Ճնշում էր հակառակորդին ու վստահ հաղթանակ տոնեց բացարձակ առավելությամբ, 5։0 հաշվով. Ռուդոլֆ Գարբոյան

Իտալիայի Բուստո Արսիլիո քաղաքում բռնցքամարտիկները շարունակում են պայքարել Օլիմպիական վարկանիշային մրցաշարում։ Երեկ, մարտի 6-ին, մեր երկրի ներկայացուցիչ, Եվրոպայի գավաթի արծաթե մեդալակիր, ծնունդով գյումրեցի ՌՈՒԴՈԼՖ ԳԱՐԲՈՅԱՆԸ, հանդես գալով 51 կգ քաշային կարգում, նույնպես հաղթանակով մեկնարկեց վարկանիշային մրցաշարում։ Գյումրեցի մարզիկը մրցում էր Սինգապուրի ներկայացուցիչ Խուան Տեո Վիի հետ։ Գարբոյանը բոլոր ռաունդներում ուներ մեծ առավելություն, անընդհատ ճնշում էր հակառակորդին ու վստահ հաղթանակ տոնեց բացարձակ առավելությամբ, 5։0 հաշվով։

Ռուդոլֆը, Իտալիայից Iravunk. com -ի մարզական թղթակցի հետ զրույցում այսպես մեկնաբանեց իր մեկնարկային մենամարտում տարած հաղթանակը.

«Մրցակիցս լավ բռնցքամարտիկ էր, բայց ճիշտ էի հասկացել, թե նրա հետ ինչպիսի մենամարտ պետք է անցկացնեմ ու գերազանցելով հատկապես տեխնիկայի հարցում կարողացա հաղթել։ Այս մրցաշարին շատ լավ եմ նախապատրաստվել ու ամբողջ ուժերս ներդնելու եմ որպեսզի Օլիմպիական ուղեգրով վերադառնամ Հայաստան։ Իմ հաջորդ մենամարտը կլինի մարտի 10֊ին, հակառակորդս կլինի ադրբեջանցի Նիջատ Հուսեյնովը։

Նշենք, որ երեկ մեր մյուս ներկայացուցիչ, Գյումրեցի Դավիթ Չալոյանը +92 կգ քաշայինների պայքարում, իր մեկնարկային մենամարտում մրցել է կանադացի Ալեքսիս Բարիերի հետ ու ցավալի պարտություն կրել 4։ 1 հաշվով։ Իսկ այսօր, մարտի 7-ին, Գուրգեն Մադոյանը 71 կգ քաշայինների պայքարում կանցկացնի երկրորդ մենամարտը ազգությամբ իսպանացի Սերխիո Մարտինեսի հետ, իսկ Եվրոպայի գավաթակիր Նարեկ Մանասյանը 92 կգ քաշայինների պայքարում կմրցի Դանիել Գուզմանի հետ /Դոմինիկյան Հանրապետություն /։ Սպասենք մեր մարզիկների հաղթանակներին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ