց այդ տարիներին Ռոբերտ Հակոբյանի դերակատարմամբ «Փշրված շղթա», «Հիշատակման աղոթք» ներկայացումները: ՀԹԳՄ նախագահը թվարկեց նաեւ Հակոբյանի մոնոներկայացումները, որոնք մեծ հաջողություն են ունեցել երկրի սահմաններից դուրս եւս: Ընդգծեց, որ «Թագավորների խաղերը» վերջերս ներկայացվել է Վլադիվոստոկի Խաղաղօվկիանոսյան միջազգային թատերական երկրորդ փառատոնին:

Շնորհավորելով հոբելյարին՝ Ղազանչյանը դժվարությամբ արձանագրեց, որ տարիներն այսքան արագ են ընթանում եւ Ռոբերտ Հակոբյանն արդեն 60 տարեկան է: Մաղթեց դերասանին անսպառ էներգիա, քաջառողջություն եւ նոր ստեղծագործական վերելքներ, ապա ՀԹԳՄ ոսկե մեդալ հանձնեց նրան՝ թատերարվեստին մատուցած անգնահատելի ծառաությունների համար եւ հոբելյանի առթիվ:

Կ. Ստանիսլավսկու անվան ռուսական դրամատիկական թատրոնի գեղարվեստական ղեկավար ԿԱՐԵՆ ՆԵՐՍԻՍՅԱՆԸ եւս դատարկաձեռն չէր բեմում: Ռոբերտ Հակոբյանին թատրոնի կողմից հանձնվեց Ալեքսանդր Գրիգորյանի անվան հուշամեդալը: Ներիսյանը շնորհավորելով հոբելյարին՝ շեշտեց, որ Ա. Գրիգորյանի ավան հուշամեդալը հատուկ դեպքերում է շնորհվում, եւ այսօր այդ օրերից մեկն է:

Եզրափակիչ խոսքը հոբելյարինն էր. «Ուզում եմ շնորհակալություն ասել, սիրելի հանդիսատես, որ եկել էիք թատրոն եւ 1 ժամ 20 րոպե հետեւեցիք մեր խաղին: Շնորհակալություն ձեր ժպիտների համար, շնորհակալություն գործընկերներիս, թատրոնի ղեկավարությանը, որ որոշում կայացրեց նշելու հոբելյանս: Հուսամ, որ սա ավանդական կլինի թատրոնում եւ կնշվեն ոչ միայն իմ հոբելյանները»:

Ի դեպ, Ռ. Հակոբյանի տարեդարձի առթիվ հանդիսատեսին թատրոնն ընդունել է երաժշտության ուղեկցությամբ եւ կարմիր գորգով:

ՀՐԱՆՏ ՍԱՐԱՖՅԱՆ

Այս թեմայով Վրաստանում ռուսական նավթի ներմուծման թռիչքային աճ կա. իսկ հայաստանը սկսել է նախընտրել Ադրբեջանականը Ռուսական ուժերը նոր ճակա՞տ են բացում Ադրբեջանական բենզինը կվաճառի Խաչատուր Սուքիասյանին պատկանող ընկերությունը Քրիս Ջենները բացահայտել է, որ իր թոռը` Թեյթումը անսովոր կապ ունի իր նախկին ամուսնու հանգուցյալ Ռոբերտ Քարդաշյանի հետ Ռուսական սավառնող ավիառումբը Նովոպիդգորոդնոյում ոչնչացրել է ուկրաինական ողջ հենակետը (Տեսանյութ)