Քաղաքական դաշտը գերակտիվ համալրվում է նոր ստեղծվող կուսակցություններով

Փորձը ցույց է տալիս, որ նոր կուսակցություններ Հայաստանի Հանրապետությունում ստեղծվում են, սովորաբար, խորհրդարանական արտահերթ կամ հերթական ընտրություններին ընդառաջ: Այսպիսով՝ քաղաքական դաշտը սկսել է գերակտիվ համալրվել նոր ձեւավորվող կուսակցություններով:

ՀՀ պաշտպանության նախկին նախարար ԱՐՇԱԿ ԿԱՐԱՊԵՏՅԱՆԻ «Համահայկական ճակատ» հասարակական շարժումը դառնում է «Համահայկական ճակատ» կուսակցություն, որի հիմնադիր համագումարը կկայանա ապրիլի 5-ին, կուսակցության նախագահի թեկնածուն էլ Երեւանի Արաբկիր համայնքի նախկին ղեկավար ՀՈՎՀԱՆՆԵՍ ՇԱՀԻՆՅԱՆՆ է: Իսկ մինչ այդ, տեղի կունենա ԱԺ նախկին պատգամավոր Առաքել Մովսեսյանի եղբոր՝ պահեստազորի գնդապետ, ազատամարտիկ ՄԻՀՐԱՆ ՄՈՎՍԵՍՅԱՆԻ կողմից ստեղծվող «Արդար խոսք» կուսակցության հիմնադիր համագումարը՝ մարտի 27-ին:

Ավելի վաղ հիմնադրվեց «Հանուն Ժողովրդավար Պետականության» կուսակցությունը, որի ղեկավարն է ԱՐՍԵՆ ՍԱՐԳՍՅԱՆԸ, եւ ՎԱՐԴԱՆ ՂՈՒԿԱՍՅԱՆԻ կողմից ստեղծվեց «Դեմոկրատիա, օրենք, կարգապահություն» կուսակցությունը, որի նախագահն է Երեւանի ավագանու անկախ անդամ ԱՆՈՒՅՇ ԽՈՒԴԱՎԵՐԴՅԱՆԸ:

Շրջանառվող շշուկների համաձայն` ՀԴԿ նախագահ ԱՐԱՄ Գ. ՍԱՐԳՍՅԱՆԻ «Միասին» շարժումն էլ թեպետ չի շտապում կուսակցություն դառնալ, բայց եւս պատրաստվում է ընտրությունների, նույնիսկ ունի իր վարչապետի թեկնածուն՝ ի դեմս նախկին վարչապետ ՀՐԱՆՏ ԲԱԳՐԱՏՅԱՆԻ:

Մի շարժում էլ ստեղծվել է «Հանուն Հայքի» կարգախոսով: Վերջիններս եւս քաղաքական հայտ են ներկայացրել` հռչակելով «Հայք» ազգային պետության հիմնադրման հրամայականը՝ որպես քաղաքական, ազգային-գաղափարական նոր շրջափուլի (ցիկլի) մեկնարկ։ Ինչ խոսք, եթե երկրի կործանումից հինգ պակաս չլինեինք, նույնիսկ կարելի էր հուզվել Հայքի վերականգնման գաղափարով: Բայց երբ ուսումնասիրում ենք այս շարժման լիդերներից ՀՐԱՅՐ ԿՈՍՏԱՆՅԱՆԻ նախկինում արված հայտարարությունները, պարզ է դառնում, որ նա ավելի շատ նախկինատյաց է, քան` Հայքը վերականգնող:

Հիշեցնենք, որ դեռեւս 2022 թվականի դրությամբ` Հայաստանում կար պետական գրանցում ստացած 117 կուսակցություն, որոնցից 42-ը ստեղծվել կամ պետական գրանցում են ձեռք բերել 2018 թվականից հետո: Կան պնդումներ, որ հիմա թիվն անցել է 150-ը:

ՀՐԱՆՏ ՍԱՐԱՖՅԱՆ

Այս թեմայով Հազար նոր ավտոբուս էլ բերենք, պիկ ժամերին հնարավոր է քչություն անի. Աշոտ Սարգսյան Ի՞նչ են քննարկել «Ուժեղ Հայաստան»-ի եւ «Հայաստան»-ի ղեկավարները Երբ Փաշինյանի հետ լուսանկարը «մեղք» է, իսկ նրա գովքը՝ «հումոր» ՔՊ-ի կեղտոտ սպիտակեղենը փռել են արեւին Երեւանն արդեն շատ մեծ է, դրա համար չվում են Տիգրանաշեն․ ԸՆԿԵՐ ՓԱՆՋՈՒՆԻ