ՊՐՈՖԵՍԻՈՆԱԼ ՄԱՐԶԻԿ, ՄԱՐԶԻՉ ՍԱՐԳԻՍ ՎԱՐԴԱՆՅԱՆԸ, ԱՐԺԱՆԱՑԵԼ Է ՄԻՋԱԶԳԱՅԻՆ ԿԱՐԳԻ ՍՊՈՐՏԻ ՎԱՐՊԵՏԻ ԿՈՉՄԱՆ

Վերջերս, ԿԳՄՍ նախարարի տեղակալ  Կարեն Գիլոյանը, մարզական կոչումներ է շնորհել մարզաշխարհի մի շարք ներկայացուցիչների։ Միջազգային կարգի սպորտի վարպետի կոչման է արժանացել սամբիստ, Սամբոյի Աշխարհի առաջնության բրոնզե մեդալակիր, խառը մենամարտերի պրոֆեսիոնալ մարզիկ, մարզիչ, ACB կարգի չեմպիոն, բազմաթիվ հեղինակավոր մրցաշարերի հաղթող ՍԱՐԳԻՍ ՎԱՐԴԱՆՅԱՆԸ:

Այս ուրախալի նորության առթիվ էլ, Iravunk. com -ի մարզական թղթակիցը հանդիպել է ու զրուցել Սարգսի հետ։

- Շնորհավորում ենք, Սարգիս, միջազգային կարգի սպորտի վարպետի կոչմանը արժանանալու կապակցությամբ։

- Շնորհակալ եմ։ Այս կոչումը պարտավորեցնող է։ Շատ հաճելի է, այս բարձր կոչմանը արժանանալը։

Նշեմ, որ սա երկար տարիների իմ տքնաջան աշխատանքի արդյունքն է, գնահատականը։ Իմ բոլոր հաղթանակները ես նվիրել եմ իմ հայրենիքին։ Շատ մեծ հպարտություն է, աշխարհի տարբեր երկրներում բարձր պահել Հայաստանի եռագույն դրոշը, հիմնը հնչեցնել։ - Սարգիս, իսկ հետագա ծրագրերի մասին ինչ կարող ես ասել:

-Պատրաստվում եմ սամբոյի Հայաստանի առաջնությանը, այն կկայանա մարտի 18-ին, հուսով եմ, ամեն ինչ լավ կստացվի։

Հ. Գ. Հավելենք, որ Սարգիս Վարդանյանը, այն եզակի հայազգի մարզիկն է, ով տարիներ առաջ Թուրքիայի Անթալիա քաղաքում, Խառը մենամարտերի միջազգային մրցաշարում, փառահեղ հաղթանակ տոնեց ազգությամբ թուրք Քերիմ Քելեշի հանդեպ ու Թուրքիայում ծածանեց Հայոց եռագույն դրոշը, ցավոք, վերադարձավ հայրենիք ու այդ պատմական հաղթանակի առթիվ չարժանացավ որևէ պարգևի։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ