Սահմանամերձ բնակավայրերը դատարկելով` կորցնելու ենք մեր հայրենիքի հերթական մասնաբաժինը. Թովմասյան

Գեղարքունիքի մարզի Վարդենիս քաղաքի եւ հարակից գյուղերի բնակիչները փետրվարի 12-ի առավոտյան փակել էին քաղաք մտնող գլխավոր ճանապարհը: Պատճառն այն է, որ իշխանությունները որոշել են փակել Վարդենիսի անձնագրային եւ վիզաների վարչության գրասենյակը` այն միացնելով Մարտունի համայնքի անձնագրային ծառայությանը, որը կանվանափոխվի եւ կստանա Միգրացիայի եւ քաղաքացիական ծառայության Մարտունու բաժին անունը: Վարդենիսում գտնվող հիմնարկությունները, այդ թվում` տեղի պոլիկլինիկան, տեւական ժամանակ ստորագրահավաք են իրականացնում՝ ի աջակցություն անձնագրային բաժնի։ Մեծ թվով ստորագրություններ են հավաքվել, պատրաստվում են հանձնել մարզպետարանին եւ անկնկալում, որ իրենց պահանջը բավարարող պատասխան կստանան։ Անդրադառնալով վերոնշյալին` ԱԺ անկախ պատգամավոր ԹԱԳՈՒՀԻ ԹՈՎՄԱՍՅԱՆԸ, որը ծնունդով Վարդենիսից է, մանրամասնեց, թե ինչ է կատարվում իրականում:

— Այստեղ խնդիրը ոչ այնքան հենց անձնագրային ծառայության փակումն է, որքան պետության վերաբերմունքը սահմանամերձ բնակավայրերի նկատմամբ: Այսինքն` սահմանամերձ Վարդենիսն այլեւս «դժբախտ եւ դժգո՞ւյն» է, որ այնտեղից տեղափոխում են պետական կառույցները: Հենց այս մեսիջի նկատմամբ է, որ վարդենիսցին այսօր անհանդուրժող է եւ իր դժգոհությունն է արտահայտում: Կամաց-կամաց պետական շատ կառույցներ փակվեցին Վարդենիսում եւ հարակից տարածքներում` տեղափոխվելով ավելի «ապահով» վայրեր եւ քաղաքներ, ինչը շատ տխուր արձանագրում է: Ես` որպես վարդենիսցի եմ ասում, ամեն ինչ փակելով եւ օպտիմալացնելով` որեւէ լավ բանի մենք չենք հասնելու: Հայաստանի, ընդհանրապես, ցանկացած երկրի անվտանգության հիմնասյունը հենց սահմանապահ բնակիչներն են, ովքեր իրենց գոյությամբ ամուր են պահում մեր սահմանները: Մենք պետք է արձանագրենք, որ Վարդենիսում ամեն ինչ փակել նշանակում է, որ նաեւ Վարդենիսն ենք փակում: Տեղեկացնեմ, որ այս հարցով ես դեռ հունվարի 23-ին դիմել էի ՀՀ ներքին գործերի նախարարին եւ ստացել էի պարզաբանում, որ 4 եւ ավելի քիչ թվով աշխատակիցներ ունեցող բոլոր ծառայություններն են օպտիմալացվելու եւ դրա մեջ մտնում է նաեւ, ցավոք սրտի, Վարդենիսը: Բայց տեսեք, թե նույնիսկ երեք աշխատատեղի կրճատումն ինչ հուզական ցասում է առաջացրել, որ մարդիկ փակել են ճանապարհը: Արդյունքում մարզպետը եւ մարզային իշխանության ներկայացուցիչները, ովքեր օրեր շարունակ չեն լսել քաղաքացիների դժգոհությունն ու զայրույթը, հիմա ստիպված են գնալ եւ բորբոքված քաղաքացիներին հանգստացնել արդեն փողոցում եւ խնդրել, որ բացեն այն: Մինչդեռ սա այն ճանապարհը չէ, որով պետք է գնալ: Նիկոլ Փաշինյանի իշխանությունը պետք է լավ հասկանա` սահմանամերձ բնակավայրերը դատարկելով` մենք կորցնելու ենք մեր հայրենիքի հերթական մասնաբաժինը:

ՀՐԱՆՏ ՍԱՐԱՖՅԱՆ

Այս թեմայով Բարձրագույն կրթություն չունենալը պատճառ չէ, որ պատգամավոր չլինեմ, վարչությունը կորոշի․ ՔՊ պատգամավոր Հանգուցալուծում ես չեմ տեսնում, Նիկոլ Փաշինյանը գնալու է մինչև վերջ․ Արցախի ԱԺ նախկին պատգամավորը եկեղեցու դեմ արշավի մասին Ինչու են Չախալյանին տեղափոխել «կարցեր». Գառնիկ Դանիելյանն՝ ահազանգի հետքերով Ռուսները արդեն փաստացի գրավել են Սևերսկը. Ռադայի պատգամավոր Գյումրիում ծեծել և արցունքաբեր գազ են փչել ՔՊ-ական պատգամավոր Սարուխանյանի ազգականի որդու աչքերին․ Armlur