Թիրախում «Փառքի անկյուն»-ներն են. համար 56 դպրոցում վստահեցրին` տուրք չեն տա որեւէ ճնշման

«Իրավունքը» երեկ ահազանգ էր ստացել, որ Երեւանի Ստեփան Զորյանի անվան համար 56 հիմնական դպրոցում պատրաստվում են դասադուլ անել «Փառքի անկյունը» հանելու պատճառով։ Ահազանգի հետքերով մենք շտապեցինք դպրոց եւ հանդիպեցինք արդեն վրդովված տնօրենին` ՍՈՒՍԱՆՆԱ ԳԱԼՍՏՅԱՆԻՆ: Նա թեպետ չցանկացավ հարցազրույց կամ մեկնաբանություն տալ` պատճառաբանելով, որ վատառողջ է, բայց թույլ տվեց սեփական աչքերով համոզվել, որ դպրոցի «Փառքի անկյունը» տեղում է:

Տնօրենը նեղսրտել էր, որ իրենց դպրոցի անվան շուրջ նման խոսակցություններ են շրջանառվում, մինչդեռ իրենց համար խիստ սկզբունքային հարց է` դպրոցում ունենալ շրջանավարտ-հերոսներին նվիրված անկյուն: Համենայնդեպս, դպրոցում մեզ խոստացան, որ տուրք չեն տա որեւէ ճնշման, թեպետ որեւէ ճնշում չկա էլ:

Նշենք, որ ԱԺ «Հայաստան» խմբակցության պատգամավոր ԼԻԼԻԹ ԳԱԼՍՏՅԱՆԸ հրապարակել էր իշխանության կողմից Երեւանի ենթակայության տակ գտնվող դպրոցներին իջեցված շրջաբերականը, որում մասնավորապես ասված է. «Անհրաժեշտ է զերծ մնալ դպրոցի պատերին ցուցանակներ, պաստառներ, նախկինում օգտագործված նյութերն ամրացնելուց` մինչեւ համապատասխան ուղեցույցները ստանալը»:

Անդրադառնալով դպրոցներում իշխանության կողմից «Փառքի անկյուն»-ների թիրախավորմանը` ընդդիմադիր պատգամավորն ասում է. «Հայ մարդու էության, արժեքային համակարգի ջախջախումը, տեսակի վերացումը շարունակվում է։ Նիկոլն ու նրա կամակատարները ինկվիզիայի են ենթարկում այն ամենը, ինչ սնում է մեր արժանապատվությունն ու վերընձյուղվելու, նորից արժանապատիվ պետություն դառնալու հնարավորություն է ներշնչում։ Պարտվածներն ատում են իրական հերոսներին, նրանց աչքերի մեջ նայելու համարձակություն չունեն, անգամ եթե նրանք բռնել են հավերժի ճամփան։ Պարտվածները նրանց աչքերում իրենց` ուրացողներին ուղղված նզովք ու պատմության անանց խարանն են տեսնում։ Սրանք սարսափում են սեփական արյամբ Հայրենիք ու հող պահած 18 տարեկան տղաներից, նրանց փառքից, նրանց զոհաբերվելու անմնացորդ ու ջինջ նվիրումից, որովհետեւ նրանցը հավերժականն է, նրանցը սրբացման ճանապարհն է»։

ՀՐԱՆՏ ՍԱՐԱՖՅԱՆ

Այս թեմայով Հայկական երգ ու պար, պատմություն ու ոգի՝ N78 դպրոցի բեմում Հաստատվել են 2026-2027 ուսումնական տարվա դպրոցական արձակուրդի ժամկետները Բա մի օր վեր կացեք, ասեք՝ Ալի՛և, գլուխդ պա՛տով ես տալիս, որևէ թթու խոսք նրան չեք ասում․ Խաչատրյան Կիրանցի եկեղեցում Նիկոլ Փաշինյանին ուղեկցում է պատգամավոր Գեղամ Նազարյանը․ Լուսանկարներ Եվրոպական կառույցները Նիկոլին գերադասում են իրենց արժեքներից. Աննա Մկրտչյան