Ինչն է վարդենուտցիներին ստիպել փողոց դուրս գալ. Վարչական ղեկավարը մանրամասներ է ներկայացնում

Կիրակի օրը Երևան-Վանաձոր ավտոճանապարհին՝ Ափնա գյուղի վարչական տարածքում, Վարդենուտ գյուղի 300-ից ավել բնակիչներ ի նշան բողոքի փակել էին  գլխավոր ճանապարհը։ Իրենց ակցիան գյուղացիները պատճառաբանում էին հետեւյալով.«Այս ծայրահեղ քայլին դիմել ենք ստիպված, քանի որ պատկան մարմինները, այդ թվում՝ կառավարությունը, տևական ժամանակ է մեր գլխի տակ փափուկ բարձ են դնում ու այդ ամենի արդյունքում գյուղը, որ դեռ հայտնի էր սովետական տարիներին, կանգնած է դատարկվելու շեմին։ Ինչ-որ «ՌԻՏ» ՍՊԸ որոշել է ողջ գյուղի բերրի հողերը գրոշներով իրենով անել՝ պատճառաբանելով, թե ստեղծում է էկոգյուղ, որտեղ լինելու է նաև դահուկավազքի և լեռնադահուկային կոմպլեքս, այդ թվում նաև ճոպանուղի, բայց դե որ գյուղը կանգնած է դատարկելու շեմին, դա փաստ է։ Մենք կողմ ենք տնտեսության զարգացմանը, տուրիզմի զարգացմանը, մեր պայքարը քաղաքական չի, մենք պայքարում ենք մեր սերունդներին մեր պապերի փոխանցածը հանձնելու համար»,-վրդովված նշում էին վարդենուտցիները:

Ի վերջո ի՞նչ հանգուցալուծման եկան գյուղացիները, լուծվե՞ց արդյոք գյուղացիների խնդիրը հարցի պատասխանը փորձեցինք ստանալ Վարդենուտի վարչական ղեկավար Կամո Սահակյանից, ով տեղեկացրեց.

-Խնդիրը դեռ չի լուծվել, սպասում ենք էկոնոմիկայի փոխնախարարին, խոստացել են շաբաթվա վերջ այցելել եւ լսել գյուղացիներին: Հարցը նրանում է, որ ինչ-որ ընկերություն ուզում է գյուղացիների սեփականություն համարվող հողատարածքները, որը ճանաչվելէ  գերակա շահ, չնչին գումարներով գնել, ինչն էլ առաջացրել է գյուղացիների զայրույթը: Մարդիկ տարիներով հող են մշակել, էսօր գալիս են հերիք չի սեփականության են ուզում տիրանան, մի բան էլ կոպեկներով են ուզում տիրանալ: Սա է հիմնական խնդիր, հույս ունենք, որ մեր բողոքը տեղ կհասնի: